ວັນທີ 8 ກໍລະກົດນີ້, ທະນາຄານໂລກໄດ້ເປີດເຜີຍບົດລາຍງານການຄົ້ນຄວ້າ ໂດຍເຫັນວ່າ: ບົດຮຽນດ້ານການພັດທະນາລົດໄຟຄວາມໄວສູງຂອງຈີນຄວນຖອດຖອນເອົາເປັນບົດຮຽນສຳລັບປະເທດອື່ນໆ.
ມື້ດຽວກັນ, ທະນາຄານໂລກໄດ້ເປີດເຜີຍບົດລາຍງານເລື່ອງ “ການພັດທະນາລົດໄຟຄວາມໄວສູງຂອງຈີນ” ໂດຍຊີ້ໃຫ້ເຫັນວ່າ: ແຜນການໄລຍະຍາວແລະຮອບດ້ານ ພ້ອມດ້ວຍການອອກແບບຕາມມາດຕະຖານ ແມ່ນປັດໄຈສຳຄັນໃນການພັດທະນາລົດໄຟຄວາມໄວສູງຂອງຈີນໃຫ້ສຳເລັດຜົນ. ບົດລາຍງານເຫັນວ່າ, “ແຜນການຕາໜ່າງທາງລົດໄຟໄລຍະກາງແລະຍາວ” ຂອງຈີນເປັນການຕອບສະໜອງໂຄງສ້າງໃຫ້ແກ່ການພັດທະນາລະບົບທາງລົດໄຟຄວາມໄວສູງຢ່າງຈະແຈ້ງ. ໃນຂະນະດຽວກັນ, ໂດຍອາໄສການອອກແບບແລະຂັ້ນຕອນທີ່ໄດ້ຕາມມາດຕະຖານ, ຕົ້ນທຶນຂອງຈີນໃນການສ້າງທາງລົດໄຟຄວາມໄວສູງແມ່ນປະມານ 2/3 ຂອງປະເທດອື່ນໆ.
ບົດລາຍງານຂອງທະນາຄານໂລກຍັງເຫັນວ່າ: ເມື່ອທຽບໃສ່ລົດຍົນແລະການບິນພົນລະເຮືອນແລ້ວເຫັນວ່າ, ລົດໄຟຄວາມໄວສູງຂອງຈີນ ມີທ່າແຮງດ້ານການແຂ່ງຂັນພາຍໃນໄລຍະທາງ 1.200 ກິໂລແມັດ ເຊິ່ງລາຄາປີ້ລົດມີພຽງແຕ່ 1/4 ຂອງລາຄາພື້ນຖານຂອງປະເທດອື່ນໆ, ເຮັດໃຫ້ລົດໄຟຄວາມໄວສູງສາມາດດຶງດູງຜູ້ໂດຍສານທີ່ມີລາຍຮັບທຸກລະດັບໄດ້.