ກອງປະຊຸມເວທີປຶກສາຫາລືສັນຕິພາບໂລກຄັ້ງທີ 8 ພາຍໃຕ້ຫົວຂໍ້ “ເຮັດໃຫ້ລະບຽບສາກົນມີຄວາມໝັ້ນທ່ຽງ: ແບກຫາບພາລະໜ້າທີ່ຮ່ວມກັນ, ຄຸ້ມຄອງບໍລິຫານຮ່ວມກັນ ແລະ ຊົມໃຊ້ຮ່ວມກັນ” ໄດ້ຈັດຂຶ້ນຢູ່ມະຫາວິທະຍາໄລຊິ່ງຮວາໃນວັນທີ 8 ກໍລະກົດນີ້, ທ່ານ ວາງຊີຊ່ານ ຮອງປະທານປະເທດຈີນໄດ້ເຂົ້າຮ່ວມພິທີເປີດເວທີປຶກສາຫາລືດັ່ງກ່າວ ແລະໄດ້ກ່າວຄຳປາໄສ.
ທ່ານ ວາງຊີຊ່ານ ກ່າວວ່າ: ນັບແຕ່ສະຖາປະນາສາທາລະນະລັດປະຊາຊົນຈີນເປັນຕົ້ນມາ, ຜ່ານຈາກຄວາມພະຍາຍາມຢ່າງທໍລະຫົດອົດທົນ, ປະຊາຊົນຈີນໄດ້ບັນລຸການປ່ຽນແປງຢ່າງໃຫຍ່ຫຼວງໃນປະຫວັດສາດທີ່ຈາກການຂາດເຂີນອຶດຫິວໄປສູ່ຄວາມອີ່ມໜຳສຳລານຢ່າງຮອບດ້ານ. ການພັດທະນາຂອງຈີນ ຈະແຍກອອກຈາກໂລກບໍ່ໄດ້, ການພັດທະນາຂອງໂລກກໍແຍກອອກຈາກຈີນບໍ່ໄດ້ເຊັ່ນດຽວກັນ. ຈີນເດັດດ່ຽວເດີນຕາມເສັ້ນທາງພັດທະນາໂດຍສັນຕິຢ່າງສະເໝີຕົ້ນສະເໝີປາຍ, ຈະບໍ່ສະແຫວງຫາຄວາມເປັນເຈົ້າອຳນາດຈົນຕາບເທົ່າໃດໆ, ຈະບໍ່ແຜ່ຂະຫຍາຍອານາເຂດຈົນຕາບເທົ່າໃດໆ ແລະຈະບໍ່ສະແຫວງຫາຂອບເຂດອິດທິພົນຂອງຕົນຈົນຕາມເທົ່າໃດໆ. ໂດຍຜະເຊີນໜ້າກັບການປັບປຸງແລະການປ່ຽນແປງລະບຽບສາກົນໃນປັດຈຸບັນ, ຈີນມີຈຸດຢືນຊຸກຍູ້ການສ້າງສາຍພົວພັນສາກົນແບບໃໝ່ແລະສ້າງປະຊາຄົມຮ່ວມຊາຕາກຳຂອງມວນມະນຸດ, ຮ່ວມມືກັນເພື່ອຮັບມືກັບສິ່ງທ້າທາຍໃໝ່ຮ່ວມກັນຂອງມວນມະນຸດ. ຈີນຮຽກຮ້ອງໃຫ້ບັນດາປະເທດຈົ່ງຍຶດຖືຈິດໃຈແຫ່ງການພັດທະນາໂດຍສັນຕິ, ຊຸກຍູ້ເສດຖະກິດໂລກາພິວັດຢ່າງບໍ່ຫວັ່ນໄຫວຄອນແຄນ, ເພື່ອຮ່ວມກັນສ້າງລະບຽບສາກົນທີ່ຍຸຕິທຳ, ສົມເຫດສົມຜົນ, ມີຄວາມໜັກແໜ້ນແລະບັງເກີດຜົນກວ່າເກົ່າ.