ຕາມຂ່າວ CRI: ວັນທີ 8 ກໍລະກົດນີ້ໃນໂອກາດຮ່ວມກັນກັບທ່ານຈາເຊັກ ຊາປູໂຕວິກສ ລັດຖະມົນຕີກະຊວງການຕ່າງປະເທດໂປໂລຍໃຫ້ສຳພາດນັກຂ່າວ, ທ່ານຫວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ຕອບຄຳຖາມກ່ຽວກັບບັນຫາ 5G.
ທ່ານຫວາງຢີ້ກ່າວວ່າ, 5G ແມ່ນຂີດໝາຍສຳຄັນທາງວິທະຍາສາດເຕັກນິກການສື່ສານຂອງມວນມະນຸດທີ່ມີຄວາມກ້າວໜ້າ, ແມ່ນໝາກຜົນຂອງການຮ່ວມມືສາກົນ. ສະນັ້ນໂອກາດໃນການພັດທະນາຈາກ 5G ຄວນຮ່ວມກັນແບ່ງປັນໃຫ້ໂລກ, ຫາກບໍ່ແມ່ນໃຫ້ຝ່າຍໃດຝ່າຍໜຶ່ງຜູກຂາດ. ຈີນຍິນດີສົ່ງເສີມວິສາຫະກິດຈີນແບ່ງປັນໝາກຜົນໃນການປະດິດສ້າງໃໝ່ໃນຂົງເຂດ 5G ກັບປະເທດຕ່າງໆ, ຮ່ວມກັນຍົກສູງລະດັບຂອງຂະແໜງການໂທລະຄົມຂອງໂລກ, ເພື່ອສ້າງຄວາມຜາສຸກໃຫ້ແກ່ປະຊາຊົນບັນດາປະເທດຫຼາຍກວ່າເກົ່າ. ຈີນເຫັນວ່າໂປໂລຍມີທ່າທີຈະປົກປັກຮັກສາສະພາບແວດລ້ອມຕະຫຼາດໂທລະຄົມທີ່ເປີດເຜີຍແລະຍຸຕິທຳ, ຈະບໍ່ປະຕິບັດນະໂຍບາຍກີດກັນຕໍ່ປະເທດອື່ນຫຼືວິສາຫະກິດໃດໜຶ່ງ. ຈີນເຫັນວ່າທ່າທີດັ່ງກ່າວແມ່ນຫຼັກໝັ້ນທີ່ຍຸຕິທຳແລະສົມເຫດສົມຜົນ, ທັງສອດຄ່ອງກັບກະແສພັດທະນາໃນຍຸກປັດຈຸບັນ, ສອດຄ່ອງກັບຜົນປະໂຫຍດຂອງໂປໂລຍ. ຈີນຫວັງຢາກດຳເນີນການຮ່ວມມືກັບໂປໂລຍໃນຂົງເຂດປະດິດສ້າງໃໝ່ໃຫ້ຫຼາຍກວ່າເກົ່າ, ເພື່ອເພີ່ມເນື້ອໃນໃໝ່ໃຫ້ແກ່ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ.