ອົງການສະຖິຕິແຫ່ງຊາດຈີນແຈ້ງໃຫ້ຮູ້ໃນວັນທີ 15 ກໍລະກົດນີ້ວ່າ: 6 ເດືອນຕົ້ນປີນີ້, ລວມຍອດຜະລິດຕະພັນພາຍໃນຫຼື GDP ຂອງຈີນບັນລຸປະມານ 4,509 ຕື້ຢວນ, ເມື່ອຄິດໄລ່ຕາມລາຄາຄົງທີ່ແລ້ວ ໄດ້ເພີ່ມຂຶ້ນ 6,3% ເມື່ອທຽບໃສ່ໄລຍະດຽວກັນຂອງປີຜ່ານມາ. ພາຍໃຕ້ສະພາບການທີ່ເສດຖະກິດໂລກກຳລັງຜະເຊີນກັບຄວາມຫຍຸ້ງຍາກເນື່ອງຈາກລັດທິຝ່າຍດຽວແລະລັດທິປົກປ້ອງການຄ້າ, ເສດຖະກິດຈີນໄດ້ຮັກສາຄວາມໝັ້ນທ່ຽງໂດຍລວມແລະຂະຫຍາຍຕົວຢ່າງໜັກແໜ້ນນັ້ນເປັນຜົນງານທີ່ໄດ້ມາບໍ່ແມ່ນເລື່ອງງ່າຍ, ການຂະຫຍາຍຕົວດ້ານເສດຖະກິດມີຄຸນນະພາບສູງກວ່າເກົ່າ.
ຂະນະດຽວກັນ, ດັດສະນີເສດຖະກິດມະຫາພາກສຳຄັນອື່ນໆເຊັ່ນ ການຫາວຽກເຮັດງານທຳ, ລາຄາສິນຄ້າ, ລາຍໄດ້ແລະອື່ນໆກໍຍັງຢູ່ໃນລະດັບທີ່ສົມເຫດສົມຜົນ. ຕົວຢ່າງເຊັ່ນ: ແຕ່ເດືອນມັງກອນຫາເດືອນມິຖຸນາປີນີ້, ປະຊາຊົນໃນຕົວເມືອງທົ່ວປະເທດໄດ້ມີວຽກເຮັດງານທຳເພີ່ມຂຶ້ນ 7,37 ລ້ານຄົນ, ເຊິ່ງສາມາດສຳເລັດເປົ້າໝາຍປີ 2019 ເຖິງ 67%, ສະພາບການຫາວຽກເຮັດງານທຳມີຄວາມໝັ້ນທ່ຽງ; ດັດຊະນີລາຄາບໍລິໂພກຫຼື CPI ໄດ້ເພີ່ມຂຶ້ນ 2,2% ເມື່ອທຽບໃສ່ໄລຍະດຽວກັນຂອງປີຜ່ານມາ ຖືວ່າເປັນການເພີ່ມຂຶ້ນຢ່າງນີ້ມນວນ; ດັດຊະນີເສດຖະກິດມະຫາພາກເຫຼົ່ານີ້ຂະຫຍາຍຕົວຢ່າງໝັ້ນທ່ຽງນັ້ນໄດ້ສ້າງພື້ນຖານທີ່ດີໃຫ້ແກ່ຈີນໃນການບັນລຸເປົ້າໝາຍການເຕີບໂຕດ້ານເສດຖະກິດໃນໝົດປີ2019 ນີ້.
ແຕ່ສິ່ງທີ່ຕ້ອງເອົາໃຈໃສ່ນັ້ນກໍຄື ເຖິງວ່າ ປັດຈຸບັນ ຫຼາຍປະເທດຍັງບໍ່ທັນໄດ້ເປີດເຜີຍຂໍ້ມູນເສດຖະກິດໃນ 6 ເດືອນຕົ້ນປີນີ້ກໍຕາມ, ແຕ່ອີງຕາມການຄາດຄະເນຂອງອົງການຈັດຕັ້ງສາກົນ, ຈັງຫວະການເຕີບໂຕໃນລະດັບ 6,3% ຂອງເສດຖະກິດຈີນໃນ 6 ເດືອນຕົ້ນປີນີ້ຍັງຈະຢູ່ໃນແຖວໜ້າຂອງບັນດາກຸ່ມເສດຖະກິດສຳຄັນຂອງໂລກ. ປັດຈຸບັນ, ຈີນໄດ້ປະກອບສ່ວນຕໍ່ການຂະຫຍາຍຕົວດ້ານເສດຖະກິດຂອງໂລກເຖິງ 30%, ໃນຕໍ່ໜ້າ, ຈີນຍັງ ເປັນກຳລັງຂັບເຄື່ອນທີ່ເຂັ້ມແຂງໃນການຊຸກຍູ້ໃຫ້ເສດຖະກິດໂລກຂະຫຍາຍຕົວ.
ສິ່ງສຳຄັນກວ່ານັ້ນກໍຄື, ໂຄງປະກອບເສດຖະກິດຈີນໃນ 6 ເດືອນຕົ້ນປີນີ້ໄດ້ປາກົດໃຫ້ເຫັນຈຸດເດັ່ນທີ່ສືບຕໍ່ໄດ້ຮັບການປັບປຸງໃຫ້ດີຂຶ້ນ, ເບິ່ງຈາກໂຄງປະກອບດ້ານອຸດສາຫະກຳແລ້ວ, ມູນຄ່າເພີ່ມຂອງຂະແໜງການທີ 3 ເຊັ່ນຂະແໜງການບໍລິການເປັນຕົ້ນ ໄດ້ກວມ GDP ເຖິງ 54,9%. ເພີ່ມຂຶ້ນ 0,5% ເມື່ອທຽບໃສ່ໄລຍະດຽວກັນຂອງປີຜ່ານມາ. ໃນຂະແໜງການອຸດສາຫະກຳຂະໜາດໃຫຍ່, ມູນຄ່າເພີ່ມຂອງອຸດສາຫະກຳຍຸດທະສາດທີ່ພັດທະນາໃໝ່ແລະອຸດສາຫະກຳການຜະລິດເຕັກນິກສູງລ້ວນແຕ່ສູງກວ່າຈັງຫວະການເຕີບໂຕໂດຍລວມ ເຊິ່ງສະແດງໃຫ້ເຫັນເຖິງຈຸດພິເສດທີ່ພັດທະນາຢ່າງວ່ອງໄວແລະມີຄຸນນະພາບສູງ. ເບິ່ງຈາກໂຄງປະກອບດ້ານຄວາມຕ້ອງການ, ລາຍຈ່າຍດ້ານການບໍລິໂພກສຸດທ້າຍ ໄດ້ປະກອບສ່ວນເຂົ້າໃນການຂະຫຍາຍຕົວດ້ານເສດຖະກິດເຖິງ 60,1%, ເຊິ່ງສະແດງໃຫ້ເຫັນວ່າ ການບໍລິໂພກສືບຕໍ່ເປັນກຳລັງສຳຄັນໃນການຊຸກຍູ້ເສດຖະກິດໃຫ້ຂະຫຍາຍຕົວ.
ປີນີ້ເປັນປີຄົບຮອບ 70 ປີ ແຫ່ງການສາຖາປະນາ ສປ ຈີນ, ທັງເປັນປີສຳຄັນໃນການບັນລຸເປົ້າໝາຍການສ້າງສັງຄົມອິ່ມໜຳສຳລານໃຫ້ສຳເລັດຮອບດ້ານ ຕາມທີ່ສູນກາງພັກກອມມູນິດຈີນກຳນົດໄວ້. ພາຍໃຕ້ສະພາບເສດຖະກິດໂລກຂະຫຍາຍຕົວຊ້າລົງໂດຍລວມ, ເສດຖະກິດຈີນໃນ 6 ເດືອນຕົ້ນປີນີ້ໄດ້ຮັບຜົນດີເປັນທີ່ໜ້າເພິ່ງພໍໃຈໂດຍລວມນັ້ນເປັນເລື່ອງທີ່ບໍ່ງ່າຍ ເຊິ່ງສະແດງໃຫ້ເຫັນຢ່າງເຕັມສ່ວນວ່າ ເສດຖະກິດຈີນມີຄວາມເຂັ້ມແຂງແລະຄວາມສາມາດຕ້ານຄວາມສ່ຽງຢ່າງສູງ ແລະມີຄວາມສາມາດເຕັມທີ່ໃນການບັນລຸເປົ້າໝາຍເສດຖະກິດເຕີບໂຕປີ 2019,ສະນັ້ນ ທົ່ວໂລກກໍຄວນມີຄວາມໝັ້ນໃຈຕໍ່ເສດຖະກິດຈີນຢ່າງແນ່ນອນ.