ວັນທີ 15 ກໍລະກົດນີ້, ທ່ານຫຼີເຄີ້ສຽງ, ກຳມະການປະຈຳກົມການເມືອງສູນກາງພັກກອມມູນິດຈີນ ນາຍົກລັດຖະມົນຕີຈີນໄດ້ເປັນປະທານຈັດກອງປະຊຸມສົນທະນາຜູ້ຊ່ຽວຊານແລະນັກທຸລະກິດກ່ຽວກັບສະພາບເສດຖະກິດ, ເພື່ອວິເຄາະສະພາບການໝູນເດີນເສດຖະກິດໃນປັດຈຸບັນ, ແລະຮັບຟັງຄວາມຄິດເຫັນເພື່ອເຮັດວຽກງານດ້ານເສດຖະກິດໃນບາດກ້າວຕໍ່ໄປໃຫ້ດີ.
ທ່ານຫຼີເຄີ້ສຽງກ່າວວ່າ: ແຕ່ປີນີ້ມາ, ເສດຖະກິດຈີນໝູນເດີນໃນຕົວເລກພື້ນຖານທີ່ສູງ, ແລະສືບຕໍ່ຮັກສາຄວາມທຸ່ນທ່ຽງ, ທັງກ້າວເດີນຢ່າງໜັກແໜ້ນ, ອົງກອນໃນຕະຫຼາດໄດ້ມີພະລັງຊີວິດຊີວາຫຼາຍກວ່າເກົ່າ, ການປະກອບອາຊີບທີ່ເພີ່ມຂຶ້ນໃໝ່ໃນຕົວເມືອງມີຫຼາຍກວ່າ 7,3 ລ້ານຄົນ, ພົນລະເມືອງມີລາຍໄດ້ເພີ່ມຂຶ້ນ, ສິ່ງແວດລ້ອມຊີວະພາບສືບຕໍ່ໄດ້ຮັບການປັບປຸງໃຫ້ດີຂຶ້ນ, ຕົວເລກດັດສະນີຈຳນວນໜຶ່ງດີກວ່າທີ່ຄາດໝາຍໄວ້, ຜົນສຳເລັດເຫຼົ່ານີ້ໄດ້ມາບໍ່ແມ່ນງ່າຍ. ແຕ່ກໍ່ຕ້ອງໄດ້ເຫັນການເຕີບໂຕເສດຖະກິດທົ່ວໂລກໃນປັດຈຸບັນມີພະລັງອ່ອນລົງ, ການລົງທຶນດ້ານການຄ້າຊັກຊ້າລົງ, ລັດທິປົກປ້ອງເງີຍຫນ້າຂຶ້ນ, ປັດໃຈທີ່ກະທົບເຖິງເສດຖະກິດພາຍໃນປະເທດແລະຄວາມຫຍຸ້ງຍາກການທ້າທາຍກໍ່ມີຫລາຍ, ຄວາມກົດດັນເພີ່ມຂຶ້ນ. ສະນັ້ນ, ຕ້ອງຊຸກຍູ້ການປະຕິຮູບແລະເປີດປະຕູສູ່ພາຍນອກຢ່າງໝັ້ນໜຽວບໍ່ປ່ຽນແປງ, ຊຸກຍູ້ໃຫ້ໂຄງປະກອບເສດຖະກິດຍົກລະດັບຂຶ້ນ, ຮັກສາໃຫ້ເສດຖະກິດໝູນເດີນຢ່າງທຸ່ນທ່ຽງ, ຊຸກຍູ້ການພັດທະນາໃຫ້ມີຄຸນນະພາບສູງ.
ທ່ານຫຼີເຄີ້ສຽງຊີ້ໃຫ້ເຫັນວ່າ, ຕ້ອງຍຶດໝັ້ນປະຕິບັດນະໂຍບາຍການເງິນທີ່ຕັ້ງໜ້າ, ນະໂຍບາຍເງິນຕາທີ່ໝັ້ນທ່ຽງ ແລະນະໂຍບາຍບູລິມະສິດໃຫ້ແກ່ການປະກອບອາຊີບ, ໃຫ້ຄຳໝັ້ນສັນຍາໃນການຫຼຸດພາສີອາກອນແລະຄ່າທຳນຽມເກືອບ 2 ພັນຕື້ຢວນຕໍ່ປີໃຫ້ບັນລຸຜົນເປັນຈິງ, ແລະໃຫ້ການຄາດໝາຍຂອງວິສາຫະກິດມີຄວາມທຸ່ນທ່ຽງ.