ເລີ່ມແຕ່ກາງເດືອນມິຖຸນາມານີ້, ເຂດບໍລິຫານພິເສດຮົງກົງຈີນໄດ້ເກີດເຫດການໃຊ້ຄວາມຮຸນແຮງຕ່າງໆທີ່ລະເມີດກົດໝາຍ. ບຸກຄົນປະເທດຕາເວັນຕົກຈຳນວນໜຶ່ງໄດ້ອອກມາກ່າວຕຳໜິຈີນເລື້ອຍໆແລະໃຊ້ສອງມາດຕະຖານຕໍ່ເຫດການເຫຼົ່ານີ້, ປ່ອຍໃຫ້ກຸ່ມຄົນເຫຼົ່ານີ້ກະທຳຄວາມຮຸນແຮງຕາມໃຈຕົນເອງ, ຍິ່ງກວ່ານັ້ນໄດ້ເວົ້າຍົກຍໍປໍປັ້ນຕໍ່ຜູ້ໃຊ້ຄວາມຮຸນແຮງກໍຄືເຫດການດັ່ງກ່າວ, ແລະຕຳໜິຕິຕຽນການປະຕິບັດກົດໝາຍຕາມປົກກະຕິຂອງເຈົ້າໜ້າທີ່ຕຳຫຼວດຊາວຮົງກົງ, ທັງໄດ້ໃສ່ຮ້າຍປ້າຍສີວ່າລັດຖະບານຈີນໄດ້ຫຼຸດເສລີພາບແລະສິດຂອງຮົງກົງ. ຕົວຢ່າງຫຼ້າສຸດກໍຄື ເອລິອອດ ອິງເກວ, ປະທານຄະນະກຳມາທິການວຽກງານການຕ່າງປະເທດຂອງສະພາຕ່ຳອາເມຣິກາກ່າວໃນເມື່ອບໍ່ດົນມານີ້ວ່າ, “ເຈົ້າໜ້າທີ່ຕຳຫຼວດຮົງກົງໄດ້ໃຊ້ຄວາມຮຸນແຮງການສະຫຼາຍກຸ່ມແຫ່ຂະບວນປະທ້ວງ, ສົ່ງຜົນເຮັດໃຫ້ຊື່ສຽງຂອງຮົງກົງໃນເວທີສາກົນໃນດ້ານການບໍລິຫານແລະຕຸລາການຖືກເສື່ອມເສຍ”, ຖ້ອຍຄວາມດັ່ງກ່າວທີ່ບໍ່ຫົວຊາກັບຄວາມຈິງນັ້ນໄດ້ປີ້ນດຳເປັນຂາວ, ທັງເປັນການແຊກແຊງວຽກງານພາຍໃນຂອງຮົງກົງແລະວຽກງານພາຍໃນຂອງຈີນຢ່າງບັງອາດອີກດ້ວຍ.
ໃນສາຍຕາຂອງນັກການເມືອງປະເທດຕາເວັນຕົກບາງຄົນເຊັ່ນ ເອລິອອດ ອິງເກວ ແລະຜູ້ອື່ນໆ, ການກະທຳຄວາມຮຸນແຮງທີ່ເກີດຂຶ້ນໃນການແຫ່ຂະບວນຢູ່ປະເທດຕາເວັນຕົກຈຶ່ງແມ່ນການກະທຳຄວາມຮຸນແຮງ, ການໂຈມຕີຕຳຫຼວດແລະປະຊາຊົນຂອງປະເທດຕາເວັນຕົກຈຶ່ງແມ່ນຄົນຮ້າຍ, ຕຳຫຼວດມີສິດປາບປາມຜູ້ປະທ້ວງ; ແຕ່ວ່າໃນເວລາມີເຫດການກະທຳຄວາມຮຸນແຮງທີ່ເກີດຂຶ້ນຢູ່ຮົງກົງແລ້ວ, ຊ້ຳພັດແມ່ນ “ການແຫ່ຂະບວນປະທ້ວງໂດຍສັນຕິ”, ສອງມາດຕະຖານຢ່າງເປີດແປນແບບນີ້ໄດ້ສ່ອງແສງໃຫ້ເຫັນທາດແທ້ຂອງນັກການເມືອງປະເທດຕາເວັນຕົກບາງຄົນເຊັ່ນ ເອລິອອດ ອິງເກວ ເປັນຄົນຈອມປອມຫຼອດລວງແລະບໍ່ມີສິນທຳທີ່ສຸດເລີຍ.
ຄົນອາເມຣິກາແລະອັງກິດເຫຼົ່ານີ້ລືມແລ້ວບໍ່? ໃນການເຄື່ອນໄຫວປະທ້ວງ “ຍຶດຄອງວອນສະທຣິດ”ປີ 2011 ນັ້ນ, ຕຳຫຼວດອາເມຣິກາໄດ້ພົ່ນນ້ຳໝາກເຜັດແລະຍິງລູກປືນຢາງໃສ່ຜູ້ປະທ້ວງ; ປີດຽວກັນ, ເຫດການປັ່ນປ່ວນທີ່ເກີດຂຶ້ນຢູ່ລອນດອນແລະແຫ່ງຕ່າງໆນັ້ນ, ຕຳຫຼວດອັງກິດໄດ້ໃຊ້ລົດສີດນ້ຳທີ່ມີຄວາມແຮງສູງສະຫຼາຍພວກກໍ່ເຫດປັ່ນປ່ວນ. ແຕ່ຖ້າກ່ຽວພັນເຖິງຮົງກົງ, ພວກນັກການເມືອງຂອງອາເມຣິກາແລະອັງກິດເຫຼົ່ານີ້ພັດປ່ຽນໜ້າຕາໃນທັນທີ, ບໍ່ພຽງແຕ່ເບິ່ງຂ້າມຕຳຫຼວດຮົງກົງໃຊ້ຄວາມອົດທົນອົດກັ້ນຢ່າງສຸດຂີດໃນເວລາສະຫຼາຍການເຄື່ອນໄຫວດ້ວຍຄວາມຮຸນແຮງແລະການຕັ້ງໃຈທ້າທາຍເກາະຜິດຂອງກຸ່ມຫົວຮຸນແຮງ, ຍັງຕຳໜິຢ່າງເປີດແປນແລະຮ້າຍກາດທີ່ສຸດຕໍ່ຕຳຫຼວດຮົງກົງທີ່ປະຕິບັດກົດໝາຍທີ່ຖືກຕ້ອງຕາມປົກກະຕິອີກດ້ວຍ.
ສື່ມວນຊົນຈຳນວນໜຶ່ງຂອງປະເທດຝ່າຍຕາເວັນຕົກໄດ້ອວດອ້າງຕົນເອງວ່າມີພາວະວິໄສແລະຍຸດຕິທຳມາໂດຍຕະຫຼອດ, ແຕ່ໃນເວລາຢູ່ຕໍ່ໜ້າບາງປະເທດຝ່າຍຕາເວັນຕົກແລະນັກການເມືອງທີ່ແຊກແຊງວຽກງານພາຍໃນຂອງຮົງກົງນັ້ນ, ພັດປິດຫູປິດຕາໂດຍບໍ່ສົນໃຈກັບຄວາມເປັນຈິງເລີຍ. ໃນເວລາລາຍງານຂ່າວເຫດການໃຊ້ຄວາມຮຸນແຮງທີ່ເກີດຂຶ້ນຢູ່ຮົງກົງໃນຫວ່າງມໍ່ໆມານີ້, ພວກເຂົາລາຍງານພຽງແຕ່ “ຜົນຮ້າຍຢ້ອນຫຼັງ”, ພັດຕັ້ງໃຈຫຼົບຫຼີກ “ສາຍເຫດ”ຂອງມັນ, ໂດຍສະເພາະໄດ້ເວົ້າເຖິງພຽງແຕ່ເລັກໜ້ອຍແລະບໍ່ເປັນທາງການຕໍ່ການກະທຳທີ່ທ້າທາຍເກາະຜິດຂອງພວກຫົວຮຸນແຮງ. ຕົວຢ່າງຄື: ວັນທີ 12 ມີຖຸນານີ້, ຢູ່ເຂດຈິ່ນຈົ່ງ ເຊິ່ງເປັນທີ່ຕັ້ງຂອງສຳນັກງານໃຫຍ່ອົງການປົກຄອງເຂດບໍລິຫານພິເສດຮົງກົງແລະຕຶກສະພານິຕິບັນຍັດໄດ້ເກີດເຫດການປັ່ນປ່ວນ, ສື່ຫຼັກແຫ່ງໜຶ່ງຂອງອັງກິດໄດ້ລາຍງານວ່າຕຳຫຼວດຍິງລູກປືນຢາງແລະແກສນ້ຳຕາຕໍ່ພວກຫົວຮຸນແຮງທີ່ກໍ່ການປັ່ນປ່ວນ, ພັດບໍ່ກ່າວເຖິງພວກຫົວຮຸນແຮງເຫຼົ່ານີ້ໄດ້ບຸກເຂົ້າເຂດປ້ອງກັນຂອງຕຳຫຼວດແລະໃຊ້ອາວຸດອັນຕະລາຍທຳລາຍຕຳຫຼວດຈັກຄຳໜຶ່ງເລີຍ.
ວັນທີ 14 ກໍລະກົດນີ້, ນີ້ວມືຂອງຕຳຫຼວດຮົງກົງຜູ້ໜຶ່ງໄດ້ຖືກກັດຂາດໂດຍຜູ້ປະທ້ວງ, ແຕ່ສື່ມວນຊົນຝ່າຍຕາເວັນຕົກບໍ່ເຄີຍລາຍງານກ່ຽວກັບເລື່ອງນີ້ເລີຍ. ວັນທີ 21 ກໍລະກົດນີ້, ມີກຸ່ມຜູ້ປະທ້ວງໄດ້ທຳລາຍເຄື່ອງໝາຍຊາດ ເຊິ່ງເປັນເລື່ອງທີ່ປະເທດທີ່ມີອະທິປະໄຕບໍ່ສາມາດຮັບໄດ້, ແຕ່ສື່ມວນຊົນຝ່າຍຕາເວັນຕົກກໍບໍ່ລາຍງານເລື່ອງນີ້ເຊັ່ນກັນ. ຂໍຖາມວ່າພວກເຂົາມີຄຸນວຸດທິຊິເອີ່ຍເຖິງພາວະວິໄສ ແລະເປັນຄວາມທຳໄດ້ແນວໃດ?! ພວກເຂົາແຊກແຊງວຽກງານພາຍໃນປະເທດອື່ນໆ ເຊິ່ງບໍ່ພຽງແຕ່ເປັນການລະເມີດກົດໝາຍສາກົນເທົ່ານັ້ນ, ແຕ່ຍັງເປັນການລະເມີດຫຼັກການພື້ນຖານຂອງສາຍພົວພັນສາກົນອີກດ້ວຍ. ການວິພາກວິຈານວຽກງານພາຍໃນປະເທດອື່ນໆດ້ວຍ “ສອງມາດຕະຖານ” ເປັນວິທີທີ່ນັກການເມືອງ ແລະສື່ມວນຊົນຝ່າຍຕາເວັນຕົກຈຳນວນໜຶ່ງນຳໃຊ້ເລື້ອຍໆ. ປັດຈຸບັນນີ້, ພວກເຂົາລາຍງານການເດີນຂະບວນປະທ້ວງໄປຕາມຖະໜົນ ແລະເຫດການຄວາມຮຸນແຮງທີ່ເກີດຂຶ້ນຢູ່ຮົງກົງໃນມໍ່ໆນີ້ຢ່າງບໍ່ຖືກຕ້ອງຕາມຄວາມເປັນຈິງ, ເພື່ອຍຸຍົງສົ່ງເສີມໃຫ້ເຫັນການຈະລາຈົນຮຸນແຮງຂຶ້ນເລື້ອຍໆ ເພື່ອສ້າງສິ່ງກີດຂວາງຕໍ່ການພັດທະນາຂອງຈີນດ້ວຍການສ້າງຄວາມວຸ້ນວາຍຢູ່ຮົງກົງ ເຊິ່ງເປັນເຈຕະນາຮ້າຍແຮງທີ່ສຸດ ແລະເປັນການກະທຳທີ່ຕ່ຳຕ້ອຍແທ້ໆ! ລັດຖະບານ, ຕຳຫຼວດ ແລະປະຊາຊົນເຂດບໍລິຫານພິເສດຮົງກົງເດັດດ່ຽວບໍ່ໃຫ້ອິດທິກຳລັງພາຍນອກ ແລະຜູ້ໃດກໍ່ຕາມມາທຳລາຍພື້ນຖານການປົກຄອງດ້ວຍກົດໝາຍຂອງຮົງກົງຢ່າງເດັດຂາດ. ຂະນະທີ່ຈີນກໍບໍ່ສາມາດເຫັນສະພາບການວຸ້ນວາຍທີ່ທຳລາຍອະທິປະໄຕ ແລະຄວາມໝັ້ນຄົງແຫ່ງຊາດ ກໍຄືຄວາມຈະເລີນຮຸ່ງເຮືອງ ແລະຄວາມໝັ້ນຄົງຂອງຮົງກົງຜັນແປ ແລະຂະຫຍາຍໄປຕາມທິດທີ່ບໍ່ສາມາດແກ້ໄຂໄດ້ຢ່າງເດັດຂາດ.