ວັນທີ 29 ກໍລະກົດນີ້, ຢູ່ທີ່ປັກກິ່ງ, ທ່ານຢາງກ່ວງ, ໂຄສົກຫ້ອງການວຽກງານຮົງກົງແລະມາເກົາຂອງຄະນະລັດຖະບານຈີນກ່າວວ່າ: ການຜັນແປແລະຂະຫຍາຍຕົວຂອງເຫດການຢູ່ຮົງກົງໃນຫວ່າງມໍ່ໆມານີ້, ໂດຍສະເພາະແມ່ນການເຄື່ອນໄຫວດ້ວຍຄວາມຮຸນແຮງທີ່ພວກຫົວຮຸນແຮງສ່ວນໜ້ອຍກໍ່ຂຶ້ນນັ້ນ ໄດ້ທຳລາຍສະພາບຄວາມຈະເລີນຮຸ່ງເຮືອງແລະຄວາມໝັ້ນຄົງຂອງຮົງກົງຢ່າງໜັກໜ່ວງ, ຫວັງວ່າບຸກຄົນວົງການຕ່າງໆຂອງຮົງກົງຈະພ້ອມກັນຕໍ່ຕ້ານແລະສະກັດກັ້ນກຳລັງຮຸນແຮງຢ່າງເດັດຂາດ.
ທ່ານຢາງກ່ວງ ກ່າວຄຳດັ່ງກ່າວໃນກອງປະຊຸມຖະແຫຼງຂ່າວຂອງຫ້ອງການຖະແຫຼງຂ່າວຄະນະລັດຖະບານຈີນ. ທ່ານກ່າວວ່າ, ການປ່ຽນແປງແລະການຂະຫຍາຍຕົວຂອງເຫດການຢູ່ຮົງກົງໃນຫວ່າງມໍ່ໆມານີ້ ໄດ້ເປັນການທ້າທາຍເກາະຜິດຕໍ່ການປົກຄອງດ້ວຍກົດໝາຍແລະລະບຽບສັງຄົມຂອງຮົງກົງ, ໄດ້ຂົ່ມຂູ່ເຖິງຄວາມປອດໄພດ້ານຊີວິດແລະຊັບສິນຂອງພົນລະເມືອງຮົງກົງຢ່າງໜັກໜ່ວງ, ແລະກໍ່ໄດ້ກະທົບເຖິງຂັ້ນຕ່ຳສຸດຂອງຫຼັກການ “ປະເທດດຽວສອງລະບອບ”ຢ່າງໜັກໜ່ວງ, ແມ່ນບໍ່ສາມາດຮັບເອົາໄດ້ຢ່າງເດັດຂາດ. ສັງຄົມໃດໆກໍ່ຕາມທີ່ມີອາລະຍະທຳແລະປົກຄອງດ້ວຍກົດໝາຍແມ່ນບໍ່ສາມາດອະນຸຍາດໃຫ້ມີການໃຊ້ກຳລັງຮຸນແຮງເພື່ອແກ້ໄຂບັນຫາຢ່າງເດັດຂາດ. ຫວັງວ່າຊາວເມືອງຮົງກົງອັນໄພສານສາມາດຮັບຮູ້ເຖິງເຫດການທີ່ໜັກໜ່ວງດັ່ງກ່າວ, ພ້ອມກັນຕຳໜິການກະທຳທີ່ຜິດກົດໝາຍຂອງພວກຫົວຮຸນແຮງ, ສະກັດກັ້ນບໍ່ໃຫ້ພວກເຂົາເຈົ້າທຳຮ້າຍຮົງກົງອີກຕໍ່ໄປ.