ກະຊວງປ້ອງກັນປະເທດຈີນຈັດງານລ້ຽງຢູ່ນະຄອນຫຼວງປັກກິ່ງ ສປ ຈີນໃນວັນທີ 30 ກໍລະກົດນີ້, ເພື່ອສະເຫຼີມສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 92 ປີ. ໃນໂອກາດນີ້, ທ່ານເວີ້ຍເຟີ້ງເຫີ ກຳມະການຄະນະກຳມະການການທະຫານສູນກາງຈີນ, ທີ່ປຶກສາແຫ່ງລັດທັງເປັນລັດຖະມົນຕີກະຊວງປ້ອງກັນປະເທດຈີນກ່າວວ່າ, ຈີນຈະເດີນໄປຕາມເສັ້ນທາງພັດທະນາໂດຍສັນຕິຢ່າງໝັ້ນໜຽວບໍ່ປ່ຽນແປງ, ຍຶດໝັ້ນຊຸກຍູ້ສ້າງການພົວພັນສາກົນແບບໃໝ່ແລະສ້າງປະຊາຄົມຮ່ວມຊາຕາກຳມວນມະນຸດ, ຍຶດໝັ້ນປະຕິບັດນະໂຍບາຍປ້ອງກັນປະເທດລັກສະນະປ້ອງກັນ, ບໍ່ເປັນເຈົ້າມະຫາອຳນາດແລະບໍ່ແຜ່ອຳນາດຢ່າງເດັດຂາດ, ບໍ່ສະແຫວງຫາຂອບເຂດອິດທິກຳລັງຈົນເທົ່າໃດໆ, ຄັດຄ້ານລັດທິເຈົ້າມະຫາອຳນາດແລະການເມືອງມະຫາອຳນາດຢ່າງເດັດດ່ຽວ.
ທ່ານເວີ້ຍເຟີ້ງເຫີ ກ່າວຕື່ມວ່າ, ກອງທັບຈີນເດັດດ່ຽວປົກປ້ອງອະທິປະໄຕ, ຄວາມໝັ້ນຄົງແລະສິດຜົນປະໂຫຍດດ້ານການພັດທະນາ, ມີຄວາມໝັ້ນໃຈທີ່ຈະຜ່ານຜ່າຄວາມຫຍຸ້ງຍາກລຳບາກທຸກຢ່າງ. ກອງທັບຈີນຈະລົງເລິກການແລກປ່ຽນແລະການຮ່ວມມືກັບກອງທັບຂອງປະເທດຕ່າງໆ, ຕັ້ງໜ້າເຂົ້າຮ່ວມວຽກງານຮັກສາຄວາມໝັ້ນຄົງຂອງພາກພື້ນແລະສາກົນ, ເພື່ອເປັນການປະກອບສ່ວນໃຫ້ຫຼາຍກວ່າເກົ່າເຂົ້າໃນການຮັກສາສັນຕິພາບແລະສະຖຽນລະພາບຂອງໂລກ.
ທ່ານເວີ້ຍເຟີ້ງເຫີ ເນັ້ນໜັກຕື່ມວ່າ, ໃນໂລກນີ້ມີປະເທດຈີນພຽງໜຶ່ງດຽວເທົ່ານັ້ນ, ໄຕ້ຫວັນເປັນພຽງສ່ວນໜຶ່ງຂອງຈີນທີ່ບໍ່ສາມາດຕັດແຍກອອກບໍ່ໄດ້, ກອງທັບຈີນຈະຮັກສາສິດອະທິປະໄຕ, ຄວາມໝັ້ນຄົງແລະຜືນແຜ່ນດິນອັນຄົບຖ້ວນຂອງຊາດຢ່າງເດັດດ່ຽວ.