ໜັງສືພິມໂລດົງຊີມບູນຂອງ ສປປ ເກົາຫຼີໄດ້ພິມບົດຄວາມສະໜັບສະໜູນມາດຕະການຂອງລັດຖະບານຈີນກ່ຽວກັບການແກ້ໄຂສະພາບການຢູ່ຮົງກົງໃນເມື່ອບໍ່ດົນມານີ້. ຕໍ່ເລື່ອງນີ້, ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 30 ກໍລະກົດນີ້, ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນກ່າວວ່າ, ຈີນຍ້ອງຍໍ ສປປ ເກົາຫຼີ ທີ່ໄດ້ສະແດງທ່າທີທີ່ມີຄວາມຍຸຕິທຳກ່ຽວກັບບັນຫາຮົງກົງ.
ທ່ານນາງຮວ້າຊຸນຢິງ ກ່າວວ່າ, ຈີນກ່າວຢ້ຳຫຼາຍເທື່ອແລ້ວວ່າ, ຮົງກົງແມ່ນສ່ວນໜຶ່ງທີ່ຂຶ້ນກັບປະເທດຈີນເທົ່ານັ້ນ, ລັດຖະບານຈີນເດັດດ່ຽວຄັດຄ້ານອິດທິກຳລັງຕ່າງປະເທດທຸກຮູບແບບທີ່ມີເຈດຕະນາແຊກແຊງວຽກງານພາຍໃນຮົງກົງ. ຈີນມີຄວາມຕັດສິນໃຈແລະຄວາມສາມາດຮັກສາຄວາມໝັ້ນຄົງແລະສະຖຽນລະພາບຂອງຮົງກົງໃຫ້ດີໄດ້.
ໃນເມື່ອບໍ່ດົນມານີ້, ໜັງສືພິມໂລດົງຊີມບູນຂອງ ສປປ ເກົາຫຼີໄດ້ພິມບົດຄວາມຊີ້ໃຫ້ເຫັນວ່າ, ປະເທດ, ອົງການຈັດຕັ້ງແລະບຸກຄົນໃດໆກໍຕາມລ້ວນແຕ່ບໍ່ມີສິດແຊກແຊງວຽກງານພາຍໃນຂອງຮົງກົງ. ບົດຄວາມລະບຸວ່າ, ບໍ່ວ່າແມ່ນໃຜກໍຕາມຄວນເຄົາລົບນັບຖືອະທິປະໄຕຂອງຈີນ, ຢຸດຕິແຊກແຊງວຽກງານພາຍໃນຂອງຮົງກົງດ້ວຍທຸກຮູບການ. ວຽກງານພາຍໃນຮົງກົງແມ່ນວຽກງານພາຍໃນຂອງຈີນ, ການກຳຈັດການແຊກແຊງຂອງອິດທິກຳລັງພາຍນອກ, ຕ້ອງແກ້ໄຂຕາມຈິດໃຈຂອງປະຊາຊົນຈີນເທົ່ານັ້ນ.