ການປຶກສາຫາລືຂັ້ນສູງດ້ານເສດຖະກິດການຄ້າລະຫວ່າງຈີນ-ອາເມຣິກາຮອບທີ 12 ໄດ້ຈັດຂຶ້ນໃນວັນທີ 30 ກໍລະກົດນີ້ຢູ່ນະຄອນຊຽງໄຮ້. ແຕ່ໃນຂະນະດຽວກັນນີ້, ຝ່າຍອາເມຣິກາພັດມີບຸກຄົນໄດ້ປ່ອຍຂ່າວອອກມາວ່າ ນະໂຍບາຍດ່ານພາສີສົ່ງຜົນເຮັດໃຫ້ຈີນຖອຍຫຼັງ, ເຮັດໃຫ້ອາເມຣິກາມີການພັດທະນາເປັນຢ່າງດີ ທັງໃສ່ຮ້າຍປ້າຍສີວ່າ ຈີນໄດ້ປ່ຽນແປງເນື້ອໃນສັນຍາເລື້ອຍໆໃນບາດກ້າວສຸດທ້າຍເພື່ອຜົນປະໂຫຍດຂອງຕົນ. ໃນຂະນະທີ່ຈະຟື້ນຟູການປຶກສາຫາລືກັນຄືນໃໝ່ຫຼັງປະສົບຄວາມຫຼົ້ມເຫຼວມາຫຼາຍເທື່ອ, ຖ້ອຍຄວາມດັ່ງກ່າວຂອງບຸກຄົນຈຳນວນໜຶ່ງຂອງອາເມຣິກາບໍ່ໄດ້ສະແດງໃຫ້ເຫັນເຖິງຄວາມຈິງໃຈອັນຄວນເພື່ອແກ້ໄຂບັນຫາໂດຍຜ່ານການປຶກສາຫາລືກັນ, ໄດ້ຝືນກັບຄວາມຮັບຮູ້ທີ່ເປັນເອກະພາບກັນລະຫວ່າງປະມຸກລັດສອງປະເທດທີ່ໄດ້ຕົກລົງກັນໃນໂອກາດພົບປະກັນຢູ່ໂອຊາກາ ປະເທດຍີ່ປຸ່ນ, ມີເຈຕະນາຢາກສືບຕໍ່ກົດດັນຕໍ່ຈີນເພື່ອຫວັງຈະໄດ້ລາຄາສູງກວ່າເກົ່າໃນການປຶກສາຫາລືກັນລະຫວ່າງສອງຝ່າຍ.
ແຕ່ບຸກຄົນຈຳນວນໜຶ່ງຂອງອາເມຣິກາພັດໃຊ້ມາດຕະການກົດດັນຕໍ່ຈີນແບບເກົ່າໃນໂອກາດທີ່ຈະຟື້ນຟູການປຶກສາຫາລືກັນ ຈະບໍ່ໄດ້ຜົນຕາມຄວາມຫວັງຂອງເຂົາແຕ່ຢ່າງໃດເລີຍ ເຊິ່ງບໍ່ວ່າໃນປັດຈຸບັນ ຫຼືວ່າ ໃນອະນາຄົດກໍຕາມ. ເວົ້າຈາກຄວາມໝາຍໃດໜຶ່ງແລ້ວເຫັນວ່າ ຝ່າຍຈີນກໍຮູ້ສຶກເບື່ອໜ່າຍຫຼາຍແລ້ວຕໍ່ຖ້ອຍຄວາມດັ່ງກ່າວ. ການປະຕິບັດຕົວຈິງໃນປີປາຍຜ່ານມາໄດ້ຢັ້ງຢືນແລ້ວວ່າ ໃນສົງຄາມການຄ້າຈະບໍ່ມີຝ່າຍໃດເປັນຝ່າຍຊະນະເລີຍ, ຈະບໍ່ມີສະພາບທີ່ວ່າ “ເຈົ້າເສຍຂ້ອຍໄດ້” ຫຼື “ເຈົ້າຖອຍຫຼັງຂ້ອຍຄືບໜ້າ”. ໃນ 6 ເດືອນຕົ້ນປີນີ້, ການພັດທະນາຂອງເສດຖະກິດຈີນໄດ້ປະສົບຄວາມກົດດັນເພີ່ມຂຶ້ນ ແຕ່ກໍຍັງມີຄວາມໝັ້ນທ່ຽງໂດຍລວມ ແລະ ມີຄວາມກ້າວໜ້າຕື່ມອີກໃນສະພາບທີ່ມີຄວາມໝັ້ນທ່ຽງ, ດັດຊະນີເສດຖະກິດມະຫາພາກທີ່ສຳຄັນລ້ວນແຕ່ຮັກສາຢູ່ໃນລະດັບທີ່ສົມເຫດສົມຜົນ ເຊິ່ງໄດ້ສະແດງໃຫ້ເຫັນເຖິງການມີຄວາມອົດທົນທີ່ແຂງແຮງ, ເຕັມໄປດ້ວຍຄວາມມີຊີວິດຊີວາ ແລະ ມີກຳລັງບົ່ມຊ້ອນອັນມະຫາສານ.
ອົງການກອງທຶນເງິນຕາສາກົນ ຫຼື IMF ໄດ້ເປີດເຜີຍ “ບົດລາຍງານວິໄສທັດເສດຖະກິດໂລກ” ສະບັບປັບປຸງໃນຫວ່າງມໍ່ໆມານີ້ ໂດຍມີເນື້ອໃນປ່ຽນແປງໃໝ່ ແລະ ຄາດວ່າປີນີ້ເສດຖະກິດອາເມຣິກາຈະເຕີບໂຕ 2,9%, ປີໜ້າຈະຫຼຸດລົງເປັນ 1,9% ເຊິ່ງເປັນລະດັບຫຼຸດລົງຢ່າງຫຼວງຫຼາຍ ສະນັ້ນ, ທຳນຽບຂາວຈຶ່ງໄດ້ສະເໜີຕໍ່ທະນາຄານກາງອາເມຣິກາຫຼາຍເທື່ອວ່າ ຄວນປັບຫຼຸດອັດຕາດອກເບ້ຍໃຫ້ຕ່ຳລົງຢ່າງຫຼວງຫຼາຍ. ແຕ່ບຸກຄົນຈຳນວນໜຶ່ງຂອງອາເມຣິກາພັດບໍ່ຫົວຊາຕໍ່ຄວາມເປັນຈິງ, ຕັ້ງໃຈປ່ອຍຂ່າວເທັດ ທັງໃສ່ຮ້າຍປ້າຍສີຈີນ ໂດຍຫວັງຈະໃຊ້ຄວາມກົດດັນຕໍ່ຈີນ ຂະນະດຽວກັນ, ກໍເປັນການກະທຳທີ່ເຮັດໃຫ້ພາຍໃນປະເທດຕົນໄດ້ຮູ້ໄດ້ເຫັນ ເພື່ອປິດບັງຄວາມກັງວົນຂອງຕົນໃນກໍລະນີທີ່ເສດຖະກິດອາເມຣິກາຕົກຕ່ຳລົງ.
ສຳລັບອາເມຣິກາກ່າວຕຳໜິຕິຕຽນຈີນໄດ້ດັດແກ້ເນື້ອໃນຂອງສັນຍາໃນນາທີສຸດທ້າຍ, ກໍເປັນເລື່ອງທີ່ບໍ່ເຫດຜົນຫຍັງເລີຍ ເຊິ່ງມີຈຸດປະສົງຢາກໃຫ້ຝ່າຍຈີນຮັບຜິດຊອບຕໍ່ສະພາບການເຈລະຈາທີ່ປະສົບຄວາມຫຍຸ້ງຍາກ. ປັດຈຸບັນ, ຈີນແລະອາເມຣິກາຍັງບໍ່ທັນໄດ້ບັນລຸສັນຍາ. ຕະຫຼອດໄລຍະໃນການປຶກສາຫາລືກັນ, ຝ່າຍທີ່ກ່ຽວຂ້ອງສະເໜີຄວາມເຫັນດັດແກ້ຕໍ່ເນື້ອໃນຂອງສັນຍາ ແລະ ການບັນຍາຍທີ່ກ່ຽວຂ້ອງ ເປັນການກະທຳທົ່ວໄປໃນການເຈລະຈາດ້ານການຄ້າ, ອາເມຣິກາເຄີຍໄດ້ມີຄວາມຮຽກຮ້ອງໃຫ້ດັດແກ້ເນື້ອໃນທີ່ກ່ຽວຂ້ອງຫຼາຍເທື່ອແລ້ວໃນການເຈລະຈາສິບກວ່າຮອບທີ່ຜ່ານມາ. ສະນັ້ນ, ອາເມຣິກາເປັນຫຍັງຈິ່ງຕຳໜິຕິຕຽນວ່າຈີນມີຫຼັກໝັ້ນຖອຍຫຼັງໃນການເຈລະຈາ? ທີ່ຈິງແລ້ວ, ແມ່ນຝ່າຍອາເມຣິກາທີ່ລະເມີດຄວາມເຫັນເປັນເອກະພາບກັນ, ເວົ້າປີ້ນໄປປີ້ນມາ, ບໍ່ປະຕິບັດຕາມຄຳໝັ້ນສັນຍາຂອງຕົນ, ຈິ່ງເຮັດໃຫ້ການເຈລະຈາດ້ານເສດຖະກິດການຄ້າຈີນ-ອາເມລິກາປະສົບຄວາມຫຍຸ້ງຍາກຫຼາຍເທື່ອ.
ໃນໄລຍະ 1 ປີຜ່ານມາ, ຈີນແລະອາເມຣິກາທັງໄດ້ເຈລະຈາ ແລະ ໃຊ້ມາດຕະການຫຼາຍເທື່ອກ່ຽວກັບບັນຫາເສດຖະກິດການຄ້າລະຫວ່າງສອງຝ່າຍ, ດຽວນີ້ໄດ້ກັບຄືນສູ່ໂຕະເຈລະຈາຄືນໃໝ່, ນີ້ເປັນເລື່ອງທີ່ໄດ້ມາບໍ່ງ່າຍ. ຖ້າຢາກປະສົບຜົນສຳເລັດໃນການເຈລະຈາ, ສຳຄັນແມ່ນການຕັດສິນຂຶ້ນຢູ່ນຳການຈັດຕັ້ງປະຕິບັດຄວາມເຫັນເປັນເອກະພາບກັນຂອງການພົບປະກັນລະຫວ່າງຜູ້ນຳສອງປະເທດທີ່ໂອຊາກາ, ຍຶດໝັ້ນສະເໝີພາບກັນ ແລະ ເຄົາລົບເຊິ່ງກັນແລະກັນ ພ້ອມທັງພິຈາລະນາເຖິງຄວາມເອົາໃຈໃສ່ທີ່ສົມເຫດສົມຜົນຂອງແຕ່ລະຝ່າຍ, ແຕ່ບໍ່ແມ່ນຝ່າຍໜຶ່ງຝ່າຍດຽວໃຊ້ຄວາມກົດດັນຕໍ່ອີກຝ່າຍໜຶ່ງແລ້ວຈິ່ງເຈລະຈາກັນ, ຈົນໃຊ້ຄວາມກົດດັນໃນລະດັບສູງສຸດ. ຖ້າຢາກບັນລຸສັນຍາສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ຄົນອາເມຣິກາຈຳນວນໜຶ່ງຄວນມີການກະທຳທີ່ສ້າງສັນ ຫາກບໍ່ແມ່ນມີການກະທຳທີ່ກົງກັນຂ້າມ. ຖ້າຢາກໃຊ້ເລ່ຫຼ່ຽມແບບເກົ່າ, ເຮັດແນວນັ້ນ, ມີແຕ່ຈະທຳລາຍການພົວພັນຮ່ວມມືລະຫວ່າງສອງຝ່າຍ ແລະ ພາດໂອກາດປະຫວັດສາດເທົ່ານັ້ນ.