ວັນທີ 31 ກໍລະກົດແລ້ວນີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ພົບປະທ່ານສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວຢູ່ນະຄອນຫຼວງບາງກອກປະເທດໄທ.
ທ່ານວາງຢີ້ກ່າວວ່າ, ຈີນ-ລາວເປັນປະເທດເພື່ອນມິດສັງຄົມນິຍົມທີ່ມີພູຜາແລະແມ່ນ້ຳຕິດຈອດກັນ, ປີນີ້ແມ່ນປີຈີນ-ລາວສ້າງສາຍພົວພັນຄູ່ຮ່ວມມືຍຸດທະສາດຮອບດ້ານຄົບຮອບ 10 ປີ. ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳຈີນ-ລາວ ທີ່ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນແລະທ່ານບຸນຍັງ ວໍລະຈິດ ເລຂາທິການໃຫຍ່ສູນກາງພັກປະຊາຊົນປະຕິວັດລາວ ປະທານປະເທດລາວເຊັນຮ່ວມກັນນັ້ນ ໄດ້ຕັ້ງເປົ້າໝາຍອັນຍິ່ງໃຫຍ່ຕໍ່ ການພັດທະນາຍາວໄກຂອງສາຍພົວພັນລະຫວ່າງສອງປະເທດ, ໄດ້ເປີດຍຸກໃໝ່ໃຫ້ແກ່ສາຍພົວພັນຈີນ-ລາວ. ສອງຝ່າຍຄວນປະຕິບັດແລະຜັນຂະຫຍາຍໃຫ້ດີ, ຊຸກຍູ້ການໄປມາຫາສູ່ກັນແລະການຮ່ວມມືໃນທຸກຂົງເຂດດຳເນີນໄປຢ່າງເລິກເຊິ່ງແລະຕິດແທດຕົວຈິງ. ສອງຝ່າຍຄວນຮັກສາການໄປມາຫາສູ່ກັນລະຫວ່າງການນຳຂັ້ນສູງ, ຊຸກຍູ້ການຮ່ວມມືສອງຝ່າຍໃຫ້ໄດ້ຮັບໝາກຜົນຫຼາຍກວ່າເກົ່າ.
ທ່ານສະເຫຼີມໄຊກ່າວວ່າ, ລາວ-ຈີນໄດ້ເຊັນແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ, ໄດ້ຍົກສາຍພົວພັນສອງຝ່າຍຂຶ້ນສູ່ລະດັບໃໝ່, ໄດ້ສະແດງໃຫ້ເຫັນເຖິງການພົວພັນພິເສດທີ່ສະໜິດສະໜົມຢ່າງບໍ່ມີຊ່ອງຫວ່າງລະຫວ່າງສອງພັກສອງລັດ. ປະເທດລາວຂອບໃຈຈີນທີ່ສະໜັບສະໜູນການພັດທະນາເສດຖະກິດຂອງສປປ ລາວ, ຍິນດີຮ່ວມກັບຈີນລົງເລິກໃນການແລກປ່ຽນບົດຮຽນດ້ານການປົກຄອງແລະບໍລິຫານປະເທດຕື່ມອີກ, ເປີດກວ້າງການຮ່ວມມືໃນທຸກຂົງເຂດ, ປະສານງານຢ່າງໃກ້ຊິດໃນບັນຫາສາກົນແລະພາກພື້ນ.