ທ່ານສີຈິ້ນຜິງພົບປະກັບປະທານາທິບໍດີໂກລົມບີ
ວັນທີ 31 ກໍລະກົດແລ້ວນີ້, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານອິວັນ ດຸກ ປະທານາທິບໍດີໂກລົມບີຢູ່ນະຄອນຫຼວງປັກກິ່ງ ສປ ຈີນ.
ໃນເວລາພົບປະກັນ, ທ່ານສີຈິ້ນຜິງ ກ່າວວ່າ, ປີໜ້າແມ່ນປີສ້າງຕັ້ງສາຍພົວພັນທາງການທູດລະຫວ່າງຈີນກັບໂກລົມບີຄົບຮອບ 40 ປີ, ຈີນຍິນດີທຳຄວາມພະຍາຍາມຮ່ວມກັບໂກລົມບີ, ເປີດກວ້າງການໄປມາຫາສູ່ກັນ, ເພີ່ມຄວາມເຂົ້າໃຈກັນ, ລົງເລິກຄວາມໄວ້ເນື້ອເຊື່ອໃຈກັນແລະເພີ່ມທະວີການຮ່ວມມື, ຊຸກຍູ້ໃຫ້ການພົວພັນລະຫວ່າງສອງປະເທດກ້າວຂຶ້ນສູ່ລະດັບໃໝ່. ທ່ານສີຈິ້ນຜິງ ເນັ້ນໜັກວ່າ, ຈີນແລະໂກລົມບີຄວນເຮັດໃຫ້ການນຳຂັ້ນສູງຂອງສອງປະເທດຕິດຕໍ່ພົວພັນກັນໃກ້ຊິດກວ່າເກົ່າ, ແລະແລກປ່ຽນບົດຮຽນກ່ຽວກັບການປົກຄອງແລະບໍລິຫານປະເທດ, ລົງເລິກຄວາມໄວ້ເນື້ອເຊື່ອໃຈກັນດ້ານການເມືອງ, ເພີ່ມຄວາມເຂົ້າໃຈກັນແລະສະໜັບສະໜູນເຊິ່ງກັນແລະກັນ. ຈີນຈະສືບຕໍ່ສະໜັບສະໜູນໂກລົມບີຊຸກຍູ້ຂະບວນການສັນຕິພາບແລະການສ້າງສາຄືນໃໝ່ຫຼັງເຫດການປະທະກັນ. ຍິນດີຮ່ວມກັບອາເມຣິກາລາຕິນຊຸກຍູ້ການສ້າງກົນໄກເວທີປຶກສາຫາລືຈີນ-ອາເມຣິກາລາຕີນແລະຮ່ວມກັນສ້າງປະຊາຄົມຮ່ວມຊາຕາກຳຈີນ-ອາເມຣິກາລາຕີນ.
ໂອກາດນີ້, ທ່ານດຸກໄດ້ອວຍພອນວັນສະຖາປະນາສາທາລະນະລັດປະຊາຊົນຈີນຄົບຮອບ 70 ປີຢ່າງສຸດໃຈ. ທ່ານກ່າວວ່າ, ເຄົາລົບນັບຖືຄວາມສາມາດຂອງທ່ານສີຈິ້ນຜິງໃນການນຳພາດີເດັ່ນແລະສຳຄັນໃນເວທີອິດທິພົນສາກົນ, ແລະຈະຖອດຖອນບົດຮຽນໃນການຮ່ຳຮຽນບົດຮຽນດຳເນີນການບໍລິຫານປະເທດຂອງຈີນ, ແລະຊຸກຍູ້ໃຫ້ການພົວພັນລະຫວ່າງສອງປະເທດຂະຫຍາຍຕົວຕື່ມອີກໂດຍຜ່ານການຢ້ຽມຢາມຄັ້ງນີ້, ຊຸກຍູ້ການຮ່ວມມືລະຫວ່າງສອງປະເທດໃນຂົງເຂດຕ່າງໆເຊັ່ນ: ເສດຖະກິດການຄ້າ, ພະລັງງານ, ພື້ນຖານໂຄງລ່າງ, ການເຊື່ອມຈອດກັນ, ເສດຖະກິດດີຈີຕອນ, ຂະແໜງການການປະດິດສ້າງໃໝ່ແລະຂົງເຂດອື່ນໆ. ຍິນດີຕ້ອນຮັບວິສາຫະກິດຈີນໄປລົງທຶນຢູ່ໂກລົມບີ. ໂກລົມບີຍິນດີທຳຄວາມພະຍາຍາມຢ່າງຕັ້ງໜ້າເພື່ອຊຸກຍູ້ການພົວພັນລະຫວ່າງອາເມຣິກາລາຕີນກັບຈີນໃຫ້ຂະຫຍາຍຕົວຕື່ມອີກ.
ພາຍຫຼັງສຳເລັດການພົບປະແລ້ວ, ຜູ້ນຳສອງປະເທດໄດ້ເຂົ້າຮ່ວມພິທີລົງນາມຂອງເອກະສານຮ່ວມມືຕ່າງໆຂອງສອງຝ່າຍ.