ເມື່ອບໍ່ດົນມານີ້, ກະຊວງການເງິນອາເມຣິກາໄດ້ຈັດໃຫ້ຈີນເປັນ “ປະເທດຄວບຄຸມອັດຕາແລກປ່ຽນເງິນຕາ” ເຊິ່ງອາເມຣິກາໄດ້ຫຼິ້ນຕຸກຕິກອີກດ້ານໜຶ່ງໃນການສວຍໃຊ້ ສອງມາດຕະຖານໃນການກີດກັ້ນຄູ່ແຂ່ງຂັນ.
ເປັນເວລາດົນນານມາແລ້ວທີ່ອາເມຣິກາໄດ້ອີງອາໄສຖານະເງິນໂດລາສະຫະລັດເຊິ່ງເປັນເງິນຕາສາກົນ, ແລ້ວຖືອັດຕາແລກປ່ຽນເງິນຕາເປັນພາຫະນະໃນການປົກປ້ອງຄວາມເປັນມະຫາອຳນາດຂອງຕົນ. ໃນໄລຍະມໍ່ໆມານີ້, ເນື່ອງຈາກອາເມຣິກາປະຕິບັດນະໂຍບາຍລັດທິຝ່າຍດຽວຕາມລຳພັງໃຈ, ຈິ່ງເຮັດໃຫ້ຄວາມຂັດແຍ້ງດ້ານການຄ້າກັບຈີນຮຸນແຮງຂຶ້ນ, ແລະເຮັດໃຫ້ຕະຫຼາດການທະນາຄານທົ່ວໂລກເກີດຄວາມປັ່ນປ່ວນຫຼາຍຂຶ້ນ, ອັດຕາແລກປ່ຽນເງິນຢວນມີລັກສະນະປັບຕົວໃຫ້ສອດຄ່ອງກັບກົນໄກຕະຫຼາດຫຼາຍຂຶ້ນຕາມຕ່ອງໂສ້ການສະໜອງແລະຄວາມຕ້ອງການຂອງຕະຫຼາດທີ່ເປັນຜູ້ມີບົດບາດຕັດສິນຊີ້ຂາດ, ຈິ່ງເຮັດໃຫ້ຄ່າເງິນເໜັງຕີງຂຶ້ນໆລົງໆໃນລະດັບໃດໜຶ່ງ. ແຕ່ວ່າ, ຄົນຈຳນວນໜຶ່ງໃນອາເມຣິກາພັດລືມໄປແລ້ວວ່າ ຕົນເອງເຄີຍຖືອັດຕາແລກປ່ຽນເງິນຕາເປັນພາຫະນະປົກປ້ອງຄວາມເປັນມະຫາອຳນາດຂອງຕົນແລ້ວປ່ຽນທ່າທີຢ່າງໄວວາໂດຍຕຳໜິຕິຕຽນຢ່າງໄຮ້ເຫດຜົນວ່າ ຈີນໄດ້ຄວບຄຸມອັດຕາແລກປ່ຽນເງິນຕາ, ເຊິ່ງຖ້ອຍຄຳຂອງຄົນເຫຼົ່ານີ້ໄດ້ຂັດກັບການກະທຳຂອງເຂົາເຈົ້າທີ່ເຄີຍໄດ້ປະຕິບັດໃນໄລຍະຜ່ານມາ, ຈິ່ງເປັນເລື່ອງຕະຫຼົກ. ກົງກັນຂ້າມ, ໃນໄລຍະປີປາຍຜ່ານມາ, ຄົນຈຳນວນໜຶ່ງໃນອາເມຣິກາໄດ້ກົດດັນຕໍ່ທະນາຄານກາງອາເມຣິກາໃຫ້ຫຼຸດອັດຕາດອກເບັ້ຍໂດຍມີເຈດຕະນາໃຫ້ອັດຕາແລກປ່ຽນເງິນໂດລາສະຫະລັດອ່ອນຄ່າລົງ. ຍ້ອນໄດ້ຮັບຜົນກະທົບຈາກເລື່ອງນີ້, ໃນກໍລະນີທີ່ເສດຖະກິດອາເມຣິກາໃນປັດຈຸບັນມີເງືອນໄຂບໍ່ພຽງພໍທີ່ຈະປັບຫຼຸດອັດຕາດອກເບັ້ຍຢູ່ແລ້ວ ແຕ່ທະນາຄານກາງອາເມຣິກາຈຳເປັນຕ້ອງປະກາດຫຼຸດອັດຕາດອກເບັ້ຍໃນວັນທີ 31 ກໍລະກົດຜ່ານມາ. ແຕ່ວ່າ ຄົນຈຳນວນໜຶ່ງໃນອາເມຣິກາບໍ່ໄດ້ເອົາຫົວໃສ່ໃຈຊາຕໍ່ບັນຫານີ້, ຍັງສືບຕໍ່ຮຽກຮ້ອງໃຫ້ທະນາຄານກາງຂອງຕົນຫຼຸດອັດຕາດອກເບັ້ຍໃຫ້ຫຼາຍກວ່າເກົ່າແລະໄວກວ່າເກົ່າ. ການກະທຳໃນລັກສະນະນີ້ເປັນການເພີ່ມແຮງກົດດັນທາງການເມືອງຕໍ່ທະນາຄານກາງອາເມຣິກາຢ່າງຈະແຈ້ງ,ນີ້ຈິ່ງແມ່ນການຄວບຄຸມອັດຕາແລກປ່ຽນເງິນຕາຢ່າງແທ້ຈິງ. ອາເມຣິກາເອງຈົງໃຈເຮັດໃຫ້ຄ່າເງິນໂດລາອ່ອນຄ່າລົງ, ແຕ່ພັດໄດ້ຕຳໜິວິຈານຢ່າງຂາດຄວາມຮັບຜິດຊອບຕໍ່ການເໜັງຕີງຂອງເງິນຢວນທີ່ເກີດຂຶ້ນຕາມຕ່ອງໂສ້ການສະໜອງແລະຄວາມຕ້ອງການຂອງຕະຫຼາດ, ເຊິ່ງເປັນການກະທຳໃນລັກສະນະສອງມາດຕະຖານຢ່າງຈະແຈ້ງ.
ຈີນເປັນກຸ່ມເສດຖະກິດໃຫຍ່ອັນດັບ 2 ຂອງໂລກທີ່ມີຄວາມຮັບຜິດຊອບ, ບໍ່ມີຄວາມຈຳເປັນທີ່ຈະໃຊ້ການ “ຄວບຄຸມອັດຕາແລກປ່ຽນເພື່ອໃຫ້ໄດ້ປຽບໃນການແຂ່ງຂັນທີ່ບໍ່ຍຸດຕິທຳ”.
ດ້ານໜຶ່ງ, ຈີນມີຕ່ອງໂສ້ອຸດສາຫະກຳທີ່ຄົບຖ້ວນກວ່າໝູ່ໃນໂລກ, ຕ່ອງໂສ້ການສະໜອງມີທ່າແຮງຢ່າງເດັ່ນຊັດ, ເວົ້າສຳລັບນັກທຸລະກິດນຳເຂົ້າສ່ວນຫຼາຍຂອງອາເມຣິກາແລ້ວ, ຜະລິດຕະພັນຂອງຈີນແມ່ນບໍ່ມີປະເທດໃດສາມາດທົດແທນໄດ້. ໃນ 6 ເດືອນຕົ້ນປີນີ້, ການສົ່ງອອກສິນຄ້າຈີນສູ່ອາເມຣີກາໄດ້ຫຼຸດລົງ 2,6% ເມື່ອທຽບໃສ່ໄລຍະດຽວກັນຂອງປີກາຍ, ການນຳເຂົ້າສິນຄ້າຈາກອາເມຣິກາສູ່ຈີນໄດ້ຫຼຸດລົງ 25,7%, ການນຳເຂົ້າກັບການສົ່ງອອກຫຼຸດລົງຫຼາຍປານນີ້, ສາມາດຢືນຢັນໄດ້ວ່າ ຜະລິດຕະພັນຂອງຈີນບໍ່ມີໃຜສາມາດທົດແທນໄດ້.<br>ອີກດ້ານອື່ນ, ອັນທີ່ກ່າວຫາວ່າຈີນ “ຄວບຄຸມອັດຕາແລກປ່ຽນ” ແມ່ນບໍ່ສອດຄ່ອງກັບສະພາບຄວາມເປັນຈິງຂອງເສດຖະກິດຈີນທີ່ຫັນປ່ຽນຈາກການເຕີບໂຕຢ່າງວ່ອງໄວ ເປັນການພັດທະນາດ້ວຍຄຸນນະພາບສູງ. ຖ້າຫາກວ່າຕັ້ງໃຈຫຼຸດອັດຕາແລກປ່ຽນສະກຸນເງິນຢວນຈີນລົງ, ຈະບໍ່ມີຜົນດີຕໍ່ວິສາຫະກິດຈີນໃນການຍົກລະດັບກໍ່ຄືຄວາມສາມາດໃນການແຂ່ງຂັນດ້ານການຕະຫຼາດ, ຍັງອາດຈະກະທົບເຖິງຄວາມໝັ້ນໃຈຂອງຕະຫຼາດ, ບໍ່ມີຜົນດີຕໍ່ສະຖຽນລະພາບດ້ານການທະນາຄານ.
ສະນັ້ນ, ການຄວບຄຸມເງິນຢວນໃຫ້ອ່ອນຄ່າຢ່າງຫຼວງຫຼາຍແມ່ນບໍ່ສອດຄ່ອງກັບຜົນປະໂຫຍດອັນແທ້ຈິງຂອງຈີນເອງ. ສະພາບພື້ນຖານທີ່ເສດຖະກິດຈີນພັດທະນາດ້ວຍດີມາເປັນເວລາດົນນານ ໄດ້ສະໜອງການຄ້ຳປະກັນອັນແຂງແຮງໃຫ້ແກ່ສະກຸນເງິນຢວນຈີນຮັກສາຄວາມໝັ້ນທ່ຽງໂດຍພື້ນຖານໃນລະດັບດຸນດ່ຽງແລະສົມເຫດສົມຜົນ. ຊາວອາເມຣິກາຈຳນວນໜຶ່ງໃຊ້ 2 ມາດຕະຖານມາໃສ່ຮ້າຍປ້າຍສີຈີນວ່າ “ຄວບຄຸມອັດຕາແລກປ່ຽນ” ແມ່ນໄຮ້ເຫດຜົນແລະມີເຈຕະນາຮ້າຍ, ບໍ່ພຽງແຕ່ບໍ່ສາມາດບັນລຸເຖິງເປົ້າໝາຍໂຈມຕີເສດຖະກິດຈີນຂອງເຂົາເທົ່ານັ້ນ, ຫາກຍັງຈະທຳລາຍຊື່ສຽງຂອງອາເມຣິກາໃນເວທີສາກົນອີກດ້ວຍ. ສະນັ້ນ, ຈຶ່ງຂໍຮຽກຮ້ອງໃຫ້ກຸ່ມຄົນເຫຼົ່ານີ້ຢ່າຫຼີ້ນຕຸກຕິກ 2 ມາດຖານແບບນີ້ອີກ, ຢ່າກະຫຼຳເລິກເດີນຕາມເສັ້ນທາງທີ່ຜິດພາດອີກດ້ວຍ.