ວັນທີ 14 ສິງຫານີ້, ອົງການສະຖິຕິແຫ່ງຊາດຈີນໄດ້ເປີດເຜີຍຕົວເລກຂໍ້ມູນດ້ານເສດຖະກິດໃນ 7 ເດືອນຕົ້ນປີນີ້ໂດຍສະແດງໃຫ້ເຫັນວ່າ:ເສດຖະກິດຈີນຍັງສາມາດຮັກສາໃຫ້ຢູ່ໃນລະດັບທີ່ເໝາະສົມ,ສາມາດຮັກສາທ່ວງທ່າ ແຫ່ງການພັດທະນາຢ່າງໝັ້ນທ່ຽງໄດ້ໂດຍລວມແລະມີຄວາມຄືບໜ້າຢ່າງໝັ້ນທ່ຽງ.
ພາຍໃຕ້ສະພາບການທີ່ອາເມຣິກາເຮັດໃຫ້ຄວາມຂັດແຍ້ງດ້ານການຄ້ານັບມື້ນັບຮຸນແຮງຂຶ້ນແລະຄວາມບໍ່ແນ່ນອນຈາກພາຍນອກກໍເພີ່ມຂຶ້ນ,ແຕ່ເສດຖະກິດຈີນຍັງມີຄວາມສາມາດຕ້ານທານອັນໃຫຍ່ຫຼວງເຊິ່ງໄດ້ສະແດງໃຫ້ເຫັນເຖິງຄວາມສຸຂຸມທຸ່ນທ່ຽງແລະຄວາມເຊື້ອໝັ້ນຕໍ່ພາຍໃນ.
ສິ່ງທີ່ໜ້າສົນໃຈແມ່ນ,ໃນ 7 ເດືອນຕົ້ນປີນີ້, ໂຄງປະກອບເສດຖະກິດຈີນໄດ້ສືບຕໍ່ປັບປຸງໃຫ້ດີຂຶ້ນເປັນກ້າວໆ,ມີຈຸດພົ້ນເດັ່ນນັບມື້ນັບເພີ່ມຂຶ້ນ. ເມື່ອເບິ່ງຈາກໂຄງປະກອບດ້ານອຸດສາຫະກຳແລ້ວ,ຂະແໜງການບໍລິການຍຸກປັດຈຸບັນມີທ່າອ່ຽງເຕີບໂຕໄດ້ເປັນຢ່າງດີ,ການຍົກລະດັບອຸດສາຫະກຳກໍມີທ່າອ່ຽງທີ່ຈະແຈ້ງ,ໂຄງປະກອບດ້ານຄວາມຕ້ອງການໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ. ໃນ 7 ເດືອນຕົ້ນປີນີ້,ການລົງທຶນຕົວຈິງຂອງຕ່າງປະເທດໃນຈີນໄດ້ເພີ່ມຂຶ້ນ 7,3% ເມື່ອທຽບໃສ່ໄລຍະດຽວກັນຂອງປີກາຍ,ໃນນັ້ນ, ການລົງທຶນຕ່າງປະເທດຕົວຈິງໃນພາກອຸດສາຫະກຳເຕັກໂນໂລຊີຂັ້ນສູງໄດ້ເພີ່ມຂຶ້ນ 43,1% ເມື່ອທຽບໃສ່ໄລຍະດຽວກັນຂອງປີກາຍ,ເຊິ່ງສະແດງໃຫ້ເຫັນວ່າຈີນໄດ້ປັບປຸງສະພາບແວດລ້ອມດ້ານການດຳເນີນທຸລະກິດໃຫ້ດີຂຶ້ນຢ່າງບໍ່ຢຸດຢັ້ງ,ເພີ່ມທະວີການປົກປ້ອງຊັບສິນທາງປັນຍາ,ຈີນຍັງແມ່ນຈຸດໝາຍປາຍທາງຂອງການລົງທຶນທີ່ໄດ້ຮັບຄວາມນິຍົມຊົມຊອບຫຼາຍຈາກນັກລົງທຶນຕ່າງປະເທດຢູ່ຄືເກົ່າ.
ເນື່ອງຈາກອາເມຣິກາສ້າງຄວາມຂັດແຍ້ງ ແລະຍົກລະດັບຄວາມຂັດແຍ້ງດ້ານການຄ້າ ເຊິ່ງເປັນການເພີ່ມທະວີຄວາມບໍ່ແນ່ນອນໃຫ້ເສດຖະກິດໂລກ, ສະນັ້ນ, IMF, ທະນາຄານໂລກ ແລະອົງການຈັດຕັ້ງສາກົນອື່ນໆຈຶ່ງປັບຫຼຸດການຄາດຄະເນຈັງຫວະການເຕີບໂຕຂອງເສດຖະກິດໂລກໃນປີ 2019 ແລະ 2020 ລົງ. ປັດຈຸບັນນີ້, ສະພາບການໂລກມີຄວາມສະຫຼັບສັບຊ້ອນ ແລະເຄັ່ງຕຶງກວ່າເກົ່າ, ແຕ່ເສດຖະກິດຈີນຍັງສາມາດຮັກສາທ່ວງທ່າການເຕີບໂຕໄດ້ຢ່າງໝັ້ນທ່ຽງ ເຊິ່ງບໍ່ແມ່ນເລື່ອງງ່າຍດາຍປານໃດ.
ປັດຈຸບັນນີ້, ຈັງຫວະການເຕີບໂຕດ້ານເສດຖະກິດຂອງຈີນຍັງຢູ່ແຖວໜ້າໃນກຸ່ມເສດຖະກິດຕົ້ນຕໍຂອງໂລກ ແລະຍັງເປັນພະລັງຊຸກດັນອັນໃຫຍ່ຫຼວງຕໍ່ການເຕີບໂຕຂອງເສດຖະກິດໂລກ. ເມື່ອບໍ່ດົນມານີ້, ວາລະສານ “ຝໍທຸນ” ຂອງອາເມຣິກາໄດ້ເປີດເຜີຍ 500 ອັນດັບສຸດຍອດວິສາຫະກິດລະດັບໂລກ ໃນນັ້ນມີວິສາຫະກິດຈີນເຖິງ 129 ແຫ່ງ ເຊິ່ງລື່ນກາຍຈຳນວນວິສາຫະກິດຂອງອາເມຣິກາເປັນຄັ້ງທຳອິດ. ຄວາມສາມາດແຂ່ງຂັນໃນລະດັບສາກົນຂອງວິສາຫະກິດຈີນນັບມື້ນັບດີຂຶ້ນ ເຊິ່ງສະທ້ອນໃຫ້ເຫັນເຖິງຜົນສຳເລັດໃນການປະຕິຮູບໂຄງປະກອບດ້ານການສະໜອງຂອງຈີນຢ່າງຈະແຈ້ງ. ບໍ່ວ່າສະພາບການພາຍນອກມີການປ່ຽນແປງໄປໃນທິດທາງໃດກໍຕາມ, ຈີນຈະສືບຕໍ່ຍຶດໝັ້ນລົງເລິກການປະຕິຮູບ, ເປີດກວ້າງການເປີດປະຕູສູ່ພາຍນອກ ແລະເພີ່ມທະວີຄວາມເຂັ້ມແຂງໃນການພັດທະນາຕື່ມອີກ. ການເຕີບໂຕຂອງເສດຖະກິດຈີນຢູ່ທ່າມກາງສິ່ງທ້າທາຍຕ່າງໆ ແຕ່ຍັງຈະມີຄວາມສາມາດເຮັດໃຫ້ບັນດາປະເທດໃນໂລກບັນລຸເປົ້າໝາຍຕ່າງຝ່າຍຕ່າງມີຜົນປະໂຫຍດຮ່ວມກັນໄດ້ຢ່າງແນ່ນອນ.