ຫ້ອງການຖະແຫຼງຂ່າວຄະນະລັດຖະບານຈີນໄດ້ເຜີຍແຜ່ປຶ້ມປົກຂາວ “ວຽກງານສຶກສາອົບຮົມວິຊາຊີບຢູ່ເຂດຊິ່ນຈ່ຽງ” ໃນວັນທີ 16 ສິງຫານີ້.
ປຶ້ມປົກຂາວມີທັງຄຳນຳ, ຄວາມຈຳເປັນໃນການດຳເນີນວຽກງານສຶກສາອົບຮົມ, ດຳເນີນວຽກງານສຶກສາອົບຮົມຕາມກົດໝາຍ, ເນື້ອໃນຂອງການສຶກສາອົບຮົມ, ການປົກປ້ອງສິດທິພື້ນຖານຂອງນັກສຳມະນາກອນທີ່ຜົນໄດ້ຮັບໃນວຽກງານສຶກສາອົບຮົມທີ່ເຫັນເປັນຮູບປະທຳ, ບົດຮຽນທີ່ປະຕິບັດໄດ້ໃນການຄົ້ນຄວ້າການປອດລັດທິຫົວຮຸນແຮງ ແລະ ຜົນສະຫຼຸບ.
ປຶ້ມປົກຂາວລະບຸວ່າ, ເຂດຊິ່ນຈ່ຽງເປັນເຂດສຳຄັນສຳລັບຈີນໃນການຕໍ່ຕ້ານລັດທິກໍ່ການຮ້າຍ ແລະ ການປອດລັດທິຫົວຮຸນແຮງ. ມີຊົ່ວໄລຍະໜຶ່ງ, ເຂດຊິ່ນຈ່ຽງໄດ້ຮັບຜົນກະທົບໜັກໜ່ວງຈາກລັດທິກໍ່ການຮ້າຍແລະລັດທິຫົວຮຸນແຮງທາງສາສະໜາ ເຊິ່ງເປັນໄພຂົ່ມຂູ່ຢ່າງຮ້າຍແຮງຕໍ່ຄວາມປອດໄພດ້ານຊີວິດຂອງປະຊາຊົນ. ປຶ້ມປົກຂາວຊີ້ອອກວ່າ, ພຶດຕິກຳຕົວຈິງຢືນຢັນໄດ້ວ່າ: ຜ່ານຈາກການດຳເນີນວຽກງານສຶກສາອົບຮົມຢູ່ເຂດຊິ່ນຈ່ຽງສາມາດລົບລ້າງພື້ນຖານ ແລະ ເງື່ອນໄຂທີ່ກໍ່ໃຫ້ເກີດລັດທິກໍ່ການຮ້າຍ ແລະ ລັດທິຫົວຮຸນແຮງ, ສາມາດຮັບປະກັນສິດໃນການດຳລົງຊີວິດ, ສິດຮັກສາສຸຂະພາບ ແລະ ສິດພັດທະນາຂອງປະຊາຊົນບັນດາເຜົ່າຢູ່ເຂດຊິ່ນຈ່ຽງໄດ້ເປັນຢ່າງດີ, ບໍ່ພຽງແຕ່ໄດ້ປົກປັກຮັກສາສະຖຽນລະພາບທາງສັງຄົມຂອງເຂດຊິ່ນຈ່ຽງເທົ່ານັ້ນ, ຍັງໄດ້ປົກປັກຮັກສາຄວາມໝັ້ນຄົງແລະສະຖຽນລະພາບຂອງພາກພື້ນເຊັ່ນກັນ.
ປຶ້ມປົກຂາວຍັງລະບຸຕື່ມວ່າ, ເຂດຊິ່ນຈ່ຽງຈະຍຶດໝັ້ນເດີນຕາມສະພາບຄວາມເປັນຈິງຂອງຕົນ, ສືບຕໍ່ຜັນຂະຫຍາຍເນື້ອໃນຈິດໃຈຂອງເອກະສານຕ່າງໆ ເຊັນ: “ຍຸດທະສາດຕ້ານການກໍ່ການຮ້າຍທົ່ວໂລກຂອງ ສປຊ” , “ແຜນການດຳເນີນງານໃນການປ້ອງກັນລັດທິຫົວຮຸນແຮງດ້ວຍກຳລັງ” ແລະ ອື່ນໆ, ຍຶດໝັ້ນໃນຫຼັກການໂດຍຖືເອົາການປາບປາມແລະການປ້ອງກັນປະສານສົມທົບກັນ ແລະ ຖືເອົາການປ້ອງກັນເປັນວຽກງານຕົ້ນຕໍ, ປັບປຸງວຽກງານສຶກສາອົບຮົມໃຫ້ສົມບູນຂຶ້ນຢ່າງບໍ່ຢຸດຢັ້ງ, ສົມທຸກຄວາມພະຍາຍາມຢ່າງບໍ່ລົດລະ ເພື່ອບັນລຸສະຖຽນລະພາບຖາວອນຢູ່ເຂດຊິ່ນຈ່ຽງ.