ຕອນບ່າຍວັນທີ 17 ສິງຫານີ້, ສະຫະພັນປ້ອງກັນຮົງກົງໄດ້ຈັດການໂຮມຊຸມນຸມພາຍໃຕ້ຫົວຂໍ້“ຕໍ່ຕ້ານຄວາມຮຸນແຮງ ແລະຊ່ວຍເຫຼືອຮົງກົງ” ຢູ່ສວນສາທາລະນະຕາມາເອດມິຣາຕີຂອງຮົງກົງ ໂດຍຮຽກຮ້ອງໃຫ້ວົງການຕ່າງໆຂອງຮົງກົງຕໍ່ຕ້ານຄວາມຮຸນແຮງທຸກຮູບແບບ,ເພື່ອຟື້ນຟູຄວາມເປັນລະບຽບຮຽບຮ້ອຍທາງສັງຄົມໂດຍໄວ. ຝ່າຍເຈົ້າພາບໃຫ້ຮູ້ວ່າ: ໃນມື້ດັ່ງກ່າວ ໄດ້ມີ 4 ແສນ 7 ໝື່ນ 6 ພັນຄົນເຂົ້າຮ່ວມການໂຮມຊຸມນຸມດັ່ງກ່າວ.
ໂດຍມີບຸກຄົນທີ່ມີຊື່ສຽງຂອງຮົງກົງຈຳນວນບໍ່ໜ້ອຍຊຶ່ງລວມທັງນັກວິສາຫະກິດຊັບສິນທີ່ດິນ,ສິລະປິນແລະບຸກຄົນວົງການການເມືອງເຂົ້າຮ່ວມອີກດ້ວຍ. ທ່ານ ຊີ່ວຕາຊ່າງ ປະທານກຸ່ມບໍລິສັດການພັດທະນາຕາເວັນອອກໄກກ່າວເນັ້ນວ່າ: ການກະທຳດ້ວຍຄວາມຮຸນແຮງໄດ້ທຳລາຍຄວາມເປັນລະບຽບຂອງຮົງກົງ.
ການໂຮມຊຸມນຸມດັ່ງກ່າວຍັງໄດ້ດຶງດູດບຸກຄົນຊົນຊາດຕ່າງໆທີ່ອາໄສຢູ່ຮົງກົງເຂົ້າຮ່ວມ. ພວກເຂົາເຈົ້າກ່າວວ່າຕົນໄດ້ຮັກຮົງກົງແລະຮັກປະເທດຈີນມາໂດຍຕະຫຼອດ,ບໍ່ສາມາດອົດທົນການໃຊ້ຄວາມຮຸນແຮງໄດ້.
ນອກນີ້,ມີປະຊາຊົນຮົງກົງກ່າວວ່າ:ການບັນລຸເສລີພາບຂອງຕົນບໍ່ສາມາດທຳລາຍຜົນປະໂຫຍດຂອງຄົນອື່ນ,ຄວາມໝັ້ນຄົງແຫ່ງຊາດແລະຄວາມເປັນລະບຽບຮຽບຮ້ອຍທາງສັງຄົມ. ປັດຈຸບັນ,ການປົກຄອງຮົງກົງຕາມກົດໝາຍໄດ້ຖືກກະທົບກະເທືອນຢ່າງໜັກໜ່ວງ,ແຕ່ຂໍພຽງແຕ່ປະຊາຊົນຮົງກົງລ້ວນແຕ່ຕໍ່ຕ້ານຄວາມຮຸນແຮງ,ເຄົາລົບແລະປະຕິບັດຕາມການປົກຄອງຕາມກົດໝາຍ,ເຂດບໍລິຫານພິເສດຮົງກົງຈະສາມາດຟື້ນຟູສະພາບປົກກະຕິໄດ້ຢ່າງແນ່ນອນ.