ວັນທີ 21 ສິງຫານີ້, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເປັນປະທານຈັດກອງປະຊຸມລັດຖະມົນຕີກະຊວງການຕ່າງປະເທດຈີນຍີ່ປຸ່ນແລະສ.ເກົາຫລີຄັ້ງທີ 9 ຢູ່ທີ່ນະຄອນຫຼວງປັກກິ່ງ. ຫຼັງກອງປະຊຸມ, ທ່ານຫວາງຢີ້ໄດ້ຮ່ວມກັບທ່ານນາງຄວງວາຄາງ ລັດຖະມົນຕີກະຊວງການຕ່າງປະເທດສ.ເກົາຫລີແລະທ່ານທາໂຣະ ໂຄໂນ ລັດຖະມົນຕີກະຊວງການຕ່າງປະເທດຍີ່ປຸ່ນຈັດການຖະແຫຼງຂ່າວ.
ທ່ານຫວາງຢີ້ກ່າວວ່າ, ກອງປະຊຸມລັດຖະມົນຕີກະຊວງການຕ່າງປະເທດຈີນຍີ່ປຸ່ນສ.ເກົາຫລີທີ່ຫາກໍ່ສິ້ນສຸດລົງໄປນີ້ໄດ້ຮັບຜົນສຳເລັດຢ່າງຈົບງາມ, ໄດ້ກະກຽມເນື້ອໃນທາງດ້ານການເມືອງຢ່າງຕັ້ງໜ້າໃຫ້ແກ່ກອງປະຊຸມຜູ້ນຳ 3 ປະເທດຄັ້ງທີ 8. ຝ່າຍຈີນລິເລີ່ມໃຫ້ຈັດເອົາປີ 2020 ເປັນປີຮ່ວມມືດ້ານການປະດິດສ້າງໃໝ່ຈີນ,ຍີ່ປຸ່ນ,ສ.ເກົາຫລີ, ແລະໄດ້ຮັບຄວາມເຫັນດີເຫັນພ້ອມຈາກສ.ເກົາຫລີແລະຍີ່ປຸ່ນຢ່າງຕັ້ງໜ້າ. ໃນຖານະທີ່ເປັນປະເທດປະທານກອງປະຊຸມຄັ້ງນີ້, ຈີນຍິນດີສືບຕໍ່ຮັກສາການແລກປ່ຽນຢ່າງໃກ້ຊິດກັບສ.ເກົາຫລີແລະຍີ່ປຸ່ນ, ພ້ອມກັນກະກຽມກອງປະຊຸມຜູ້ນຳ 3 ປະເທດພາຍໃນປີນີ້ໃຫ້ດີ, ເພື່ອຮັບປະກັນໃຫ້ກອງປະຊຸມດັ່ງກ່າວໄດ້ຮັບຜົນສຳເລັດຢ່າງຈົບງາມ.
ທ່ານຫວາງຢີ້ກ່າວວ່າ, ພວກຂ້າພະເຈົ້າເຫັນວ່າ, ຄວນຖືເອົາການຮ່ວມມືລະຫວ່າງຈີນຍີ່ປຸ່ນແລະສ.ເກົາຫລີໃຫ້ເປັນພື້ນຖານຄວາມຈະເລີນຮຸ່ງເຮືອງແລະຄວາມໝັ້ນຄົງຂອງອາຊີຕາເວັນອອກສຽງເໜືອ, ຮ່ວມມືກັນປົກປັກຮັກສາລະບົບການຄ້າເສລີ, ສ້າງເສດຖະກິດໂລກແບບເປີດປະຕູສູ່ພາຍນອກ, ເພີ່ມພະລັງແຮງໃໝ່ເຂົ້າໃນການເຕີບໂຕທາງດ້ານເສດຖະກິດຂອງໂລກ.