ງານວາງສະແດງສິນຄ້າຈີນ-ອາຊີຕາເວັນອອກສຽງເໜືອຄັ້ງທີ 12 ໄດ້ຈັດຂຶ້ນຢູ່ນະຄອນຊາງຊຸ່ນແຂວງຈີລິນໃນວັນທີ 23 ສິງຫານີ້, ທ່ານ ສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງງານດັ່ງກ່າວ.
ໃນສານຊົມເຊີຍຂອງທ່ານ ສີຈິ້ນຜິງ ຊີ້ໃຫ້ເຫັນວ່າ: ອາຊີຕາເວັນອອກສຽງເໜືອ ແມ່ນໜຶ່ງໃນເຂດທີ່ມີພະລັງຊີວິດຫຼາຍທີ່ສຸດໃນການພັດທະນາຂອງໂລກ. ການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນເປັນການເພີ່ມພະລັງແຮງໃໝ່ເຂົ້າໃນການເປີດກວ້າງແລະລົງເລິກການຮ່ວມມືຂອງເຂດດັ່ງກ່າວຢ່າງຕໍ່ເນື່ອງ.
ທ່ານ ສີຈິ້ນຜິງ ເນັ້ນໜັກວ່າ: ປັດຈຸບັນ, ການເພີ່ມທະວີການຮ່ວມມືຢູ່ເຂດອາຊີຕາເວັນອອກສຽງເໜືອ ໄດ້ມີເງື່ອນໄຂທີ່ດີຢ່າງບໍ່ຢຸດຢັ້ງ. ງານວາງສະແດງຄັ້ງນີ້ມີຫົວຂໍ້ວ່າ “ເພີ່ມຄວາມໄວ້ເນື້ອເຊື່ອໃຈກັນແລະຮ່ວມມືກັນ, ສ້າງອະນາຄົດໃໝ່ທີ່ສົດໃສໃຫ້ອາຊີຕາເວັນອອກສຽງເໜືອ” ເຊິ່ງສອດຄ່ອງກັບຄວາມມຸ່ງມາດປາຖະໜາຮ່ວມກັນຂອງບັນດາຝ່າຍຕໍ່ການບັນລຸການພັດທະນາຄວາມຈະເລີນຮຸ່ງເຮືອງຂອງເຂດດັ່ງກ່າວ. ຫວັງວ່າ ຜູ້ຕາງໜ້າລັດຖະບານ, ອົງການຈັດຕັ້ງ ແລະວິສາຫະກິດຂອງບັນດາປະເທດຈະນຳໃຊ້ເວທີດັ່ງກ່າວໄດ້ດີ, ເຕົ້າໂຮມຄວາມເຫັນເປັນເອກະພາບກັນ, ຊຸກຍູ້ການຮ່ວມມືກັນ, ເປີດກວ້າງຜົນປະໂຫຍດ, ເກາະແຂນກັນເພື່ອສ້າງອະນາຄົດໃໝ່ທີ່ສົດໃສໃຫ້ອາຊີຕາເວັນອອກສຽງເໜືອ.