ກອງປະຊຸມເວທີປຶກສາຫາລືຂັ້ນສູງການພັດທະນາ “ໜຶ່ງແລວໜຶ່ງເສັ້ນທາງ” ຄັ້ງທີ 2 ເຊິ່ງແມ່ນສະມາຄົມການຮ່ວມມືດ້ານເສດຖະກິດສາກົນຈີນເປັນເຈົ້າພາບ ໄດ້ຈັດຂຶ້ນໃນວັນທີ 9 ກັນຍານີ້ຢູ່ນະຄອນເຊ້ຍເໝີນ ໂດຍມີເຈົ້າໜ້າທີ່ລັດຖະບານຈີນແລະຕ່າງປະເທດ, ເຈົ້າໜ້າທີ່ອົງການຈັດຕັ້ງສາກົນ, ຜູ້ຕາງໜ້າສະມາຄົມຫຼືສະພາການຄ້າ, ຜູ້ຊ່ຽວຊານ-ນັກວິຊາການ ພ້ອມດ້ວຍນັກທຸລະກິດທັງພາຍໃນແລະຕ່າງປະເທດເຂົ້າຮ່ວມ ເພື່ອປຶກສາຫາລືກັນໂດຍສຸມໃສ່ “ການລົງເລິກການຮ່ວມມືທີ່ແທ້ຈິງ, ຊຸກຍູ້ການພັດທະນາດ້ວຍຄຸນນະພາບສູງ”.
ທ່ານເສີນຈ້ຽນ ອະດີດຮອງລັດຖະມົນຕີກະຊວງການຄ້າຈີນ ກ່າວວ່າ: ໃນສະພາບການທີ່ເສດຖະກິດໂລກຕົກຕ່ຳລົງ, ເສດຖະກິດຂອງປະເທດແລະເຂດແຄວ້ນຕາມ “ໜຶ່ງແລວໜຶ່ງເສັ້ນທາງ” ໂດຍທົ່ວໄປແລ້ວໄດ້ຮັກສາການເຕີບໂຕຢ່າງສູງ ໂດຍສະເພາະໃນຂົງເຂດຕ່າງໆ ເຊັ່ນ: ພື້ນຖານໂຄງລ່າງ, ການຄ້າເອເລັກໂຕຣນິກ, ຂໍ້ມູນຂ່າວສານ-ການສື່ສານ ແລະຂົງເຂດອື່ນໆໄດ້ມີການພັດທະນາຢ່າງວ່ອງໄວ.
ບຸກຄົນທີ່ເຂົ້າຮ່ວມກອງປະຊຸມຫຼາຍທ່ານຕ່າງກໍເຫັນວ່າ: ການສ້າງ “ໜຶ່ງແລວໜຶ່ງເສັ້ນທາງ” ພວມໄດ້ຮັບຄວາມຄືບໜ້າຕາມທິດທາງການພັດທະນາດ້ວຍຄຸນນະພາບສູງ ແລະ ພວມເຂົ້າສູ່ໄລຍະຈັດຕັ້ງປະຕິບັດຢ່າງລະອຽດຮອບຄອບ.