ວັນທີ 24 ກັນຍານີ້, CRI ໄດ້ພິມບົດຄວາມທີ່ມີຫົວຂໍ້ວ່າ “ຈີນໄດ້ສະໜອງພະລັງທີ່ສ້າງສັນໃຫ້ແກ່ການຮັບມືກັບການປ່ຽນແປງຂອງດິນຟ້າອາກາດໂລກຢ່າງຕໍ່ເນື່ອງ”.
ບົດຄວາມລະບຸວ່າ, ໃນກອງປະຊຸມສຸດຍອດກ່ຽວກັບການປະຕິບັດງານເພື່ອຮັບມືກັບການປ່ຽນແປງຂອງດິນຟ້າອາກາດຂອງອົງການສະຫະປະຊາຊາດທີ່ຈັດຂຶ້ນໃນວັນທີ 23 ກັນຍານີ້, ທ່ານຫວາງຢີ້, ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໃນນາມເປັນຜູ້ຕາງໜ້າພິເສດຂອງທ່ານສີຈິ້ນຜິງ ປະທານປະເທດຈີນກ່າວວ່າ: ຈີນຈະຕັ້ງໜ້າປະຕິບັດພັນທະຂອງຕົນໃນ “ສັນຍາຂອບການປ່ຽນແປງຂອງດິນຟ້າອາກາດຂອງອົງການສະຫະປະຊາຊາດ” ແລະ “ສັນຍາປາຣີ”, ຈະບັນລຸເປົ້າໝາຍທີ່ປະເທດຕົນຍື່ນໃຫ້ກອງປະຊຸມນັ້ນຕາມເວລາກຳນົດ. ນີ້ແມ່ນຄຳໝັ້ນສັນຍາຂອງຈີນທີ່ໃຫ້ໄວ້ກ່ຽວກັບການຮັບມືກັບການປ່ຽນແປງຂອງດິນຟ້າອາກາດຢ່າງຈະແຈ້ງໃນເວທີສາກົນອີກຄັ້ງໜຶ່ງ, ເຊິ່ງໄດ້ສະແດງໃຫ້ເຫັນເຖິງຄວາມຕັດສິນໃຈແລະການແບກຫາບພາລະໃນການະທີ່ເປັນປະເທດໃຫຍ່ທີ່ມີຄວາມຮັບຜິດຊອບຢ່າງເຕັມທີ່.
ບົດຄວາມຂຽນວ່າ, ເພື່ອຮັບມືກັບທ່າອ່ຽງທີີ່ອຸນຫະພູມອຸ່ນຂຶ້ນ, ກອງປະຊຸມສຸດຍອດກ່ຽວກັບປະຕິບັດງານເພື່ອຮັບມືກັບການປ່ຽນແປງຂອງດິນຟ້າອາກາດຄັ້ງນີ້ໄດ້ເນັ້ນໃສ່ 9 ຂົງເຂດໃຫຍ່ດ້ານການປະຕິບັດງານ, ລວມທັງກອງທຶນຮັບມືກັບການປ່ຽນແປງຂອງດິນຟ້າອາກາດ, ການປ່ຽນແປງໂຄງປະກອບດ້ານພະລັງງານແລະອື່ນໆ. ກ່ອນຈັດກອງປະຊຸມສຸດຍອດຄັ້ງນີ້, ຈີນໄດ້ປະສານງານໃນ 9 ຂົງເຂດການເຄື່ອນໄຫວຂອງກອງປະຊຸມສຸດຍອດແລະໄດ້ເຜີຍແຜ່ “ກອງປະຊຸມສຸດຍອດກ່ຽວກັບການປະຕິບັດງານເພື່ອຮັບມື້ກັບການປ່ຽນແປງຂອງດິນຟ້າອາກາດຂອງອົງການສະຫະປະຊາຊາດ: ຫຼັກໝັ້ນແລະການກະທຳຂອງຈີນ”, ໂດຍສະແດງອອກຢ່າງຈະແຈ້ງວ່າຈີນຈະປະຕິບັດໃຫ້ເປັນຮູບປະທຳຕາມ “ສັນຍາປາຣີ” ຄືເກົ່າ, ບັນລຸຕາມຄຳໝັ້ນສັນຍາຂອງຕົນຢ່າງຮອບດ້ານ.
ໃນກອງປະຊຸມສຸດຍອດຄັ້ງນີ້, ຈີນຍັງໄດ້ເປັນປະເທດນຳພາຮ່ວມໃນຂົງເຂດ “ແຜນການແກ້ໄຂທີ່ເປັນທຳມະຊາດ”, ຕັ້ງໜ້າຊຸກຍູ້ໃຫ້ຝ່າຍຕ່າງໆຮັບມືກັບຄວາມສ່ຽງດ້ານດິນຟ້າອາກາດດ້ວຍກຳລັງທຳມະຊາດ ເຊິ່ງໄດ້ຮັບຄວາມຍ້ອງຍໍຊົມເຊີຍຈາກຝ່າຍຕ່າງໆ. ທ່ານກູເຕີເຣສ ເລຂາທິການໃຫຍ່ອົງການ ສປຊ ຕີລາຄາວ່າ, ຈີນໄດ້ເສີມຂະຫຍາຍບົດບາດນຳພາທີ່ສຳຄັນທີ່ສຸດໃນດ້ານການເຄື່ອນໄຫວກ່ຽວກັບດິນຟ້າອາກາດ.
ບົດຄວາມໄດ້ລະບຸວ່າ, ປັດຈຸບັນ, ການປັບປຸງສະພາບດິນຟ້າອາກາດທົ່ວໂລກໄດ້ກ້າວເຂົ້າສູ່ໄລຍະສຳຄັນ. ຫຼັກການທີ່ວ່າ, ປະເທດທີ່ພັດທະນາແລ້ວກັບປະເທດພວມພັດທະນາ “ມີຄວາມຮັບຜິດຊອບອັນດຽວກັນແຕ່ມີພັນທະທີ່ແຕກຕ່າງກັນ” ບໍ່ພຽງແຕ່ບໍ່ຫຼ້າສະໄໝ, ຫາກຍັງຄວນໄດ້ຮັບການຈັດຕັ້ງປະຕິບັດຢ່າງແທ້ຈິງ. ຕະຫຼອດຂະບວນການຫຼາຍຝ່າຍດັ່ງກ່າວ, ຈີນທີ່ໄດ້ຍຶດໝັ້ນການພັດທະນາແບບສີຂຽວ ແລະ ສ້າງສາລະບົບນິເວດນັ້ນ ຈະເປັນ “ພະລັງທີ່ສ້າງສັນ” ທີ່ຊຸກຍູ້ຂະບວນການດັ່ງກ່າວຢ່າງຕໍ່ເນື່ອງ.