ຫ້ອງການຖະແຫຼງຂ່າວຂອງລັດຖະບານຈີນອອກປື້ມປົກຂາວເລື່ອງ “ຈີນແລະໂລກໃນຍຸກໃໝ່”
ຕາມຂ່າວ CMG: ເນື່ອງໃນໂອກາດວັນສະຖາປະນາ ສາທາລະນະລັດປະຊາຊົນຈີນຄົບຮອບ 70 ປີ, ວັນທີ 27 ກັນຍານີ້ ຫ້ອງການຖະແຫຼງຂ່າວຂອງລັດຖະບານຈີນໄດ້ອອກປື້ມປົກຂາວທີ່ພາດຫົວເລື່ອງ “ຈີນແລະໂລກໃນຍຸກໃໝ່” ເຊິ່ງທ່ານຊີຫຼິງ ຮອງຫົວໜ້າຄະນະໂຄສະນາອົບຮົບສູນກາງພັກກອມມູນິດຈີນ ຫົວໜ້າຫ້ອງການຖະແຫຼງຂ່າວຂອງລັດຖະບານຈີນໄດ້ແນະນຳໃຫ້ຮູ້ວ່າ, ປື້ມປົກຂາວດັ່ງກ່າວໄດ້ແນແນຳບັນຫາຕ່າງໆເຊັ່ນ: “ຈີນມາຈາກໃສ, ຈີນຈະເດີນໄປໃນທິດທາງໃດ” “ຈີນຈະຊຸກຍູ້ການສ້າງໂລກແບບໃດ” “ຈີນທີ່ກຳລັງພັດທະນາຢູ່ດຽວນີ້ຈະຢູ່ກັບໂລກແນວໃດ”ແລະບັນຫາຕ່າງໆ, ນອກນີ້ ຍັງແນະນຳໃຫ້ເຫັນເຖິງຜົນສຳເລັດໃນການພນດທະນາ, ເສັ້ນທາງການພັດທະນາ ແລະທິດທາງການການພັດທະນາຂອງຈີນ, ໄດ້ລົງເລິກຄົ້ນຄວ້າແລະຊີ້ແຈງການພົວພັນລະຫວ່າງຈີນກັບໂລກ, ເພື່ອໃຫ້ປະຊາຄົມໂລກເພີ່ມຄວາມເຂົ້າໃຈຕໍ່ການພັດທະນາຂອງຈີນ.
ປື້ມປົກຂາວຊີ້ອອກວ່າ, ຕະຫຼອດໄລຍະ 70 ປີຜ່ານມາ, ພາຍໃຕ້ການນຳພາຂອງພັກກອມມູນິດຈີນ, ສປ ຈີນມີການປ່ຽນແປງຢ່າງໃຫຍ່ຫຼວງ, ເຊິ່ງໄດ້ກາຍເປັນສິ່ງມະຫັດສະຈັນແຫ່ງການພັດທະນາທີ່ບໍ່ເຄີຍມີມາກ່ອນໃນປະຫວັດສາດຂອງມວນມະນຸດ, ໂດຍສະເພາະແມ່ນນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ການພັດທະນາຂອງຈີນໄດ້ບັນລຸໝາກຜົນຄັ້ງປະຫວັດສາດ ແລະມີການປ່ຽນແປງຄັ້ງປະຫວັດສາດ. ຈີນໄດ້ສົ່ງຜົນດີໃຫ້ທົ່ວໂລກຢ່າງຮອບດ້ານ, ເລິກເຊິ່ງແລະຍາວໄກ ທີ່ບໍ່ເຄີຍມີມາກ່ອນ; ໂລກກໍ່ໄດ້ໃຫ້ຄວາມສົນໃຈຕໍ່ຈີນຢ່າງກວ້າງຂວາງແລະເລິກເຊິ່ງທີ່ສຸດທີ່ບໍ່ເຄີຍມີມາກ່ອນເຊັ່ນກັນ.
ປື້ມປົກຂາວຍັງໄດ້ຍົກເອົາຕົວເລກສະຖິຕິແລະເລື່ອງຄວາມເປັນຈິງຈຳນວນຫຼວງຫຼາຍ ເພື່ອແນະນຳໝາກຜົນອັນມະຫາສານ, ຄວາມໝາຍທີ່ຍິ່ງໃຫຍ່ແລະຜົນດີທີ່ມີຕໍ່ໂລກໃນການພັດທະນາຂອງຈີນຕະຫຼອດໄລຍະ 70 ປີຜ່ານມາ ໂດຍຊີ້ອອກວ່າ, ຈີນໄດ້ໃຊ້ເວລາຫຼາຍສິບປີກໍ່ສາມາດປະສົບຜົນສຳເລັດໃນຂະບວນການພັດທະນາ ສ່ວນບັນດາປະເທດທີ່ພັດທະນາແລ້ວນັ້ນຕ້ອງໃຊ້ເວລາຫຼາຍຮ້ອຍປີຈິ່ງປະສົບຜົນສຳເລັດໄດ້, ເຊິ່ງເຮັດໃຫ້ຂະໜາດເສດຖະກິດຂອງຕົນເປັນອັນດັບ 2 ຂອງໂລກ, ປະຊາຊົນເກືອບ 1 ຕື້ 400 ລ້ານຄົນໄດ້ຫຼຸດພົ້ນອອກຈາກຄວາມຂາດເຂີນທາງດ້ານວັດຖຸສິ່ງຂອງ, ແລະກ້າວເຖິງລະດັບທີ່ມີຊີວິດອີ່ມໜຳສຳລານໂດຍລວມ, ມີກຽດສັກສີແລະສິດທິຢ່າງເຕັມປ່ຽມທີ່ບໍ່ເຄີຍມີມາກ່ອນ. ປື້ມປົກຂາວເນັ້ນວ່າ, ຕະຫຼອດໄລຍະ 70 ປີມານີ້, ປະຊາຊົນຈີນໄດ້ລົງມືດຳເນີນການກໍ່ສ້າງດ້ວຍຕົນເອງ, ເປັນເຈົ້າຕົນເອງໃນການສູ້ຊົນຜ່ານຜ່າ, ອັນໄດ້ສ້າງສະຖະນະພາບໃໝ່; ຕະຫຼອດໄລຍະ 70 ປີມານີ້, ຈີນພັດທະນາທ່າມກາງການຮ່ວມມືກັບໂລກ, ມຸ່ງໜ້າໄປສູ່ໂລກ, ຮ່ຳຮຽນນຳໂລກແລະມີສ່ວນປະກອບຕໍ່ໂລກ; ຕະຫຼອດໄລຍະ 70 ປີ, ໄປພ້ອມກັບການບັນລຸການພັດທະນາດ້ວຍຕົນເອງ, ຈີນຍັງໄດ້ປະກອບສ່ວນສ້າງສັນຕິພາບໂລກ, ແລະເພີ່ມພະລັງແຮງໃຫ້ແກ່ປະເທດຕ່າງໆໃນການພັດທະນາຮ່ວມກັນ..
ປື້ມປົກຂາວຊີ້ອອກວ່າ, ຈີນໄດ້ຮັບຜົນສຳເລັດໃນໄລຍະ 70 ປີມານີ້ ສາເຫດຕົ້ນຕໍແມ່ນຍ້ອນພາຍໃຕ້ການນຳພາຂອງພັກກອມມູນິດຈີນ ເຮັດໃຫ້ປະຊາຊົນຊອກເຫັນເສັ້ນທາງສັງຄົມນິຍົມທີ່ມີສີສັນພິເສດຂອງຈີນທີ່ຖືເປັນເສັ້ນທາງທີ່ຖືກຕ້ອງ, ແລະໄດ້ກ້າວເດີນໄປຕາມເສັ້ນທາງນີ້ຢ່າງໜັກແໜ້ນ. ປື້ື້ມປົກຂາວກ່າວເນັ້ນວ່າ, ເສັ້ນທາງສັງຄົມນິຍົມທີ່ມີສີສັນພິເສດຂອງຈີນແມ່ນເສັ້ນທາງທີ່ຖືກຕ້ອງທີ່ເລີ່ມຈາກສະພາບຄວາມເປັນຈິງແຫ່ງຊາດຂອງຈີນ, ແມ່ນເສັ້ນທາງທີ່ເອົາຜົນປະໂຫຍດຂອງປະຊາຊົນໄວ້ຢູ່ຖານະອັນດັບທີ 1, ແມ່ນເສັ້ນທາງທີ່ມີການປະຕິຮູບແລະປະດິດສ້າງໃໝ່, ແມ່ນເສັ້ນທາງທີ່ສະແຫວງຫາການພັດທະນາຮ່ວມກັນ ທ່າມກາງການເປີດປະຕູສູ່ພາຍນອກ, ແມ່ນເສັ້ນທາງທີ່ປົກຄອງປະເທດຕາມກົດໝາຍຢ່າງຮອບດ້ານ. ເສັ້ນທາງພັດທະນາຂອງຈີນເສັ້ນນີ້ ສອດຄ່ອງກັບສະພາບຄວາມເປັນຈິງແຫ່ງຊາດຈີນ, ສອດຄ່ອງກັບຄວາມຕ້ອງການຂອງຍຸກສະໄໝ, ແລະນັບມື້ນັບຈະສະແດງໃຫ້ເຫັນອະນາຄົດອັນສະຫວ່າງສະໄຫວໂດຍກ້າວເດີນໄປໜ້າຄຽງຄູ່ກັບຍຸກສະໄໝ.
ກ່ຽວກັບບັນຫາທີ່ປະຊາຄົມໂລກໃຫ້ຄວາມສົນໃຈຕໍ່ການພັດທະນາຂອງຈີນ, ປື້ມປົກຂາວກ່າວເນັ້ນວ່າ, ການບັນລຸໃຫ້ປະເທດມີຄວາມຮັ່ງມີເຂັ້ມແຂງ, ປະຊາຊາດມີຄວາມຈະເລີນ, ປະຊາຊົນຢູ່ເຢັນເປັນສຸກ, ແມ່ນຄວາມໄຝ່ຝັນຂອງປະຊາຊົນຈີນ ທັງແມ່ນຄວາມໄຝ່ຝັນຂອງປະຊາຊົນປະເທດຕ່າງໆອີກດ້ວຍ. ການພັດທະນາຂອງຈີນຖືເປັນໂອກາດຂອງໂລກ, ຫາກບໍ່ແມ່ນເປັນການຂົ່ມຂູ່ແລະທ້າທາຍ. ປື້ມປົກຂາວຊີ້ອອກວ່າ, ຈີນແມ່ນປັດໄຈທີ່ເຮັດໃຫ້ເສດຖະກິດໂລກມີການເຕີບໂຕຢ່າງໝັ້ນທ່ຽງແລະຕໍ່ເນື່ອງ, ເຊິ່ງການເປີດປະຕູສູ່ພາຍນອກຢ່າງຮອບດ້ານຂອງຈີນໄດ້ສ້າງກາລະໂອກາດຢ່າງໃຫຍ່ຫຼວງໃຫ້ແກ່ປະເທດຕ່າງໆ, ຈີນໄດ້ສະໜອງການຊ່ວຍເຫຼືອຫຼາຍກວ່າເກົ່າໃຫ້ແກ່ປະຊາຄົມໂລກ, ການພັດທະນາຂອຈີນກໍ່ເປັນບົດຮຽນໃຫ້ແກ່ປະເທດທີ່ພວມພັດທະນາອື່ນໆ, ຈີນເດັດຂາດຈະບໍ່ເປັນປະເທດມະຫາອຳນາດເມື່ອປະເທດພັດທະນາເຂັ້ມແຂງຂຶ້ນ.
ກ່ຽວກັບຄຳຖາມແຫ່ງຍຸກສະໄໝທີ່ວ່າ “ໂລກຈະເດີນໄປໃນທິດທາງໃດ, ມະນຸດຈະເປັນແນວໃດ”, ປື້ມປົກຂາວຊີ້ອອກວ່າ, ໂລກສູ່ມື້ນີ້ກຳລັງຢູ່ໃນການປ່ຽນແປງຢ່າງໃຫຍ່ທີ່ບໍ່ເຄີຍມີມາກ່ອນໃນຮອບຮ້ອຍປີ, ສັງຄົມມະນຸດເຕັມໄປດ້ວຍ ຄວາມຫວັງ ແລະ ສິ່ງທ້າທາຍ. ຈີນໄດ້ສະເໜີການສ້າງປະຊາຄົມຮ່ວມຊາຕາກຳມວນມະນຸດ ກໍ່ເປັນການເປີດເສັ້ນທາງໃໝ່ແຫ່ງການພັດທະນາແບບຮ່ວມມືກັນທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ແລະຊົມໃຊ້ຜົນປະໂຫຍດຮ່ວມກັນ, ແລະເປັນການເລືອກເຟັ້ນເອົາເສັ້ນທາງໃໝ່ແຫ່ງການພັດທະນາຂອງມວນມະນຸດ. ປື້ມປົກຂາວຍັງຮຽກຮ້ອງໃຫ້ປະເທດຕ່າງໆຈົ່ງສາມັກຄີກັນເຂົ້າ, ສ້າງການພົວພັນສາກົນແບບໃໝ່, ຊຸກຍູ້ໃຫ້ເສດຖະກິດແບບໃໝ່ຫັນເປັນໂລກາພິວັດ, ປົກປັກຮັກສາລະບົບການສາກົນທີ່ຖືອົງການສະຫະປະຊາຊາດເປັນແກນກາງ, ຊຸກຍູ້ໃຫ້ອາລະຍະທຳຕ່າງໆດຳເນີນການແລກປ່ຽນກັນແລະຖອດຖອນບົດຮຽນເຊິ່ງກັນແລະກັນ, ຮ່ວມກັນຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ສ້າງໂລກທີ່ດີງາມຫຼາຍກວ່າເກົ່າ.
ຄຽງຄູ່ກັບການພັດທະນາຂອງຈີນ, ປະຊາຄົມໂລກໄດ້ໃຫ້ຄວາມສົນໃຈຢ່າງກວ້າງຂວາງຕໍ່ກັບວ່າຈີນທີ່ກຳລັງພັດທະນານັ້ນຈະຢູ່ຮ່ວມກັບໂລກແນວໃດ, ປຶ້ມປົກຂາວຊີ້ອອກວ່າ, ການພັດທະນາຂອງຈີນປາສະຈາກໂລກບໍ່ໄດ້, ການພັດທະນາໂດຍສັນຕິ, ຄວາມຈະເລີນຮຸ່ງເຮືອງແລະສະຖຽນລະພາບຂອງໂລກກໍ່ປາສະຈາກຈີນບໍ່ໄດ້ເຊັ່ນກັນ. ຈີນໄດ້ຍຶດໝັ້ນການພັດທະນາຕົນເອງປະສານສົມທົບກັບການພັດທະນາຂອງປະຊາຄົມໂລກ, ຍຶດໝັ້ນການຮ່ວມມືກັນ ໄດ້ຮັບຜົນປະໂຫຍດນຳກັນ, ການພັດທະນາຮ່ວມກັນ, ຍຶດໝັ້ນການປົກປັກຮັກສາແລະຊຸກຍູ້ເສດຖະກິດໂລກາພິວັດ, ຕັ້ງໜ້າຂະຫຍາຍການພົວພັນຄູ່ຮ່ວມໃນຂອບເຂດທົ່ວໂລກ, ຍຶດໝັ່ນການສະໜັບສະໜູນລັດທິຫຼາຍຝ່າຍ, ປົກປັກຮັກສາຄວາມເປັນທຳແລະຍຸດຕິທຳຂອງສາກົນ, ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໃຫ້ມີຄຸນນະພາບສູງ, ຕັ້ງໜ້າເຂົ້າຮ່ວມ ແລະນຳພາການປະຕິຮູບແລະສ້າງລະບຽຍການບໍລິຫານໂລກ, ຈີນຈະເປັນຜູ້ເສີມສ້າງສັນຕິພາບຂອງໂລກ, ເປັນຜູ້ປະກອບສ່ວນໃນການພັດທະນາທົ່ວໂລກ, ແລະເປັນຜູ້ປົກປັກຮັກສາລະບຽບການສາກົນຢ່າງສະເໝີຕົ້ນສະເໝີປາຍ.
ປັດຈຸບັນ ການພັດທະນາຂອງຈີນໄດ້ເຂົ້າສູ່ຍຸກໃໝ່. ປື້ມປົກຂ່າວຊີ້ອອກວ່າ, ຈີນໃນຍຸກໃໝ່ ຄວາມັດສິນໃຈໃນການເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນຈະບໍ່ມີການປ່ຽນແປງ, ຄວາມຕັດສິນໃຈໃນການຮ່ວມກັບປະເທດຕ່າງໆໃນໂລກດ້ວຍຮ່ຳຮຽນແລະຖອດຖອນບົດດຮຽນເຊິ່ງກັນແລະກັນ, ຮ່ວມມືກັນແລະໄດ້ຮັບຜົນປະໂຫຍດຮ່ວມກັນກໍຈະບໍ່ປ່ຽນແປງ, ຄວາມຕັດສິນໃຈຮ່ວມມືກັໂລກເພື່ອພ້ອມກັນກ້າວເດີນໄປໜ້າຈະບໍ່ມີການປ່ຽນແປງ. ຈີນໃນອະນາຄົດ, ຈະຍຶດໝັ້ນການເປີດປະຕູສູ່ພາຍນອກດ້ວຍຈິດໃຈໂອບອ້ອມອາລີຫຼາຍກວ່າເກົ່າ, ເພື່ອແລກປ່ຽນກັບໂລກໃຫ້ໄດ້ດີກວ່າເກົ່າ, ແລະນຳເອົາຄວາມກ້າວໜ້າແລະຄວາມຈະເລີນຮຸ່ງເຮືອງຍິ່ງກວ່າເກົ່າມາໃຫ້ຈີນແລະໂລກອີກດ້ວຍ.
ສຸດທ້າຍ ປຶ້ມປົກຂ່າວຊີ້ອອກວ່າ, ໃນໂລກສູ່ມື້ນີ້, ຊາຕາກຳແລະອະນາຄົດຂອງປະເທດຕ່າງໆໄດ້ຕິດພັນກັນຢ່າງແໜ້ນແຟ້ນທີ່ສຸດທີ່ບໍ່ເຄີຍມີມາກ່ອນ. ແຕ່ລະປະເທດລ້ວນແຕ່ມີການພົວພັນຢ່າງໃກ້ຊິດກັບອະນາຄົດຂອງໂລກ, ຂໍແຕ່ວ່າມີເປົ້າໝາຍທີ່ເປັນເອກະພາບ, ສາມັກຄີປ້ອງດອງກັນ, ຊົມໃຊ້ໂອກາດຮ່ວມກັນ, ຮັບມືກັບສິ່ງທ້າທາຍຮ່ວມກັນ, ກໍຈະສາມາດສ້າງປະຊາຄົມຮ່ວມຊາຕາກຳຂອງມວນມະນຸດຂຶ້ນມາໄດ້ແນ່ນອນ, ແລະສ້າງໂລກທີ່ດີງາມກວ່າເກົ່າ, ກ້າວເດີນໄປສູ່ອະນາຄົດທີ່ສະຫວ່າງສະໄຫວກວ່າເກົ່າ.