ທ່ານສີຈິ້ນຜິງປະກາດວ່າ: ສະໜາມບິນສາກົນຕ້າຊິ່ງປັກກິ່ງໄດ້ເປີດບໍລິການຢ່າງເປັນທາງການແລ້ວ
ພິທີເປີດການບໍລິການຂອງສະໜາມບິນສາກົນຕ້າຊິ່ງປັກກິ່ງໄດ້ຈັດຂຶ້ນໃນຕອນເຊົ້າວັນທີ 25 ກັນຍານີ້. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ເຂົ້າຮ່ວມພິທີ ແລະປະກາດວ່າ: “ສະໜາມບິນສາກົນຕ້າຊິ່ງປັກກິ່ງໄດ້ເປີດບໍລິການຢ່າງເປັນທາງການແລ້ວ.”
ສະໜາມບິນດັ່ງກ່າວກັບສະໜາມບິນສາກົນນະຄອນຫຼວງປັກກິ່ງແມ່ນສູນກາງການຄົມມະນາຄົມທາງອາກາດ 2 ແຫ່ງທີ່ຈະສຸມກຳລັງໃສ່ໃນການສ້າງລະບົບຂົນສົ່ງທີ່ດຳເນີນໄປຢ່າງສະດວກແລະຈັດຕັ້ງປະຕິບັດຢ່າງມີປະສິດທິພາບສູງ ແລະຈະສ້າງເປັນສູນກາງການຄົມມະນາຄົມທາງອາກາດສາກົນທີ່ທັນສະໄໝທີ່ເຊື່ອມຕໍ່ກັບທົ່ວໂລກ. ໃນອະນາຄົດ, ສະໜາມບິນສາກົນຕ້າຊິ່ງປັກກິ່ງຍັງຈະກາຍເປັນແບບຢ່າງໃໝ່ໃນການສ້າງສາແລະດຳເນີນງານຂອງສູນກາງຄົມມະນາຄົມທາງອາກາດສາກົນ ແລະເປັນພະລັງແຮງໃໝ່ໃນການຊຸກຍູ້ໃຫ້ນະຄອນຫຼວງປັກກິ່ງ, ນະຄອນທ່ຽນສິນແລະແຂວງເຮີເປີຍພັດທະນາໄປພ້ອມກັນ.
ສະໜາມບິນສາກົນຕ້າຊິ່ງປັກກິ່ງສ້າງຕັ້ງຢູ່ລະຫວ່າງເມືອງຕ້າຊິ່ງນະຄອນຫຼວງປັກກິ່ງແລະເມືອງລາງຟາງແຂວງເຮີເປີຍດ້ວຍມູນຄ່າການລົງທຶນກໍ່ສ້າງທັງໝົດ 450 ຕື້ ຢວນ, ມີຖ້ຽວບິນໄປເຖິງຈຸດໝາຍປາຍທາງໃນຂອບເຂດທົ່ວໂລກ 112 ແຫ່ງ, ຄາດວ່າຈະຮອງຮັບຜູ້ໂດຍສານໄດ້ 100 ລ້ານເທື່ອຄົນຕໍ່ປີ, ຈຳນວນເຮືອບິນຂຶ້ນລົງຈະມີເຖິງ 8 ແສນຖ້ຽວ.
ຂ່າວແຈ້ງວ່າ, ນັບມາຮອດປັດຈຸບັນ, ມີບໍລິສັດການບິນຈີນ 7 ແຫ່ງ ແລະ ບໍລິສັດການບິນຕ່າງປະເທດ 8 ແຫ່ງໄດ້ຕົກລົງເຂົ້າປະຈຳຢູ່ສະໜາມບິນສາກົນຕ້າຊິ່ງປັກກິ່ງໃນທ້າຍປີ 2019 ນີ້.
ວັນທີ 25 ກັນຍານີ້ ພິທີເປີດນຳໃຊ້ສະໜາມບິນຕ້າຊິງສາກົນປັກກິ່ງຈັດຂຶ້ນຢູ່ປັກກິ່ງ. ທ່ານສີຈິນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດ ປະທານຄະນະກຳມະການການທະຫານສູນກາງຈີນໄດ້ເຂົ້າຮ່ວມພິທີ ແລະປະກາດເປີດນຳໃຊ້ສະໜາມບິນຢ່າງເປັນທາງການ ແລະຢ້ຽມຢາມຢູ່ໃນຫ້ອງຖ້າຍົນ.