ຕາມຂ່າວCRI：ໂດຍຕອບສະໜອງຕາມຄຳເຊື້ອເຊີນຂອງທ່ານນາເຣນດຣາ ໂມດີ, ນາຍົກລັດຖະມົນຕີອິນເດຍແລະທ່ານນາງວິດຢາ ເດວີ ບານດາຣີ, ປະທານາທິບໍດີເນປານ, ທ່ານສີຈິ້ນຜີງ, ປະທານປະເທດຈີນຈະເດີນທາງໄປອິນເດຍເພື່ອເຂົ້າຮ່ວມການພົບປະຢ່າງບໍ່ເປັນທາງການຄັ້ງທີ 2 ລະຫວ່າງຜູ້ນຳຈີນແລະອິນເດຍ, ແລະເດີນທາງຢ້ຽມຢາມເນປານທາງລັດຖະກິດແຕ່ວັນທີ 11 ຫາວັນທີ 13 ຕຸລານີ້. ໃນຕອນບ່າຍວັນທີ 9 ຕຸລານີ້, ກະຊວງການຕ່າງປະເທດໄດ້ຈັດງານຖະແຫຼງຂ່າວຕໍ່ສື່ມວນຊົນຈີນແລະຕ່າງປະເທດກ່ຽວກັບເລື່ອງດັ່ງກ່າວຢູ່ນະຄອນຫຼວງປັກກິ່ງ, ທ່ານໂຫຼຈ້າວຫຸຍ, ຮອງລັດຖະມົນຕີກະຊວງການຕ່າງປະເທດຈີນກ່າວວ່າ, ການເດີນທາງໄປຢ້ຽມຢາມຄັ້ງນີ້ຈະເປັນການເພີ່ມພະລັງແຮງໃໝ່, ພະລັງຊີວິດໃໝ່ເຂົ້າໃນການພັດທະນາສາຍພົວພັນລະຫວ່າງຈີນ-ອິນເດຍ, ຈີນກັບເນປານແລະຈີນກັບບັນດາປະເທດອາຊີໃຕ້, ຫາຊ່ອງທາງໃໝ່ເພື່ອເພີ່ມທະວີການຕິດຕໍ່ແລະການເຊື່ອມໂຍງກັນໃນພາກພື້ນແລະການຮ່ວມມືຕົວຈິງດ້ານເສດຖະກິດການຄ້າ, ສ້າງເວທີໃໝ່ເພື່ອເພີ່ມຄວາມໄວ້ເນື້ອເຊື່ອໃຈກັນແລະສົ່ງເສີມມິດຕະພາບລະຫວ່າງປະຊາຊົນໃນພາກພື້ນ, ຈະປະກອບສ່ວນຄັ້ງໃໝ່ເຂົ້າໃນການສ້າງສັນຕິພາບແລະຄວາມຈະເລີນຮຸ່ງເຮືອງຂອງພາກພື້ນກໍຄືຂອງໂລກ.
ທ່ານໂຫຼຈ້າວຫຸຍກ່າວວ່າ, ການພັດທະນາດ້ວຍການຊີ້ນຳນຳພາຂອງຂັ້ນສູງແມ່ນລັກສະນະພິເສດທີ່ສຳຄັນໃນສາຍພົວພັນລະຫວ່າງຈີນ-ອິນເດຍ. ໃນຫຼາຍປີຜ່ານມານີ້, ທ່ານປະທານສີຈິ້ນຜີງກັບທ່ານນາເຣນດຣາ ໂມດີ, ນາຍົກລັດຖະມົນຕີອິນເດຍໄດ້ແລກປ່ຽນຄວາມຄິດເຫັນກັນຢ່າງເປັນປົກກະຕິໃນໂອກາດຕ່າງໆ, ໄດ້ໃຫ້ທິດຊີ້ນຳດ້ານຍຸດທະສາດແລະເພີ່ມພະລັງແຮງໃໝ່ຢ່າງເຂັ້ມແຂງເຂົ້າໃນການພັດທະນາສາຍພົວພັນລະຫວ່າງຈີນ-ອິນເດຍ. ໃນໄລຍະທີ່ທ່ານປະທານສີຈິ້ນຜີງຢ້ຽມຢາມອິນເດຍຄັ້ງນີ້, ມີເນີນການແລກປ່ຽນ ກັບທ່ານນາຍົກນາເຣນດຣາ ໂມດີໃນຫຼາຍຮູບແບບ.
ສຳລັບປະເທດເນປານນັ້ນແມ່ນຄູຮ່ວມມືທີ່ສຳຄັນໃນການຊຸກຍູ້ການຮ່ວມມືໃນຂອບ “ໜຶ່ງແລວໜຶ່ງເສັ້ນທາງ” ຢູ່ອາຊີໃຕ້ຂອງຈີນ. ທ່ານໂຫຼຈ້າວຫຸຍ, ກ່າວວ່າ, ການເດີນທາງຢ້ຽມຢາມເນປານຄັ້ງນີ້, ຈະຮ່ວມກັນກຳນົດແຜນການໃໝ່ກ່ຽວກັບການພັດທະນາສາຍພົວພັນລະຫວ່າງຈີນ-ເນປານໃນອະນາຄົດ, ເລັ່ງລັດເພື່ອຮ່ວມກັນສ້າງຍຸກໃໝ່ດ້ານການພັດທະນາການພົວພັນລະຫວ່າງຈີນ-ເນປານ. ຈະລົງເລິກຄວາມໄວ້ເນື້ອເຊື່ອໃຈດ້ານການເມືອງລະຫ່ ສອງປະເທດຕື່ມອີກ, ສ້າງພື້ນຖານໃຫ້ແກ່ການເຊື່ອສານດ້ານຈິດໃຈສູ່ທຸກລຸ້ນຄົນລະຫວ່າງຈີນ-ເນປານໃຫ້ໝັ້ນຄົງ. ຈະເລັ່ງລັດການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນໃຫ້ມີຄຸນນະພາບສູງລະຫວ່າງສອງປະເທດ, ເພີ່ມພະລັງແຮງໃໝ່ເຂົ້າໃນການຮ່ວມມືຕົວຈິງໃນແຕ່ລະຂົງເຂດລະຫວ່າງສອງຝ່າຍ, ສ້າງຜົນປະໂຫຍດໃຫ້ຫຼາຍກວ່າເກົ່າແກ່ສອງປະເທດແລະປະຊາຊົນສອງຊາດ.