ທ່ານສີຈິ້ນຜິງພົບປະກັບນາຍົກລັດຖະມົນຕີອິນເດຍ
ວັນທີ 11 ຕຸລານີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານນາເຣັນດຣາ ໂມດີ ນາຍົກລັດຖະມົນຕີອິນເດຍຢູ່ນະຄອນເຊັນນາຍຂອງອິນເດຍ.
ທ່ານສີຈິ້ນຜິງກ່າວວ່າ: ປີກາຍນີ້ຂ້າພະເຈົ້າໄດ້ພົບປະເຈລະຈາກັບທ່ານນາຍົກລັດຖະມົນຕີຢູ່ນະຄອນອູຮັ້ນຂອງຈີນຢ່າງສຳເລັດຜົນ ເຊິ່ງພາໃຫ້ສາຍພົວພັນລະຫວ່າງຈີນກັບອິນເດຍກ້າວເຂົ້າສູ່ໄລຍະໃໝ່. ຂ້າພະເຈົ້າມີຄວາມປິຕິຊົມຊື່ນທີ່ໄດ້ເດີນທາງມາເຖິງລັດທາມິນ ນາດູທາງພາກໃຕ້ຂອງອິນເດຍຕາມຄຳເຊື້ອເຊີນຂອງທ່ານ ເຊິ່ງເຮັດໃຫ້ຂ້າພະເຈົ້າສາມາດຮັບຮູ້ອິນເດຍຫຼາຍກວ່າເກົ່າ.
ທ່ານສີຈິ້ນຜິງກ່າວວ່າ, ການໄປມາຫາສູ່ກັນລະຫວ່າງຈີນກັບລັດທາມິນ ນາດູມີປະຫວັດສາດອັນຍາວນານ, ຕັ້ງແຕ່ສະໄໝບູຮານລັດທາມິນ ນາດູ ມີການພົວພັນດ້ານການຄ້າທາງທະເລກັບຈີນຢ່າງແໜ້ນແຟ້ນ ທັງເປັນສູນກາງການຈໍລະຈອນສິນຄ້າທາງທະເລຕາມເສັ້ນທາງສາຍໄໝສະໄໝບູຮານ. ຈີນແລະອິນເດຍແມ່ນປະເທດທີ່ມີອະລິຍະທຳເກົ່າແກ່ທີ່ມີປະຫວັດສາດເປັນເວລາຫຼາຍພັນປີ, ການແລກປ່ຽນແລະການຖອດຖອນບົດຮຽນລະຫວ່າງສອງປະເທດສືບທອດຈົນມາເຖິງຍຸກປັດຈຸບັນ. ບັນພະບຸລຸດສອງປະເທດໄດ້ດຳເນີນການແລກປ່ຽນຢ່າງກວ້າງຂວາງ, ຊຸກຍູ້ການພັດທະນາແລະການຖ່າຍທອດວັນນະຄະດີ, ສີລະປະ, ປັດສະຍາແລະສາສະໜາ ເຊິ່ງສອງຝ່າຍກໍໄດ້ຮັບຜົນປະໂຫຍດຢ່າງຫຼວງຫຼາຍ. ສຳລັບການແລກປ່ຽນດ້ານວັດທະນະທຳລະຫວ່າງຈີນກັບອິນເດຍຍັງມີກຳລັງບົ່ມຊ້ອຍຫຼາຍ, ສອງຝ່າຍຄວນຖືເອົາການສ້າງສາຍພົວພັນທາງການທູດລະຫວ່າງສອງປະເທດຄົບຮອບ 70 ປີເປັນໂອກາດທີ່ດີເພື່ອດຳເນີນການແລກປ່ຽນດ້ານວັດທະນະທຳໃນຂົງເຂດທີ່ກ້ວາງຂວາງກວ່າເກົ່າ ແລະເລິກເຊິ່ງກວ່າເກົ່າ, ຮ່ວມກັນສົ່ງເສີມແລະຊຸກຍູ້ການສົນທະນາແລະການແລກປ່ຽນລະຫວ່າງອະລິຍະທຳທີ່ຕ່າງກັນ ເພື່ອເພີ່ມກຳລັງແຮງຢ່າງຕໍ່ເນື່ອງໃຫ້ແກ່ການຂະຫຍາຍການພົວພັນລະຫວ່າງສອງຝ່າຍໃຫ້ຫຼາຍກວ່າເກົ່າ ແລະສືບຕໍ່ເສີມຂະຫຍາຍອະລິຍະທຳອາຊີໃຫ້ມີຄວາມໂດດເດັ່ນສະຫງ່າກວ່າເກົ່າ.
ທ່ານໂມດີກ່າວວ່າ, ຜ່ານການພັດທະນາເປັນເວລາຫຼາຍພັນປີ, ອິນເດຍແລະຈີນໄດ້ກາຍເປັນກຸ່ມເສດຖະກິດທີ່ຈະເລີນໃໝ່ທີ່ສຳຄັນ, ການເພີ່ມທະວີການຮ່ວມມືມີຄວາມໝາຍສຳຄັນຕໍ່ການພັດທະນາຂອງສອງປະເທດ ແລະຈະຊຸກຍູ້ຄວາມກ້າວໜ້າແລະຄວາມຈະເລີນຮຸ່ງເຮືອງຂອງທົ່ວໂລກ. ອິນເດຍແລະຈີນມີອະລິຍະທຳທີ່ເກົ່າແກ່ແລະເລິກເຊິ່ງ, ສະຕິບັນຍາຂອງອະລິຍະທຳເຫຼົ່ານີ້ສາມາດໃຫ້ແຮງບັນດານໃຈແກ່ໂລກເພື່ອແກ້ໄຂສິ່ງທ້າທາຍຕ່າງໆໃນປັດຈຸບັນນີ້.