ກອງປະຊຸມເວທີປຶກສາຫາລືຊ່ຽງຊ່ານປັກກິ່ງຄັ້ງທີ 9 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 21 ຕຸລານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງສານສະແດງຄວາມຊົມເຊີຍຕໍ່ກອງປະຊຸມດັ່ງກ່າວ.
ສານຊົມເຊີຍຂອງທ່ານປະທານປະເທດຂຽນວ່າ, ສັນຕິພາບແມ່ນຄວາມປາຖະໜາອັນຖາວອນຂອງມວນມະນຸດ. ຈີນຍຶດໝັ້ນການຊຸກຍູ້ການຮ່ວມມືກັນດ້ວຍການປຶກສາຫາລື, ຊຸກຍູ້ສັນຕິພາບດ້ວຍການຮ່ວມມືກັນ ແລະ ຮັບປະກັນການພັດທະນາດ້ວຍສັນຕິພາບ.
ສານຊົມເຊີຍລະບຸຕື່ມວ່າ, ການປົກປັກຮັກສາສັນຕິພາບຢ່າງຖາວອນຂອງພາກພື້ນອາຊີປາຊີຟິກ ສອດຄ່ອງກັບຜົນປະໂຫຍດຮ່ວມຂອງບັນດາປະເທດໃນພາກພື້ນ ສະນັ້ນ, ຈິ່ງຕ້ອງການໃຫ້ປະເທດຕ່າງໆອຸດທິສະຕິປັນຍາ ແລະ ກຳລັງຂອງຕົນຕໍ່ເລື່ອງນີ້. ໂດຍຜະເຊີນໜ້າກັບໄພຂົ່ມຂູ່ດ້ານຄວາມໝັ້ນຄົງທີ່ສັບສົນ, ປະເທດຕ່າງໆຄວນສາມັກຄີກັນເຂົ້າຢ່າງແໜ້ນແຟ້ນ, ຍຶດໝັ້ນການປົກປ້ອງລະບົບສາກົນທີ່ຖື ສປຊ ເປັນແກນກາງ, ປັບປຸງການພົວພັນຄູ່ຮ່ວມດ້ານຄວາມໝັ້ນຄົງແບບໃໝ່ຢ່າງບໍ່ຢຸດຢັ້ງ, ຊຸກຍູ້ຂອບຄວາມໝັ້ນຄົງທີ່ສອດຄ່ອງກັບສະພາບຄວາມເປັນຈິງດ້ານການພັດທະນາຂອງພາກພື້ນ, ຊຸກຍູ້ໃຫ້ພາກພື້ນອາຊີປາຊີຟິກມີສັນຕິພາບຖາວອນ ແລະ ມີຄວາມໝັ້ນຄົງທົ່ວໄປ ພ້ອມທັງປະກອບສ່ວນຫຼາຍກວ່າເກົ່າ ເພື່ອຊຸກຍູ້ສັນຕິພາບ ແລະ ການພັດທະນາຂອງໂລກ ແລະ ຮ່ວມກັນສ້າງປະຊາຄົມຮ່ວມຊາຕາກຳມວນມະນຸດ.