CRI ໄດ້ອອກບົດວິເຄາະທີ່ພາດຫົວຂໍ້ວ່າ: “ກອງປະຊຸມເວທີປຶກສາຫາລືຊຽງຊານໄດ້ເປີດເຜີຍ “ແຜນການຂອງຈີນ” ເພື່ອສັນຕິພາບໂລກ” ໃນວັນທີ 23 ຕຸລານີ້.
ບົດຄວາມລະບຸວ່າ, ທ່ານສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງກອງປະຊຸມເວທີປຶກສາຫາລືຊຽງຊານປັກກິ່ງຄັ້ງທີ 9 ໂດຍໄດ້ເນັ້ນໜັກວ່າ, ຈີນຍຶດໝັ້ນການຊຸກຍູ້ການຮ່ວມມືດ້ວຍການປຶກສາຫາລືກັນ, ຊຸກຍູ້ສັນຕິພາບດ້ວຍການຮ່ວມມືກັນ ແລະ ຮັບປະກັນການພັດທະນາດ້ວຍສັນຕິພາບ. ພ້ອມທັງໄດ້ເນັ້ນໜັກວ່າ: “ການຍຶດໝັ້ນແລະປົກປ້ອງລະບົບສາກົນທີ່ຖື ສປຊ ເປັນແກນກາງ” , “ປັບປຸງການພົວພັນຄູ່ຮ່ວມດ້ານຄວາມໝັ້ນຄົງແບບໃໝ່ໃຫ້ສົມບູນຂຶ້ນຢ່າງບໍ່ຢຸດຢັ້ງ” ແລະ “ໄດ້ວາງໂຄງຮ່າງຄວາມໝັ້ນຄົງທີ່ສອດຄ່ອງກັບສະພາບຄວາມເປັນຈິງຂອງພາກພື້ນ” ຕາມເອກະລັກແລະຈຸດພິເສດຂອງພາກພື້ນຕ່າງໆຂອງໂລກ ເຊິ່ງເປັນການໄດ້ສະໜອງແນວຄວາມຄິດສຳຄັນໃຫ້ແກ່ການເພີ່ມທະວີການຮ່ວມມືດ້ານຄວາມໝັ້ນຄົງສາກົນໃນຂອບເຂດທົ່ວໂລກ ແລະ ໄດ້ສະເໜີ “ແຜນການຈີນ” ຕໍ່ການປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນອາຊີປາຊີຟິກ ກໍຄື ຂອງໂລກ. ຈຸດຢືນທີ່ກ່ຽວຂ້ອງຂອງຈີນເປັນການຕອບສະໜອງຕາມຄວາມຮຽກຮ້ອງຕ້ອງການຂອງປະເທດຕ່າງໆໃນການສະແຫວງຫາສັນຕິພາບການພັດທະນາແລະການຊຸກຍູ້ການຮ່ວມມື ເຊິ່ງໄດ້ຮັບສຽງຕອບຮັບຢ່າງກວ້າງຂວາງຈາກຝ່າຍຕ່າງໆທີ່ເຂົ້າຮ່ວມກອງປະຊຸມ.
ໃນອະນາຄົດ, ຈີນຍັງຈະສືບຕໍ່ປະຕິບັດຕາມທັດສະນະຄວາມໝັ້ນຄົງແບບໃໝ່ທີ່ຮ່ວມກັນ, ມີສ່ວນຮ່ວມ, ຮ່ວມມືກັນ ແລະ ຕໍ່ເນື່ອງ, ຍຶດໝັ້ນໃນການປະຕິບັດນະໂຍບາຍປ້ອງກັນປະເທດທີ່ມີລັກສະນະປ້ອງກັນຕົວ, ເປັນຜູ້ສ້າງສັນຕິພາບໂລກ, ຜູ້ປະກອບສ່ວນຕໍ່ການພັດທະນາໂລກ ແລະ ເປັນຜູ້ປົກປັກຮັກສາລະບຽບສາກົນຢ່າງສະເໝີຕົ້ນສະເໝີປາຍ ພ້ອມທັງເພີ່ມ “ພະລັງທີ່ສ້າງສັນຂອງຈີນ” ເຂົ້າໃນການຊຸກຍູ້ການສ້າງປະຊາຄົມຮ່ວມຊາຕາກຳມວນມະນຸດ.