ກອງປະຊຸມເວທີປຶກສາຫາລືການພັດທະນາແບບຍືນຍົງຄັ້ງທຳອິດໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 24 ຕຸລານີ້. ທ່ານສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງກອງປະຊຸມດັ່ງກ່າວ.
ໃນສານຂອງທ່ານສີຈິ້ນຜິງ ຊີ້ໃຫ້ເຫັນວ່າ, ຈີນຍຶດໝັ້ນທັດສະນະພັດທະນາທີ່ປະດິດສ້າງໃໝ່, ກົມກຽວ, ສີຂຽວ, ເປີດປະຕູສູ່ພາຍນອກແລະຊົມໃຊ້ຮ່ວມກັນ, ຊຸກຍູ້ໃຫ້ເສດຖະກິດຈີນພັດທະນາຢ່າງມີຄຸນນະພາບສູງ, ແລະລົງເລິກໃນການປະຕິບັດຕາມວາລະການພັດທະນາແບບຍືນຍົງປີ 2030 ຂອງ ສປຊ ຢ່າງຮອບດ້ານ. ຂະນະດຽວນັ້ນ, ຈີນກໍຕັ້ງໜ້າລົງເລິກການຮ່ວມມືໃຕ້ໆ, ຊຸກຍູ້ການສ້າງ “ໜຶ່ງແລວໜຶ່ງເສັ້ນທາງ” ໃຫ້ເຊື່ອມຕໍ່ກັບວາລະການພັດທະນາແບບຍືນຍົງປີ 2030, ແລະເປັນການປະກອບສ່ວນຢ່າງຕັ້ງໜ້າເພື່ອບັນລຸເປົ້າໝາຍການພັດທະນາແບບຍືນຍົງຂອງໂລກ. ຫວັງວ່າບັນດາຝ່າຍຈະຕັ້ງໜ້າສະແຫວງຫາວິທີທີ່ດີໃນການປະຕິບັດວາລະການພັດທະນາແບບຍືນຍົງປີ 2030, ຊຸກຍູ້ການພັດທະນາຮ່ວມກັນແລະຮ່ວມກັນສ້າງປະຊາຄົມຮ່ວມຊາຕາກຳມວນມະນຸດ.
ກອງປະຊຸມເວທີປຶກສາຫາລືການພັດທະນາແບບຍືນຍົງຄັ້ງທຳອິດໄດ້ຈັດຂຶ້ນຮ່ວມກັນລະຫວ່າງສູນຄົ້ນຄວ້າພັດທະນາຂອງລັດຖະບານຈີນ, ອົງການປົກຄອງນະຄອນປັກກິ່ງແລະອົງການຈັດຕັ້ງທີ່ກ່ຽວຂ້ອງຂອງອົງການສະຫະປະຊາຊາດ.