ວັນທີ 31 ຕຸລາຜ່ານມາ, ໃນງານວາງສະແດງການສື່ສານ ແລະ ຂໍ້ມູນຂ່າວສານສາກົນຈີນປີ2019, ທ່ານເສີນຈ້າວຊົງ ຮອງລັດຖະມົນຕີກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານຈີນຮ່ວມກັບຜູ້ບໍລິຫານຂອງບໍລິສັດ China mobile, ບໍລິສັດ China telecom, ບໍລິສັດChina Unicom ແລະບໍລິສັດChina-towerໄດ້ຮ່ວມກັນເປີດບໍລິການ 5G ທາງທຸລະກິດຢ່າງເປັນກທາງການ.
ທ່ານເສີນຈ້າວຊົງກ່າວວ່າ, ປະຈຸບັນ, ເສດຖະກິດຈີນພວມຫັນຈາກການເຕີບໂຕດ້ວຍຄວາມໄວສູງສູ່ການພັດທະນາດ້ວຍຄຸນນະພາບສູງ, ສະນັ້ນຈຶ່ງຕ້ອງເສີມຂະຫຍາຍທ່າແຮງຂອງຂະແໜງການຂໍ້ມູນຂ່າວສານ ແລະ ການສື່ສານໃຫ້ປົກຄຸມເນື້ອທີ່ຢ່າງກວ້າງຂວາງ, ແລະເຊື່ອມໂຍງໄດ້ດີ ແລະ ມີບົດບາດຊຸກຍູ້ຫຼາຍ, ເພີ່ມທະວີບົດບາດຂັບເຄື່ອນຂອງເຕັກໂນໂລຊີດີຈີຕອນຕໍ່ການພັດທະນາເສດຖະກິດ, ເພີ່ມພະລັງຊຸກດັນຕໍ່ການພັດທະນາເສດຖະກິດສັງຄົມທີ່ມີຄຸນນະພາບສູງ. ທ່ານກ່າວຕື່ມວ່າ, ຈີນພວມເລັ່ງລັດການນຳໃຊ້ 5G ເຂົ້າໃນທາງທຸລະກິດ, ຄາດວ່າຮອດທ້າຍປີນີ້, ຈະເປີດສະຖານນີ5Gໃນທົ່ວປະເທດຫຼາຍກວ່າ 1ແສນ3ໝື່ນສະຖານີ.
ທ່ານຍັງກ່າວຕື່ມວ່າ, ຈະຊຸກຍູ້ການນຳໃຊ້5Gໃນຂົງເຂດການສຶກສາ, ການປິ່ນປົວ, ການບໍລິການຂອງລັດ ແລະ ການສ້າງຕົວເມືອງອັດສະລິຍະ ແລະອື່ນໆ, ປັບປຸງຮູບແບບການສະໜອງການບໍລິການສາທາລະນະໃຫ້ດີຂຶ້ນ.