ວັນທີ 31 ຕຸລາຜ່ານມາ, ໃນເວລາກ່ອນການໄປຢ້ຽມຢາມອຸສເບກີສະຖານຢ່າງເປັນທາງການ ແລະ ເຂົ້າຮ່ວມກອງປະຊຸມຄັ້ງທີ 18 ຂອງສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ລົງພິມບົດຄວາມທີ່ພາດຫົວຂໍ້ວ່າ “ສົ່ງເສີມການເປີດກວ້າງ ແລະຮ່ວມມື ພັດທະນານຳກັນ”ຢູ່ໜັງສືພິມສຽງປະຊາຊົນ ແລະເວັບໄຊຂ່າວສານໂລກຂອງອຸສເບກີສະຖານ.
ໃນບົດຄວາມລະບຸວ່າ, ຈີນຍິນດີເປັນຄູ່ຮ່ວມການເປີດກວ້າງແລະການຮ່ວມມືກັບອຸສເບກີສະຖານ. ພວກເຮົາຈະຮ່ວມກັນປະຕິບັດຕາມທັດສະນະທີ່ເປີດປະຕູສູ່ພາຍນອກ, ສະໜັບສະໜູນ ແລະ ຊຸກຍູ້ເຊິ່ງກັນແລະກັນໃນການເປີດປະຕູສູ່ພາຍນອກ, ເສີມຂະຫຍາຍທ່າແຮງເຊິ່ງກັນແລະກັນ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ສ້າງ ແລະ ຊົມໃຊ້ໂອກາດການພັດທະນາຮ່ວມກັນ. ພວກເຮົາຍິນດີຊຸກຍູ້ຂໍ້ລິເລີມທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເຊື່ອມຕໍ່ກັບຍຸດທະສາດການພັດທະນາຂອງອຸສເບກີສະຖານໃຫ້ດີກວ່າເກົ່າ, ສ້າງສະພາບການໃໝ່ດ້ານການຮ່ວມມືທີ່ມີໂຄງປະກອບດີຂຶ້ນ ແລະ ມີເນື້ອໃນອັນອຸດົມສົມບູນ. ປະດິດສ້າງຮູບແບບການຮ່ວມມືອັນໃໝ່ໃນການເພີ່ມເຂດຄວາມສາມາດການຜະລິດ, ຊຸກຍູ້ໂຄງການຮ່ວມມືທີ່ກ່ຽວຂ້ອງຢ່າງແທ້ຈິງ, ເຮັດໃຫ້ທ່າແຮງດ້ານເສດຖະກິດຂອງສອງປະເທດຫັນເປັນໝາກຜົນຂອງການຮ່ວມມືຕົວຈິງ. ຈີນສົ່ງເສີມໃຫ້ວິສາຫະກິດຈີນທີ່ມີຄວາມເຂັ້ມແຂງ ແລະ ມີຄວາມໜ້າເຊື່ອຖືເປີດກວ້າງການຮ່ວມມື ແລະ ການລົງທຶນຢູ່ອຸສເບກີສະຖານຕາມຫຼັກການຕະຫຼາດ ແລະ ຫຼັກການການຄ້າ, ທັງຍິນດີທີ່ເຫັນວ່າຜະລິດຕະພັນກະສິກຳທີ່ມີຄຸນນະພາບສູງຂອງອຸສເບກີສະຖານເຂົ້າສູ່ຕະຫຼາດຂອງຈີນ. ພ້ອມກັນນັ້ນ, ການໄປມາຫາສູ່ກັນບົນຈິດໃຈມິດຕະພາບລະຫວ່າງປະຊາຊົນສອງຊາດກໍເພີ່ມຂຶ້ນ, ກໍຈະເຮັດໃຫ້ມິດຕະພາບອັນເປັນມູນເຊື້ອລະຫວ່າງຈີນ-ອຸສເບກີສະຖານມີສີສັນໃໝ່ຂຶ້ນຕື່ມ.
ໃນບົດຄວາມຍັງລະບຸວ່າ, ມີແຕ່ເປີດກວ້າງການເປີດປະຕູສູ່ພາຍນອກຢ່າງບໍ່ຢຸດຢັ້ງ, ເສັ້ນທາງແຫ່ງການຮ່ວມມື ແລະ ການພັດທະນາຈຶ່ງຈະນັບມື້ນັບກວ້າງຂວາງກວ່າເກົ່າ. ບາດກ້າວເດີນແຫ່ງການເປີດປະຕູສູ່ພາຍນອກຂອງຈີນ ຈະບໍ່ຢຸດນິ້ງ, ແລະຈະເປີດປະຕູສູ່ພາຍນອກນັບມື້ນັບກວ້າງຂວາງກວ່າເກົ່າ. ພວກເຮົາຍິນດີຮ່ວມມືກັບອຸສເບກີສະຖານ ປະເທດສະມາຊິກອື່ນໆຂອງອົງການຮ່ວມມືຊຽງໄຮ ກໍຄືບັນດາປະເທດໃນໂລກ, ສືບຕໍ່ເປັນຄູ່ຮ່ວມໃນພາລະກິດເປີດປະຕູສູ່ພາຍນອກ, ແລະບັນລຸການພັດທະນາຮ່ວມກັນເປັນຢ່າງດີກວ່າເກົ່າ.