ວັນທີ 20 ພະຈິກນີ້, ຢູ່ນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານເດວິດ ມານປາສ ຜູ້ອຳນວຍການໃຫຍ່ທະນາຄານໂລກ.
ທ່ານຫຼີເຄີ້ສຽງກ່າວວ່າ, ທະນາຄານໂລກເປັນອົງການພັດທະນາຫຼາຍຝ່າຍທີ່ສຳຄັນຂອງໂລກ, ຈີນເອົາໃຈໃສ່ຢ່າງສູງຕໍ່ການຂະຫຍາຍການພົວພັນກັບທະນາຄານໂລກ, ຍິນດີສືບຕໍ່ຮ່ວມມືໂດຍຜ່ານຊ່ອງທາງເງິນທຶນ ແລະ ຄວາມຮູ້, ລົງເລິກການຮ່ວມມືກັບທະນາຄານໂລກໃນຂົງເຂດສຳຄັນຕ່າງໆ ເຊັ່ນ: ການອະນຸລັກສິ່ງແວດລ້ອມ, ຊີວະນາໆພັນ ແລະການພັດທະນາເພື່ອຫຼຸດຜ່ອນຄວາມທຸກຍາກ ເປັນຕົ້ນ. ຂະນະດຽວກັນ, ຈີນຈະປະຕິບັດຕາມພັນທະແລະໜ້າທີ່ສາກົນຂອງຕົນໃນຖານະເປັນປະເທດໃຫຍ່ພວມພັດທະນາ, ຮ່ວມກັນຊຸກຍູ້ພາລະກິດພັດທະນາໂລກ. ຈີນຍິນດີລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດກັບບັນດາຝ່າຍ, ປົກປັກຮັກສາລະບົບການຄ້າເສລີທີ່ຖືກະຕິກາເປັນພື້ນຖານ, ຮ່ວມກັນຜ່ານຜ່າຄວາມຫຍຸ້ງຍາກ, ເພີ່ມພະລັງຊຸກດັນໃໝ່ ເພື່ອການເຕີບໂຕຂອງເສດຖະກິດໂລກ ແລະ ການພັດທະນາຂອງແຕ່ລະຝ່າຍ.
ທ່ານເດວິດ ມານປາສກ່າວວ່າ, ເສດຖະກິດໂລກໃນປັດຈຸບັນພວມຜະເຊີນກັບສິ່ງທ້າທາຍທີ່ຂ້ຽວຂາດ ແລະ ຕ້ອງການໃຫ້ບັນດາຝ່າຍຮ່ວມມືກັນ. ການພັດທະນາເສດຖະກິດຈີນມີຄວາມສາມາດບົ່ມຊ້ອນອັນມະຫາສານ ແລະ ຈີນກໍປະສົບຜົນສຳເລັດທີ່ພົ້ນເດັ່ນໃນການເປີດປະຕູສູ່ພາຍນອກ. ລັດຖະບານຈີນພວມພະຍາຍາມຢ່າງບໍ່ລົດລະໃນຂົງເຂດຕ່າງໆ ເຊັ່ນ: ການພັດທະນາເຕີບໂຕ, ຮັບມືກັບບັນຫາປະຊາກອນອາຍຸສູງ, ການປະດິດສ້າງໃໝ່ດ້ານວິທະຍາສາດເຕັກໂນໂລຊີ, ການອະນຸລັກສິ່ງແວດລ້ອມ ແລະ ຂົງເຂດອື່ນໆ, ທະນາຄານໂລກຍິນດີເພີ່ມທະວີການຮ່ວມມືກັບຈີນໃນຂົງເຂດຕ່າງໆ.