ເພື່ອຈັດຕັ້ງປະຕິບັດໝາກຜົນການປຶກສາຫາລືລະຫວ່າງຈີນ ແລະ ອາເມຣິກາກ່ຽວກັບບັນຫາເສດຖະກິດການຄ້າໃນຫວ່າງມໍ່ໆມານີ້, ແລະອີງໃສ່ກົດໝາຍແລະກົດລະບຽບຕ່າງໆຂອງຈີນ, ເຊັ່ນ: “ກົດໝາຍວ່າດ້ວຍດ່ານພາສີສປຈີນ”, “ກົດໝາຍວ່າດ້ວຍການຄ້າກັບຕ່າງປະເທດສປຈີນ”, “ລະບຽບການເກັບພາສີຕໍ່ສິນຄ້າຂາເຂົ້າຂາອອກສປຈີນ”, ແລະອີງຕາມຫຼັກການພື້ນຖານຂອງກົດໝາຍສາກົນ, ຄະນະກຳມາທິການອອກລະບຽບການຈັດເກັບພາສີອາກອນແຫ່ງລັດຈີນຈຶ່ງຕົກລົງວ່າ, ສຳລັບສິນຄ້ານຳເຂົ້າຈຳນວນໜຶ່ງທີ່ຜະລິດຢູ່ອາເມຣິກາທີ່ຈະເລີ່ມຂຶ້ນພາສີໃນເວລາ 12 ໂມງ 1 ນາທີຂອງວັນທີ 15 ທັນວານີ້, ຈະເລື່ອນການຂຶ້ນພາສີຕາມອັດຕາ 10% ຫຼື 5%ໄວ້ຊົ່ວຄາວ, ແລະຈະສືບຕໍ່ເລື່ອນການຂຶ້ນພາສີຊົ່ວຄາວຕໍ່ລົດຍົນ ແລະ ເຄື່ອງອາໄຫຼ່ທີ່ຜະລິດຢູ່ອາເມຣິກາ. ນອກຈາກມາດຕະການເຫຼົ່ານີ້, ມາດຕະການຂຶ້ນພາສີຕໍ່ສິນຄ້າຊະນິດອື່ນຂອງອາເມຣິກາຍັງຈະສືບຕໍ່ປະຕິບັດຕາມຂໍ້ກຳນົດເດີມ, ວຽກງານແກ້ໄຂການຂຶ້ນພາສີຕໍ່ສິນຄ້າອາເມຣິກາພວມດຳເນີນຢູ່. ຈີນຫວັງວ່າ, ຈະສຸມຄວາມພະຍາຍາມຮ່ວມກັນກັບອາເມຣິກາບົນພື້ນຖານຄວາມສະເໝີພາບ ແລະ ເຄົາລົບເຊິ່ງກັນແລະກັນ, ເພື່ອແກ້ໄຂບັນຫາຕົ້ນຕໍຂອງແຕ່ລະຝ່າຍຢ່າງເໝາະສົມ, ຊຸກຍູ້ໃຫ້ການພົວພັນເສດຖະກິດການຄ້າລະຫວ່າງຈີນ-ອາເມຣິກາພັດທະນາຢ່າງໝັ້ນທ່ຽງ.