ວັນທີ 16 ທັນວານີ້, ທ່ານສີຈີ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງແຄຣີ ລຳແຊງເຢັດງໍ ຜູ້ວ່າການເຂດບໍລິຫານພິເສດຮົງກົງທີ່ເດີນທາງມານະຄອນຫຼວງປັກກິ່ງ ເພື່ອລາຍງານຜົນການປະຕິບັດງານໃນໜ້າທີ່ຕຳແໜ່ງຂອງຕົນ, ທ່ານສີຈີ້ນຜິງໄດ້ຮັບຟັງການລາຍງານຂອງນາງກ່ຽວກັບສະຖານະການຢູ່ຮົງກົງ ແລະ ສະພາບວຽກງານການປົກຄອງເຂດຮົງກົງ. ທ່ານສີຈີ້ນຜິງກ່າວວ່າ, ໃນປີໜຶ່ງທີ່ຜ່ານໄປ, ແມ່ນປີທີ່ສະຖານະການຮົງກົງຮ້າຍແຮງ ແລະ ສັບສົນທີ່ສຸດນັບຕັ້ງແຕ່ກົງກົງກັບຄືນສູ່ປະເທດຊາດ. ລັດຖະບານຢືນຢັນ ແລະ ໃຫ້ການສະໜັບສະໜູນທ່ານນາງແຄຣີ ລຳແຊງເຢັດງໍ,ເດັດດ່ຽວປົກປັກຮັກສາອະທິປະໄຕ, ຄວາມໝັ້ນຄົງ ແລະ ຜົນປະໂຫຍດໃນການພັດທະນາຂອງຈີນຢ່າງໝັ້ນໜຽວບໍ່ປ່ຽນແປງ, ເດັດດ່ຽວປະຕິບັດຕາມແນວທາງ “ປະເທດດຽວສອງລະບອບ” ຢ່າງໝັ້ນໜຽວບໍ່ປ່ຽນແປງ, ເດັດດ່ຽວຄັດຄ້ານອິດທິກຳລັງຂອງຕ່າງປະເທດທີ່ຫວັງແຊກແຊງວຽກງານຮົງກົງຢ່າງໝັ້ນໜຽວບໍ່ປ່ຽນແປງ.
ທ່ານສີຈີ້ນຜິງກ່າວຕື່ມວ່າ, ລັດຖະບານຈະສືບຕໍ່ຍຶດໝັ້ນການສະໜັບສະໜູນນາງແຄຣີ ລຳແຊງເຢັດງໍສືບຕໍ່ນຳພາອົງການປົກຄອງເຂດບໍລິຫານພິເສດຮົງກົງປະຕິບັດວຽກງານຕາມກົດໝາຍ, ຍຶດໝັ້ນການສະໜັບສະໜູນເຈົ້າໜ້າທີ່ຕຳຫຼວດຮົງກົງປະຕິບັດໜ້າທີ່ຕາມກົດໝາຍຢ່າງເຂັມງວດ, ຍຶດໝັ້ນການສະໜັບສະໜູນກຳລັງຮັກຫອມປະເທດຊາດ ແລະ ຮັກຫອມຮົງກົງ, ແລະຫວັງໃຫ້ບຸກຄົນວົງການຕ່າງໆທາງສັງຄົມຂອງຮົງກົງສະມັກຄີກັນ ເພື່ອພ້ອມກັນຊຸກຍູ້ການພັດທະນາຮົງກົງຟື້ນຟູຄວາມເປັນປົກກະຕິຄືນໃໝ່.