ຕອນບ່າຍວັນທີ 18 ທັນວານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ເດີນທາງໄປເຖິງເຂດບໍລິຫານພິເສດມາກາວເພື່ອເຂົ້າຮ່ວມກິດຈະກຳຕ່າງໆໃນການສະເຫຼີມສະຫຼອງເຂດພິເສດມາກາວກັບຄືນສູ່ປະເທດຊາດຄົບຮອບ 20 ປີ.
ວັນທີ 20 ທັນວາປີ 1999, ລັດຖະບານຈີນໄດ້ຟື້ນຟູສິດອະທິປະໄຕເທິງດິນແດນມາກາວ, ແລະມາກາວໄດ້ກັບຄືນສູ່ປະເທດຊາດ. ພາຍຫຼັງກັບຄືນປະເທດຊາດເປັນໄລຍະ 20 ປີມານີ້, ການປະຕິບັດແນວທາງ “ປະເທດດຽວສອງລະບອບ” ຢ່າງສຳເລັດຜົນໄດ້ເຮັດໃຫ້ເມືອງນ້ອຍທີ່ຕັ້ງຢູ່ແຄມທະເລຈີນໃຕ້ຂອງຈີນມີການພັດທະນາຢ່າງວ່ອງໄວ. ລວມຍອດຜະລິດຕະພັນພາຍໃນຂອງມາກາວຈາກ 51,9 ຕື້ປາຕາກາ(ສະກຸນເງິນມາກາວ)ເພີ່ມຂຶ້ນເປັນ 444,7 ຕື້ປາຕາກາເມື່ອປີ 2018, GDP ສະເລ່ຍຕໍ່ຫົວຄົນຂອງມາກາວຢູ່ແຖວໜ້າຂອງໂລກ, ອັດຕາວ່າງງານຈາກ 6,3% ໃນໄລຍະຫາກໍກັບຄືນສູ່ປະເທດຊາດໄດ້ຫຼຸດລົງຍັງເຫຼືອ 1,8% ເມື່ອປີ 2018.
ຂ່າວແຈ້ງວ່າ, ແຕ່ວັນທີ 18 ຫາວັນທີ 20 ທັນວານີ້, ທ່ານສີຈິ້ນຜິງຈະເຂົ້າຮ່ວມພິທີສະເຫຼີມສະຫຼອງເຂດບໍລິຫານພິເສດມາກາວກັບຄືນສູ່ປະເທດຊາດຄົບຮອບ 20 ປີກໍຄືພິທີດຳລົງຕຳແໜ່ງຂອງອຳນາດການປົກຄອງເຂດບໍລິຫານພິເສດມາກາວຊຸດທີ 5, ແລະຢ້ຽມຢາມເຮັດວຽກຢູ່ເຂດບໍລິຫານພິເສດມາກາວອີກດ້ວຍ.