ວັນທີ 23 ທັນວານີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານມຸນແຈອິນ ປະທານາທິບໍດີ ສ.ເກົາຫຼີ ຢູ່ຫໍສະພາປະຊາຊົນແຫ່ງຊາດຈີນ.
ທ່ານສີຈິ້ນຜິງກ່າວວ່າ: ຈີນ ແລະ ສ.ເກົາຫຼີແມ່ນປະເທດສຳຄັນທີ່ມີອິດທິພົນຢູ່ອາຊີກໍຄືຢູ່ໃນທົ່ວໂລກ. ໃນສະພາບການປັດຈຸບັນ, ສອງຝ່າຍຄວນເອົາໃຈໃສ່ຜົນປະໂຫຍດຕົ້ນຕໍແລະບັນຫາທີ່ໄດ້ຮັບຄວາມສົນໃຈຂອງແຕ່ລະຝ່າຍ, ຊຸກຍູ້ໃຫ້ສາຍພົວພັນລະຫວ່າງສອງຝ່າຍກ້າວຂຶ້ນສູ່ລະດັບສູງຕື່ມອີກ. ສອງຝ່າຍສາມາດຊຸກຍູ້ໃຫ້ຂໍ້ລິເລີ່ມການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເຊື່ອມຕໍ່ກັບແຜນຍຸດທະສາດການພັດທະນາຂອງ ສ.ເກົາຫຼີ, ເລັ່ງລັດການເຈລະຈາໄລຍະທີສອງຂອງສັນຍາການຄ້າເສລີສອງຝ່າຍ, ດຳເນີນການແລກປ່ຽນໃນຂົງເຂດການສຶກສາ, ກິລາ, ຊາວໜຸ່ມແລະຂົງເຂດອື່ນໆໃຫ້ດີ. ສອງຝ່າຍຄວນເພີ່ມທະວີການຮ່ວມມືດ້ານການປະຕິບັດກົດໝາຍແລະຄວາມໝັ້ນຄົງ, ຮ່ວມກັນປາບປາມອາຊະຍາກຳຂ້າມຊາດ, ຮັກສາຄວາມໝັ້ນຄົງແລະຄວາມປອງດອງກັນຂອງສັງຄົມ, ຄວນສືບຕໍ່ເພີ່ມທະວີການປະສານງານພາຍໃນຂອບຫຼາຍຝ່າຍ ເປັນຕົ້ນອົງການສະຫະປະຊາຊາດ, ເພື່ອຮັກສາຄວາມຍຸຕິທຳ ແລະຄວາມເປັນທຳຂອງສາກົນແລະຜົນປະໂຫຍດທີ່ຖືກຕ້ອງຕາມກົດໝາຍຂອງສອງປະເທດ.
ທ່ານມຸນແຈອິນກ່າວວ່າ: ສ.ເກົາຫຼີຫວັງວ່າສອງຝ່າຍຈະເປີດກ້ວາງການຮ່ວມມືໃນຂົງເຂດຕ່າງໆຕື່ມອີກ ເຊັ່ນ ຂົງເຂດເສດຖະກິດການຄ້າ, ວັດທະນະທຳ, ກິລາແລະອື່ນໆ, ໂດຍສະເພາະຈະຊຸກຍູ້ແລະຈັດຕັ້ງປະຕິບັດໃຫ້ຂໍ້ລິເລີ່ມ “ໜຶ່ງແລ້ວໜຶ່ງເສັ້ນທາງ” ໃຫ້ເຊື່ອມຕໍ່ເຂົ້າກັບແຜນຍຸດທະສາດການພັດທະນາຂອງ ສ.ເກົາຫຼີ. ນອກນີ້, ສ.ເກົາຫຼີເຫັນວ່າ, ບໍ່ວ່າວຽກງານຮົງກົງຫຼືບັນຫາກ່ຽວກັບເຂດຊິ່ນຈ່ຽງ, ລ້ວນແຕ່ແມ່ນວຽກງານພາຍໃນຂອງຈີນ.
ໃນການພົບປະ, ປະມຸກລັດສອງປະເທດຍັງໄດ້ແລກປ່ຽນຄວາມເຫັນກ່ຽວກັບສະຖານະການແຫຼມເກົາຫຼີອີກດ້ວຍ.