ວັນທີ 24 ທັນວານີ້, ທ່ານລູ້ເຫຼີຍ ຮອງຫົວໜ້າອົງການຄຸ້ມຄອງເງິນຕາຕ່າງປະເທດແຫ່ງຊາດຈີນໄດ້ກ່າວປາໄສໃນກອງປະຊຸມເວທີປຶກສາຫາລືນະໂຍບາຍສຳຄັນແຫ່ງຊາດປະຈຳປີ 2019 ທີ່ຈັດຂຶ້ນຢູ່ປັກກິ່ງວ່າ: ປີ 2019, ການສະໜອງແລະຄວາມຕ້ອງການໃນຕະຫຼາດເງິນຕາຕ່າງປະເທດຂອງຈີນມີຄວາມດຸນດ່ຽງໂດຍພື້ນຖານ,ເວົ້າລວມແລ້ວມີຄວາມໝັ້ນທ່ຽງໃນ 4 ດ້ານຄື ເງິນຢວນຈີນມີຄວາມໝັ້ນທ່ຽງເມື່ອທຽບກັບເງິນຕາທົ່ວໂລກ, ລາຍຮັບລາຍຈ່າຍສາກົນມີຄວາມດຸນດ່ຽງໂດຍພື້ນຖານ, ການສະໜອງແລະຄວາມຕ້ອງການເງິນຕາຕ່າງປະເທດມີຄວາມດຸນດ່ຽງໂດຍລວມ, ປະລິມານເງິນຕາຕ່າງປະເທດໃນຄັງສຳຮອງມີຄວາມໝັ້ນທ່ຽງໂດຍລວມ. ນັບມາຮອດທ້າຍເດືອນພະຈິກປີ 2019,ຄັງສຳຮອງເງິນຕາຕ່າງປະເທດຂອງຈີນມີເຖິງ3095,6 ຕື້ໂດລາສະຫະລັດ, ໄດ້ເພີ່ມຂຶ້ນ 22,9 ຕື້ໂດລາເມື່ອທຽບໃສ່ທ້າຍປີ 2018.
ທ່ານລູ້ເຫຼີຍກ່າວເນັ້ນວ່າ: ເມື່ອຜະເຊີນໜ້າກັບຜົນກະທົບຈາກພາຍນອກແລ້ວບໍ່ໃຊ້ມາດຕະການຮັບມືຈັກຢ່າງແມ່ນເປັນໄປບໍ່ໄດ້, ແຕ່ຄວນດຳເນີນການບໍ່ໃຫ້ຮຸນແຮງເກີນໄປ, ຄວນຄຸ້ມຄອງຄັງສຳຮອງເງິນຕາຕ່າງປະເທດໃຫ້ຢູ່ໃນລະດັບອັນເໝາະສົມ, ຄວນສັ່ງຊາຜົນໄດ້ຜົນເສຍໃນການປະຕິບັດນະໂຍບາຍການຄ້າແລະການລົງທຶນ, ເມື່ອເຮັດແນວນີ້ຈິ່ງຈະສາມາດເຮັດໃຫ້ຕະຫຼາດເງິນຕາຕ່າງປະເທດຂະຫຍາຍຕົວຢ່າງດຸນດ່ຽງໄດ້.