ວັນທີ 23 ທັນວານີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານຊິນໂຊະ ອາເບະ ນາຍົກລັດຖະມົນຕີຍີປຸ່ນຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ.
ທ່ານສີຈິ້ນຜິງກ່າວເນັ້ນວ່າ: ປັດຈຸບັນນີ້, ໂລກພວມຜະເຊີນໜ້າກັບການປ່ຽນແປງໃຫຍ່ທີ່ບໍ່ເຄີຍມີມາກ່ອນໃນໄລຍະຮ້ອຍປີຜ່ານມາ, ສອງຝ່າຍຄວນຍຶດໝັ້ນຄົ້ນຄວ້າ ແລະວາງແຜນພັດທະນາ ແລະສ້າງສາຍພົວພັນສອງປະເທດດ້ວຍວິໄສທັດລະດັບໂລກ, ຍຶດໝັ້ນການເພີ່ມທະວີການແລກປ່ຽນຄວາມເຫັນ ແລະປະສານງານບົນພື້ນຖານເຄົາລົບເຊິ່ງກັນ ແລະກັນ, ສະແຫວງຫາສິ່ງທີ່ຄືກັນ ແລະສະຫງວນສິ່ງທີ່ຕ່າງກັນ, ຕັ້ງໜ້າຊຸກຍູ້ການສ້າງສະພາບການໃໝ່ທີ່ສອງຝ່າຍຮ່ວມມືກັນໃຫ້ຕ່າງຝ່າຍຕ່າງມີຜົນປະໂຫຍດ.
ທ່ານກ່າວຕື່ມວ່າ: ສອງຝ່າຍຄວນເປີດກວ້າງການຮ່ວມມືຕົວຈິງ, ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ ແລະການຮ່ວມມືຕະຫຼາດຝ່າຍທີສາມລະຫວ່າງຈີນ-ຍີ່ປຸ່ນ. ຄວນເພີ່ມທະວີການແລກປ່ຽນດ້ານວັດທະນະທຳ, ການທ່ອງທ່ຽວ, ການສຶກສາ ແລະອື່ນໆ, ສະໜັບສະໜູນຍີ່ປຸ່ນຈັດງານໂອລິມປີກໂຕກຽວ ແລະຈີນຈັດງານໂອລິມປີກລະດູໜາວປັກກິ່ງໃຫ້ບັນລຸຜົນຢ່າງຈົບງາມ. ຄວນເພີ່ມທະວີຄວາມໄວ້ເນື້ອເຊື່ອໃຈກັນດ້ານຄວາມໝັ້ນຄົງ, ມີຄວາມຮັບຜິດຊອບຕໍ່ສາກົນ, ປົກປ້ອງລັດທິຫຼາຍຝ່າຍ ແລະການຄ້າເສລີ, ຊຸກຍູ້ການສ້າງເສດຖະກິດໂລກແບບເປີດກວ້າງ.
ທ່ານຊິນໂຊະ ອາເບະກ່າວວ່າ: ສາຍພົວພັນຍີ່ປຸ່ນ-ຈີນມີທ່າອ່ຽງການພັດທະນາທີ່ດີ. ຍີ່ປຸ່ນໄດ້ໃຫ້ຄວາມສຳຄັນໃນລະດັບສູງ ແລະຄອງຄອຍທ່ານສີຈິ້ນຜິງ ປະທານປະເທດຈີນຈະເດີນທາງຢ້ຽມຢາມຍີ່ປຸ່ນທາງລັດຖະກິດໃນລະດູໃບໄມ້ປົ່ງປີ 2020, ຍີ່ປຸ່ນຍິນດີແລກປ່ຽນຄວາມເຫັນຢ່າງໃກ້ຊິດກັບຝ່າຍຈີນ ແລະຍິນດີສ້າງສາຍພົວພັນຍີ່ປຸ່ນ-ຈີນທີ່ສອດຄ່ອງກັບຄວາມຮຽກຮ້ອງຕ້ອງການຂອງຍຸກໃໝ່.