ພໍ່ຄົວຂອງຕວກກີທີ່ມີຄວາມຝັນໃນນະຄອນຄຸນໝິງ

ຖະໜົນເປົາຊ້ານ ນະຄອນຄຸນໝິງ, ມີຮ້ານອາຫານແຫ່ງໜຶ່ງທີ່ມີລົດຊາດຕວກກີ, ມີຊື່ວ່າ ຮ້ານອາຫານຕວກກີໂລແມນຕິກ, ພໍ່ຄົວຂອງຮ້ານອາຫານແຫ່ງນີ້ມາຈາກປະເທດຕວກກີ ລາວມີຊື່ວ່າ ທ້າວ ມີຄາຍ (Mikail).

ມີຄາຍ ປີນີ້ອາຍຸ 25 ປີ, ລາວເກີດຢູ່ ເມືອງ ຄັບປາໂດເຊຍ (Cappadocia) ໃນພາກກາງຂອງປະເທດຕວກກີ, ລາວບໍ່ເຄີຍເຂົ້າຮຽນຢູ່ໂຮງຮຽນປຸງແຕ່ງອາຫານ, ແຕ່ລາວໄດ້ຮັບອິດທິພົນຈາກແມ່ຂອງລາວ, ລາວມັກແຕ່ງກິນຕັ້ງແຕ່ລາວຍັງເປັນເດັກນ້ອຍ, ໃນລະຫວ່າງທີ່ລາວຮຽນຢູ່ມະຫາວິທະຍາໄລ, ລາວໄດ້ສືບຕໍ່ເຮັດວຽກບໍ່ເຕັມເວລາໃນຮ້ານອາຫານທີ່ຢູ່ໃກ້ກັບເມືອງ ອິສຕັນບູ (Istanbul), ຮຽນຮູ້ການປຸງແຕ່ງອາຫານຂອງປະເທດຕ່າງໆ ແລະ ໄດ້ຍົກລະດັບທັກສະແຕ່ງກິນຂອງລາວ.

ລາວໄດ້ຮູ້ຈັກກັບປະເທດຈີນ ຍ້ອນວ່າຫມູ່ຂອງລາວຄົນໜຶ່ງມາເຮັດວຽກຢູ່ປັກກິ່ງ, ລາວໄດ້ຮູ້ຈາກໝູ່ຂອງລາວວ່າຄຸນໝິງແມ່ນສະຖານທີ່ທີ່ສວຍງາມ, ບໍ່ພຽງແຕ່ມີທິວທັດທີ່ສວຍງາມ, ອາກາດໃນສີ່ລະດູກໍ່ຄ້າຍຄືລະດູໃບໄມ້ປົ່ງ, ປະຊາຊົນຢູ່ທີ່ນັ້ນກໍ່ມີຄວາມເປັນມິດຫຼາຍ. ສະນັ້ນ, ລາວໄດ້ຕັດສິນໃຈມານະຄອນຄຸນໝິງ. ໃນຕົ້ນປີ 2018, ມີຄາຍ ໄດ້ມາຮອດຄຸນໝິງ ແລະ ເລີ່ມຮຽນພາສາຈີນຢູ່ ວິທະຍາໄລວິທະຍາສາດ ແລະເຕັກໂນໂລຢີຄຸນໝິງ.ບໍ່ດົນມານີ້, ລາວໄດ້ຮັບຂໍ້ສະເໜີວຽກຈາກຮ້ານອາຫານຕວກກີໂລແມນຕິກ.

ທັດສະນະຄະຕິຂອງມີຄາຍຕໍ່ການປຸງແຕ່ງອາຫານແມ່ນເຄັ່ງຄັດທີ່ສຸດ. ລາວລອງ ແລະ ປຽບທຽບວັດຖຸດິບທີ່ແຕກຕ່າງກັນໃນທຸກໆມື້, ຫວັງວ່າຈະສາມາດຄົ້ນພົບລົດຊາດທີ່ເປັນເອກະລັກສະເພາະຂອງມັນ. ລາວມີຄວາມຕັ້ງໃຈທີ່ຢາກເຮັດອາຫານໃຫ້ດີ, ລາວນຳເອົາລົດຊາດຂອງຢຸນນານ ມາປະສົມປະສານເຂົ້າໃນລົດຊາດຂອງຕວກກີ, ແລະ ໄດ້ຮັບຄວາມຮັກແພງຈາກຄົນທ້ອງຖິ່ນ.