ຫວ່າງມໍ່ໆນີ້, ປຶ້ມ ສີຈິ້ນຜິງ: ຄຳປາໄສສຳຄັນເພື່ອສະເຫຼີມສະຫຼອງການສະຖາປະນາສາທາລະນະລັດປະຊາຊົນຈີນຄົບຮອບ 70 ປີ ສະບັບພາສາຈີນ-ອັງກິດ ເລີ່ມພິມຈຳໜ່າຍໂດຍສຳນັກພິມຈຳໜ່າຍພາສາຕ່າງປະເທດ ຢູ່ພາຍໃນແລະຕ່າງປະເທດ.
ສາທາລະນະລັດປະຊາຊົນຈີນໄດ້ຮັບການສະຖາປະນາຂຶ້ນຄົບຮອບ 70 ປີໃນປີ 2019, ທ່ານສີຈິ້ນຜິງ ເລຂາທິການໃຫຍ່ພັກກອມມູນິດຈີນໄດ້ເຂົ້າຮ່ວມພິທີສະເຫຼີມສະຫຼອງສຳຄັນຕ່າງໆ ແລະໄດ້ກ່າວຄຳປາໄສສຳຄັນ. ຄຳປາໄສສຳຄັນຂອງທ່ານ ສີຈິ້ນຜິງ ໄດ້ບັນລະຍາຍເຖິງຂະບວນການຍິ່ງໃຫຍ່ທີ່ປະເທດຈີນໃໝ່ໄດ້ຜ່ານຜ່າແລະເອົາຊະນະຄວາມຫຍຸ້ງຍາກລຳບາກຕ່າງໆນາໆ ຕະຫຼອດ 70 ປີຜ່ານມາ, ໄດ້ສະແດງໃຫ້ເຫັນເຖິງຄວາມຕັດສິນໃຈອັນເດັດດ່ຽວໜຽວແໜ້ນທີ່ຈີນເດີນຕາມເສັ້ນທາງການພັດທະນາໂດຍສັນຕິແລະການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ເຊິ່ງໄດ້ປຸກລະດົມນ້ຳໃຈຮັກຊາດ, ນ້ຳໃຈຮັກພັກ, ຮັກທະຫານ ແລະຮັກປະຊາຊົນຂອງປະຊາຊົນຈີນອັນໄພສານ, ພ້ອມທັງໄດ້ສ້າງຄວາມພາກພູມໃຈໃຫ້ລູກຫຼານປະຊາຊາດຈີນຢູ່ພາຍໃນແລະຕ່າງປະເທດໄດ້ຢ່າງຫຼວງຫຼາຍ, ແລະໄດ້ຮັບຄວາມສົນໃຈໃນລະດັບສູງແລະສຽງຕອບຮັບຢ່າງຟົດຟື້ນຈາກປະຊາຄົມໂລກ.
ໃນປຶ້ມ ສີຈິ້ນຜິງ: ຄຳປາໄສສຳຄັນເພື່ອສະເຫຼີມສະຫຼອງການສະຖາປະນາສາທາລະນະລັດປະຊາຊົນຈີນຄົບຮອບ 70 ປີ ໄດ້ຮຽບຮຽງເອົາຄຳປາໄສສຳຄັນ 3 ບົດທີ່ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນກ່າວໃນພິທີສະເຫຼີມສະຫຼອງການສະຖາປະນາສາທາລະນະລັດປະຊາຊົນຈີນຄົບຮອບ 70 ປີ, ພິທີມອບຫຼຽນໄຊແຫ່ງຊາດແລະກຽດຕິຍົດແຫ່ງຊາດ ແລະງານລ້ຽງສະເຫຼີມສະຫຼອງວັນຊາດ.