ຕົວເລກຂໍ້ມູນຂອງອົງການສ່ວຍສາອາກອນແຫ່ງຊາດຈີນສະແດງໃຫ້ເຫັນວ່າ:ການຫຼຸດສ່ວຍສາອາກອນແລະຄ່າທຳນຽມຂອງຈີນໃນໝົດປີ 2019 ເມື່ອໄລ່ລວມແລ້ວມີຫຼາຍກວ່າ 2.000 ຕື້ຢວນ,ກວມຫຼາຍກວ່າ 2% ຂອງລວມຍອດມູນຄ່າຜະລິດຕະພັນພາຍໃນຫຼື GDP ຂອງຈີນ, ໄດ້ຊຸກຍູ້ການເຕີບໂຕຂອງ GDP ໝົດປີປະມານ 0,8%.
ອົງການສ່ວຍສາອາກອນແຫ່ງຊາດຈີນກ່າວວ່າ: ສ່ວຍສາອາກອນໃນທຸກຂະແໜງການລ້ວນແຕ່ໄດ້ຫຼຸດລົງໃນລະດັບໃດໜຶ່ງ,ເຊິ່ງໄດ້ກະຕຸກຊຸກຍູ້ໃຫ້ຕະຫຼາດມີຊີວິດຊີວາຢ່າງມີປະສິດທິຜົນ,ເພີ່ມທະວີຄວາມໝັ້ນໃຈດ້ານການພັດທະນາເສດຖະກິດ. ການຫຼຸດ ອາກອນລາຍໄດ້ໃນໝົດປີໄດ້ຊຸກຍູ້ການບໍລິໂພກໃນມູນຄ່າຫຼາຍກວ່າ 300 ຕື້ຢວນ,ຊຸກຍູ້ຍອດມູນຄ່າຈຳໜ່າຍຍ່ອຍຂອງຜະລິດຕະພັນບໍລິໂພກໃນສັງຄົມເພີ່ມຂຶ້ນປະມານ 1%. ປີ 2019,ໄດ້ຄືນພາສີຕໍ່ສິນຄ້າສົ່ງອອກ 1.574 ຕື້ຢວນ,ເພີ່ມຂຶ້ນ 4,8%,ເປັນການສະໜັບສະໜູນການສົ່ງອອກສິນຄ້າສູ່ຕ່າງປະເທດຢ່າງແຂງແຮງ.
ປີ 2019, ອົງການສ່ວຍສາອາກອນແຫ່ງຊາດຈີນໄດ້ໃຊ້ມາດຕະການທີ່ມີຄວາມສະດວກຕ່າງໆ,ປັບປຸງການບໍລິການດ້ານການຈ່າຍພາສີແລະສະພາບແວດລ້ອມດ້ານການດຳເນີນທຸລະກິດໃຫ້ດີຂຶ້ນ. ຕາມຜົນການຕີລາຄາສະພາບແວດລ້ອມດ້ານການດຳເນີນທຸລະກິດຂອງທະນາຄານໂລກສະແດງໃຫ້ເຫັນວ່າການຈັດອັນດັບຕົວເລກດັດຊະນີກ່ຽວກັບການຈ່າຍພາສີຂອງຈີນໄດ້ຮັບການຍົກສູງຂຶ້ນອີກເປັນ 3 ປີລຽນຕິດ.