ວັນທີ 7 ມັງກອນນີ້, ທ່ານທອງລຸນ ສີສຸລິດ ນາຍົກລັດຖະມົນຕີລາວທີ່ກຳລັງຢ້ຽມຢາມຈີນ ໄດ້ເດີນທາງໄປຢ້ຽມຢາມແລະທັດສະນະສຶກສາຢູ່ບ້ານລຽງເຈ່ຍເຮີແຂວງສານຊີ່ຈີນ. ໃນກອງປະຊຸມຂ່າວຂອງກະຊວງການຕ່າງປະເທດທີ່ຈັດຂຶ້ນໃນວັນທີ 8 ມັງກອນນີ້, ທ່ານເກີງສວງ ໂຄສົກກະຊວງການຕ່າງປະເທດຈີນກ່າວວ່າ, ຍິນດີຕ້ອນຮັບແຂກຕ່າງປະເທດຫຼາຍກວ່າເກົ່າເດີນທາງມາຈີນ, ໂດຍສະເພາະແມ່ນເດີນທາງໄປຢ້ຽມຢາມບ້ານລຽງເຈ່ຍເຮີ ເຊິ່ງເປັນພື້ນຖານຂອງຈີນ.
ບ້ານລຽງເຈ່ຍເຮີ ແມ່ນບ່ອນທີ່ທ່ານ ສີຈິ້ນຜິງ ປະທານປະເທດຈີນ ເຄີຍເຮັດວຽກແລະດຳລົງຊີວິດ. ໃນໄລຍະທີ່ທ່ານປະທານ ສີຈິ້ນຜິງ ຢ້ຽມຢາມອາເມຣິກາໃນປີ 2015, ເຄີຍໄດ້ແນະນຳຂະບວນການພັດທະນານັບແຕ່ຈີນດຳເນີນການປະຕິຮູບແລະເປີດປະຕູສູ່ພາຍນອກເປັນຕົ້ນມາ ໂດຍຖືເອົາບ້ານລຽງເຈ່ຍເຮີເປັນຕົວແບບ. ທ່ານເກີງສວງກ່າວວ່າ, ບ້ານລຽງເຈ່ຍເຮີແມ່ນຕົວຢ່າງໜຶ່ງຂອງການປະຕິຮູບແລະເປີດປະຕູສູ່ພາຍນອກຂອງຈີນ, ທັງໄດ້ສະແດງໃຫ້ເຫັນເຖິງການຫຼຸດຜ່ອນຄວາມທຸກຍາກຂອງຈີນ, ແມ່ນແຫຼ່ງກຳເນີດຂອງຄວາມໃຝ່ຝັນຂອງຈີນ. ໃນປີມໍ່ໆມານີ້, ນັກການເມືອງສຳຄັນຂອງຕ່າງປະເທດຫຼາຍທ່ານກໍ່ເຄີຍໄປຢ້ຽມຢ້າມບ້ານລຽງເຈ່ຍເຮີ, ເຊິ່ງລ້ວນແຕ່ໄດ້ກ່າວຍ້ອງຍໍຊົມເຊີຍໃນລະດັບສູງຕໍ່ຜົນສຳເລັດທີ່ໄດ້ຮັບໃນຂົງເຂດຕ່າງໆຂອງບ້ານລຽງເຈ່ຍເຮີ, ເຊັ່ນ: ການຫຼຸດຜ່ອນຄວາມທຸກຍາກ, ການສ້າງເສດຖະກິດ, ການປັບປຸງຊີວະພາບແລະອື່ນໆ.
ທ່ານເກີງສວງກ່າວວ່າ, ຈີນເຊື່ອວ່າ, ໂດຍຜ່ານການຢ້ຽມຢາມແຂວງສານຊີ່ ຢ້ຽມຢາມບ້ານລຽງເຈ່ຍເຮີ, ທ່ານນາຍົກລັດຖະມົນຕີ ທອງລຸນ ສີສຸລິດ ຍ່ອມຈະມີຄວາມເຂົ້າໃຈຕໍ່ປະສົບການອັນລ້ຳຄ່າແຫ່ງການສູ້ຊົນຜ່ານຜ່າຂອງຜູ້ນຳຈີນໃນອະດີດ, ສຳຜັດກັບຄວາມຫ້າວຫັນປະຕິວັດແລະການປະດິດສ້າງໃໝ່ຂອງປະຊາຊົນຈີນ, ກໍຄືພື້ນຖານອັນໜັກແໜ້ນຂອງລະບອບສັງຄົມນິຍົມທີ່ມີສີສັນພິເສດຂອງຈີນ ຕື່ມອີກ.