ທ່ານ ເສິ້ນຮ້າວ ຕ້ອນຮັບການເຂົ້າຢ້ຽມຂອງນາຍົກລັດຖະມົນຕີລາວ

ວັນທີ 8 ມັງກອນ, ທ່ານ ເສິ້ນຮ້າວ ເລຂາພັກແຂວງຢຸນນານໄດ້ພົບປະກັບທ່ານ ທອງລຸນ ສີສຸລິດ ນາຍົກລັດຖະມົນຕີລາວ ພ້ອມດ້ວຍຄະນະ ຢູ່ນະຄອນຄຸນໝິງ, ທ່ານ ຢວນເຊີງຟ່າ ເຈົ້າແຂວງຢຸນນານ ກໍໄດ້ເຂົ້າຮ່ວມການພົບປະ.

ທ່ານ ເສິ້ນຮ້າວ ໄດ້ກ່າວຊົມເຊີຍຜົນສຳເລັດການຢ້ຽມຢາມຈີນຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີລາວ ແລະຄະນະ. ທ່ານກ່າວວ່າ, ຈີນ ແລະ ລາວແມ່ນປະເທດບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ແຂວງຢຸນນານປະຕິບັດຢ່າງຈິງຈັງຕໍ່ແຜນປະຕິບັດງານປະຊາຄົມຮ່ວມຊາຕາກຳຈີນ-ລາວທີ່ລົງນາມໂດຍຜູ້ນຳຂອງສອງພັກແລະສອງປະເທດ, ສືບຕໍ່ເພີ່ມທະວີການແລກປ່ຽນລະຫວ່າງແຂວງຢຸນນານ-ລາວ, ເຂົ້າຮ່ວມການກໍ່ສ້າງແລວທາງເສດຖະກິດຈີນ-ລາວຢ່າງຈິງຈັງ, ແລະສືບຕໍ່ລົງເລິກການຮ່ວມມືໃນດ້ານເສດຖະກິດ, ການຄ້າການລົງທຶນ, ການສຶກສາ, ການແພດແລະວັດທະນະທຳແລະອື່ນໆ.ສືບຕໍ່ຊຸກຍູ້ການກໍ່ສ້າງບັນດາໂຄງການໃຫຍ່ໆເຊັ່ນ: ທາງລົດໄຟຈີນ-ລາວ, ເຂດຮ່ວມມືເສດຖະກິດຊາຍແດນແລະເຂດພັດທະນາສັງລວມໄຊເສດຖາຢ່າງຕັ້ງໜ້າ.ຂ້າພະເຈົ້າເຊື່ອຫມັ້ນວ່າການມາຢ້ຽມຢາມຂອງທ່ານ ທອງລຸນ ສີສຸລິດ ນາຍົກລັດຖະມົນຕີລາວຈະເພີ້ມກຳລັງແຮງຊຸກຍູ້ການຮ່ວມມືລະຫວ່າງແຂວງຢຸນນານແລະລາວຂຶ້ນສູ່ລະດັບໃໝ່ ໃຫ້ການພົວພັນມິດຕະພາບຈີນ-ລາວເລິກເຊິ່ງກວ່າເກົ່າ.

ທ່ານ ທອງລຸນ ສີສຸລິດ ໄດ້ຊົມເຊີຍ ຜົນງານທີ່ຍິ່ງໃຫຍ່ທາງປະຫວັດສາດນັບຕັ້ງແຕ່ການສ້າງຕັ້ງສາທາລະນະລັດປະຊາຊົນຈີນເປັນເວລາ 70 ປີທີ່ຜ່ານມາ ແລະຜົນສຳເລັດກອງປະຊຸມຄົບຄະນະຄັ້ງທີ 4 ສະໄຫມທີ 19 ຂອງພັກກອມມູນິດຈີນ. ທ່ານນາຍົກກ່າວວ່າ, ລາວແລະຢຸນນານແມ່ນເຊື່ອມຕໍ່ກັນດ້ວຍພູຜາແລະແມ່ນ້ຳ, ປະຊາຊົນລາວ ແລະ ຈີນມີໄມຕີຈິດມິດຕະພາບອັນເລິກເຊິ່ງ, ສືບຕໍ່ເພີ່ມທະວີການແລກປ່ຽນທີ່ເປັນມິດ, ທ່ານ ທອງລຸນ ສີສຸລິດໄດ້ນຳພາຄະນະຜູ້ແທນລາວໃນການມາຢ້ຽມຢາມຈີນ, ແລະ ມາຢ້ຽມຢາມແຂວງຢຸນນານໂດຍສະເພາະ, ເພື່ອມາເບິ່ງຜົນສຳເລັດທີ່ພົ້ນເດັ່ນຂອງການພັດທະນາເສດຖະກິດແລະສັງຄົມຂອງແຂວງຢຸນນານດ້ວຍຕາຕົນເອງ ແລະ ທັງເປັນການໄດ້ຮັບກຳລັງໃຈ. ຫວັງວ່າສອງຝ່າຍຈະສືບຕໍ່ຊຸກຍູ້ການຄ້າຊາຍແດນ, ອຳນວຍຄວາມສະດວກໃນການຜ່ານດ່ານພາສີ, ເລັ່ງລັດການກໍ່ສ້າງທາງລົດໄຟຈີນ-ລາວ, ສົ່ງເສີມການຜະລິດແລະການປຸງແຕ່ງຜະລິດຕະພັນກະສິກຳແລະການລ້ຽງສັດ, ແລະ ຈິງໃຈຍິນດີຕ້ອນຮັບວິສາຫະກິດຢຸນນານເຂົ້າມາລົງທຶນຢູ່ລາວ ແລະ ບັນລຸການພັດທະນາຮ່ວມກັນ.