ເລີ່ມການປະຕິບັດກົດໝາຍ ແລະ ລາດຕະເວນຮ່ວມຕາມແມ່ນ້ຳຂອງລະຫວ່າງຈີນ, ລາວ, ມຽນມາ ແລະ ໄທຄັ້ງທີ 90
ເວລາ 9 ໂມງເຊົ້າວັນທີ 16 ມັງກອນນີ້, ເຮືອປະຕິບັດກົດໝາຍ ແລະ ລາດຕະເວນ 3 ລຳຂອງຈີນແລະລາວໄດ້ເລີ່ມອອກເດີນທາງຈາກທ່າເຮືອຈິງຮາກິ່ງແຂວງສິບສອງພັ່ນນາແຂວງຢຸນນານປະເທດຈີນ, ເຊິ່ງເປັນຂີດໝາຍສະແດງໃຫ້ເຫັນວ່າ, ການປະຕິບັດກົດໝາຍ ແລະ ລາດຕະເວນຮ່ວມຕາມແມ່ນ້ຳຂອງລະຫວ່າງຈີນ, ລາວ, ມຽນມາ ແລະ ໄທຄັ້ງທີ 90 ໄດ້ເລີ່ມຂຶ້ນຢ່າງເປັນທາງການ. ນີ້ກໍແມ່ນການລາດຕະເວນຄັ້ງທຳອິດໃນປີ 2020.
ເຈົ້າໜ້າທີ່ກອງໃຫຍ່ລາດຕະເວນທາງນ້ຳພະແນກປ້ອງກັນຄວາມສະຫງົບແຂວງຢຸນນານກ່າວວ່າ, ການປະຕິບັດກົດໝາຍແລະລາດຕະເວນຮ່ວມຄັ້ງນີ້ຈະລາດຕະເວນຢູ່ບາງຕອນ ແລະ ລາດຕະເວນຮ່ວມຕາມແມ່ນ້ຳຂອງແບບປະສານສົມທົບກັນ. ຈະດຳເນີນການລາດຕະເວນແລະປະຕິບັດກົດໝາຍ ຈາກທ່າເຮືອຈິງຮາຫາເຂດນ້ຳ “ສາມຫຼ່ຽມຄຳ” ເປັນເວລາ 6 ວັນ. ໃນໄລຍະປະຕິບັດງານ, ກອງເຮືອປະຕິບັດກົດໝາຍແລະລາດຕະເວນຈະດຳເນີນການຮ່ວມກັນລາດຕະເວນ, ລົງຢ້ຽມຢາມປະຊາຊົນ, ການປະຕິບັດກົດໝາຍຮ່ວມທາງບົກ ແລະ ການໂຄສະນາກ່ຽວກັບຄວາມປອດໄພໃນການເດີນເຮືອຢູ່ຕາມລຳແມ່ນ້ຳຂອງໃນເຂດທີ່ອ່ອນໄຫວຕ່າງໆ, ວິເຄາະສະພາບຄວາມສະຫງົບແລະສະພາບການປ່ຽນແປງດ້ານອຸທົກກະສາດຕາມເຂດລ້ອງແມ່ນ້ຳຂອງ, ໃຊ້ມາດຕະການຢ່າງມີຈຸດສຸມ, ອອກແຮງຢ່າງສຸດຂີດເພື່ອຮ່ວມກັນປົກປັກຮັກສາຄວາມປອດໄພ ການຂົນສົ່ງສາກົນຕາມລຳແມ່ນ້ຳຂອງ.