ທ່ານສີຈິ້ນຜິງຢ້ຽມຢາມບ້ານເຜົ່າວາຢູ່ແຂວງຢູນນານ
ປີ 2020 ເປັນປີທີ່ຈີນຈະຍາດເອົາໄຊຊະນະໃນການສ້າງສັງຄົມທີ່ອິ່ມໜຳສຳລານໃຫ້ສຳເລັດຮອບດ້ານ ແລະ ເດັດດ່ຽວຍາດເອົາໄຊຊະນະໃນບັ້ນແກ້ໄຂຂໍ້ຫຍຸ້ງຍາກທີ່ສຸດເພື່ອບັນລຸເປົ້າໝາຍການຫຼຸດພົ້ນອອກຈາກຄວາມທຸກຍາກ. ຕອນບ່າຍວັນທີ 19 ມັງກອນນີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເດີນທາງໄປຢ້ຽມຢາມບ້ານຊົນເຜົ່າສ່ວນໜ້ອຍບ້ານໜຶ່ງທີ່ໄດ້ຫຼຸດພົ້ນອອກຈາກຄວາມທຸກຍາກຢູ່ເມືອງເຖິງຊົງ ແຂວງຢູນນານ ຖືວ່າເປັນການເປີດສາກເດີນທາງການສຳຫຼວດກວດເບິ່ງແລະຢ້ຽມຢາມພາຍໃນປະເທດເປັນຄັ້ງທຳອິດຂອງທ່ານສີຈິ້ນຜິງໃນປີ 2020. ບ້ານເຜົ່າວາຊືໂມລາເປັນບ້ານເກົ່າແກ່ດັ້ງເດີມທີ່ມີປະຫວັດສາດ 500 ກວ່າປີ. ຄຳວ່າ ຊືໂມລາ ໃນພາສາເຜົ່າວາ ມີຄວາມໝາຍວ່າ ແດນແຫ່ງຄວາມສຸກ. ໃນຊຸມປີມໍ່ໆມານີ້, ຊາວບ້ານແຫ່ງນີ້ມີຄວາມຮູ້ສຶກວ່າມີຄວາມສຸກຫຼາຍຂຶ້ນຢ່າງບໍ່ຢຸດຢັ້ງ, ເຂົາເຈົ້າບໍ່ພຽງແຕ່ໄດ້ຫຼຸດພົ້ນອອກຈາກຄວາມທຸກຍາກໝົດທຸກຄົນເທົ່ານັ້ນ, ຍັງໄດ້ຕັ້ງໜ້າສ້າງສາບ້ານທ່ອງທ່ຽວວັດທະນະທຳເຜົ່າວາອີກດ້ວຍ, ເພື່ອສ້າງຊີວິດທີ່ມີຄວາມສຸກໃຫ້ຫຼາຍກວ່າເກົ່າໃນຕໍ່ໜ້າ.
ຕອນບ່າຍວັນທີ 19 ມັງກອນນີ້, ທ່ານສີຈິ້ນຜິງໄດ້ເດີນທາງໄປຢ້ຽມຢາມພໍ່ແມ່ປະຊາຊົນບ້ານເຜົ່າວາຊືໂມລາເມືອງເຖິງຊົງ ໂດຍໄດ້ຍ່າງເຂົ້າເຮືອນຊາວບ້ານເພື່ອຊອກຮູ້ສະພາບການບຸກບືນສູ້ຊົນແກ້ໄຂບັນຫາຫຍຸ້ງຍາກເພື່ອຫຼຸດພົ້ນອອກຈາກຄວາມທຸກຍາກ, ທັງອວຍພອນປີໃໝ່ບຸນກຸດຈີນໃຫ້ຊາວບ້ານທັງຫຼາຍ.
ຢູ່ເດີ່ນໃນບ້ານ, ກິດຈະກຳສະຫຼອງບຸນກຸດຈີນຕາມປະເພນີເຜົ່າວາທີ່ເຕັມໄປດ້ວຍບັນຍາກາດຄຶກຄື້ນມ່ວນຊື່ນໄດ້ດຶງດູດຄວາມສົນໃຈຈາກທ່ານສີຈິ້ນຜິງ, ເພິ່ນໄດ້ຈັບໄມ້ຄ້ອນຕີກະລໍ3 ບາດຕາມປະເພນີທ້ອງຖິ່ນເພື່ອສົ່ງຄຳອວຍພອນແລະປາຖະໜາໃຫ້ດິນຟ້າອາກາດເອື້ອອຳນວຍ, ປະເທດຊາດມີຄວາມສະຫງົບແລະປະຊາຊົນຢູເຢັນເປັນສຸກ.