ກອງປະຊຸມເວທີປຶກສາຫາລືເສດຖະກິດໂລກໄດ້ຈັດຂຶ້ນຢູ່ເມືອງດາວອສ ປະເທດສວິສ ແຕ່ວັນທີ 21 ຫາວັນທີ 24 ມັງກອນນີ້. ທ່ານບອດ ເບຣນ ປະທານເວທີປຶກສາຫາລືເສດຖະກິດໂລກໄດ້ໃຫ້ທັດສະນະໃນວັນທີ 20 ມັງກອນນີ້ວ່າ: ຈີນໄດ້ເດີນຕາມເສັ້ນທາງທີ່ຖືກຕ້ອງໃນການຮັບມືກັບການປ່ຽນແປງຂອງດິນຟ້າອາກາດແລະການບັນລຸການພັດທະນາແບບຍືນຍົງ.
ທ່ານເບຣນເຫັນວ່າ : ເວົ້າສຳລັບປະເທດຈີນທີ່ຢາກຮັກສາການພັດທະນາເສດຖະກິດໃນສະພາບທີ່ພະຍາຍາມຫຼຸດຜ່ອນການປ່ອຍອາຍພິດເຮືອນແກ້ວໃຫ້ໜ້ອຍລົງເທົ່າທີ່ຈະໜ້ອຍໄດ້ນັ້ນ ເປັນສິ່ງທ້າທາຍອັນໃຫຍ່ຫຼວງກໍຕາມ, ແຕ່ວ່າ ຈີນໄດ້ສຸມກຳລັງເຂົ້າໃນການຈັດຕັ້ງປະຕິບັດສັນຍາປາຣີໂດຍໄດ້ແຍກການປ່ອຍອາຍພິດເຮືອນແກ້ວອອກຈາກການຊຸກຍູ້ການເຕີບໂຕຂອງເສດຖະກິດ ເພື່ອ ເຮັດໃຫ້ການປ່ອຍອາຍພິດເຮືອນແກ້ວຖືກຮັກສາໃຫ້ຢູ່ໃນລະດັບໝັ້ນທ່ຽງແລະຄ່ອຍໆຫຼຸດລົງເທື່ອລະກ້າວ. ທ່ານເບຣນ ໄດ້ຕີລາຄາຢ່າງສູງຕໍ່ຈີນທີ່ໄດ້ສຸມຄວາມພະຍາຍາມສູ້ຊົນຍາດເອົາໄຊຊະນະໃນບັ້ນຫຼຸດພົ້ນອອກຈາກຄວາມທຸກຍາກແລະບັນລຸການພັດທະນາແບບຍືນຍົງ. ທ່ານສະແດງຄວາມເຫັນດີເຫັນພ້ອມນຳແນວຄວາມຄິດຂອງຜູ້ນຳຈີນທີ່ບໍ່ເຫັນດີໃນການຊຸກຍູ້ໃຫ້ເສດຖະກິດເຕີບໂຕແຕ່ພັດເປັນການທຳລາຍສິ່ງແວດລ້ອມ, ທ່ານເຊື່ອໝັ້ນວ່າ ເສດຖະກິດຈີນຍັງຄົງຈະເຕີບໂຕຢ່າງຕໍ່ເນື່ອງ ທັງສາມາດປົກປັກຮັກສາສິ່ງແວດລ້ອມແລະບັນລຸການພັດທະນາແບບກວມລວມ.