ຕອນຄ່ຳວັນທີ 22 ມັງກອນນີ້ຢູ່ທີ່ເຊີແນວ, ທ່ານເທໂດຣສ ອາຮາໂນມ ເກເບຣອີເຊີດ ຜູ້ອຳນວຍການໃຫຍ່ອົງການອະນາໄມໂລກກ່າວວ່າ, ຈີນໄດ້ສະໜອງຂໍ້ມູນກ່ຽວກັບສະພາບພະຍາດປອດອັກເສບຈາກເຊື້ອຈຸລະໂລກສາຍພັນໃໝ່NCOV ຢ່າງທັນການ ແລະໄດ້ນຳໃຊ້ມາດຕະການທີ່ເໝາະສົມທັນທີ, ເຊິ່ງໄດ້ສະແດງໃຫ້ເຫັນເຖິງຄວາມໂປ່ງໃສໃນລະດັບສູງສົມຄວນ.
ວັນທີ 22 ມັງກອນນີ້, ອົງການອະນາໄມໂລກໄດ້ໄຂກອງປະຊຸມຄະນະກຳມະການສຸກເສີນ, ເພື່ອປຶກສາຫາລືກ່ຽວກັບສະພາບພະຍາດປອດອັກເສບຈາກເຊື້ອຈຸລະໂລກສາຍພັນໃໝ່NCOV ວ່າຈະກຳນົດໃຫ້ເປັນເຫດການສຸກເສີນດ້ານສາທາລະນະສຸກລະດັບທົ່ວໂລກຫຼືບໍ່? ໃນກອງປະຊຸມຂ່າວທີ່ຈັດຂຶ້ນພາຍຫຼັງ, ທ່ານເທໂດຣສກ່າວວ່າ, ເມື່ອສັງເກດຈາກສະພາບໃນປັດຈຸບັນນີ້ແລ້ວເຫັນວ່າ, ຍັງຕ້ອງການຂໍ້ມູນຫຼາຍກວ່າເກົ່າ ຈຶ່ງຈະສາມາດຕັດສິນໃຈໄດ້ວ່າ ຄວນຈະອອກຖະແຫຼງກ່ຽວກັບສະພາບພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ນີ້ວ່າເປັນເຫດການສຸກເສີນດ້ານສາທາລະນະສຸກລະດັບທົ່ວໂລກຫຼືບໍ່. ທ່ານກ່າວວ່າ, ປັດຈຸບັນ, ຄະນະຜູ້ຊ່ຽວຊານຂອງອົງການອະນາໄມໂລກກຳລັງຢູ່ຈີນ ເພື່ອຮ່ວມກັບຜູ້ຊ່ຽວຊານແລະເຈົ້າໜ້າທີ່ທ້ອງຖິ່ນຂອງຈີນດຳເນີນການປະເມີນຜົນ.
ທ່ານເທໂດຣສໄດ້ສະແດງຄວາມຂອບໃຈຕໍ່ພາກສ່ວນສາທາລະນະສຸກຂອງຈີນທີ່ໄດ້ໃຫ້ການຮ່ວມມືກັບອົງການອະນາໄມໂລກໃນດ້ານການປ້ອງກັນແລະຄວບຄຸມພະຍາດ, ແລະເຫັນວ່າ ມາດຕະການປ້ອງກັນແລະຄວບຄຸມພະຍາດທີ່ການນຳຂອງຈີນນຳໃຊ້ນັ້ນແມ່ນສຳຄັນທີ່ສຸດ, ຈີນໄດ້ສະໜອງຂໍ້ມູນກ່ຽວກັບສະພາບພະຍາດຢ່າງທັນການທີ່ສຸດ, ທັງໄດ້ນຳໃຊ້ມາດຕະການທີ່ເໝາະສົມທັນທີ, ໄດ້ສະແດງໃຫ້ເຫັນເຖິງຄວາມໂປ່ງໃສໃນລະດັບສູງສົມຄວນ.
ວັນທີ 23 ມັງກອນນີ້, ອົງການອະນາໄມໂລກຈະສືບຕໍ່ປະຊຸມເພື່ອປຶກສາຫາລືກ່ຽວກັບສະພາບການແຜ່ລະບາດຂອງພະຍາດດັ່ງກ່າວ.