ນັບແຕ່ເວລາ 0 ໂມງຫາ 12 ໂມງຂອງວັນທີ 4 ກຸມພານີ້, ແຂວງຢຸນນານໄດ້ລາຍງານຜູ້ຕິດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ເພີ່ມຂຶ້ນ 2 ກໍລະນີ (ເມືອງຊູຈິ້ງ 1 ກໍລະນີ, ກິ່ງແຂວງຊູສົງ 1 ກໍລະນີ).
ແຂວງຢຸນນານໄດ້ຮັບການລາຍງານວ່າມີຜູ້ເປັນພະຍາດທັງໝົດ 119 ກໍລະນີ, ນອກຈາກຜູ້ທີ່ໄດ້ຮັບການປິ່ນປົວຈົນຫາຍຂາດ ແລະ ອອກໂຮງໝໍແລ້ວ, ຜູ້ເປັນພະຍາດທັງໝົດໄດ້ຮັບການປິ່ນປົວແບບແຍກດ່ຽວຢູ່ໂຮງໝໍທີ່ຖືກກຳນົດໄວ້. ປັດຈຸບັນມີຜູ້ອາການຄ່ອນຂ້າງໜັກ 3 ກໍລະນີ, ອາການໜັກ 13 ກໍລະນີ, ປິ່ນປົວຫາຍຂາດ ແລະ ອອກໂຮງໝໍ 5 ກໍລະນີ, ຜູ້ທີ່ຖືກສົງໄສຕິດເຊື້ອພະຍາດ 160 ຄົນ, ຜູ້ທີ່ເຄີຍສຳຜັດກັບຜູ້ເປັນພະຍາດຢ່າງໃກ້ຊິດນັ້ນຍັງມີ 3788 ກໍລະນີພວມຖືກຕິດຕາມສັງເກດຈາກທາງການແພດຢູ່ ແລະ ບໍ່ມີລາຍງານຄົນເສຍຊີວິດ.
ໃນການລາຍງານຂອງແຂວງຢຸນນານທີ່ຢືນຢັນກໍລະນີຜູ້ຕິດເຊື້ອພະຍາດ, ນະຄອນຄຸນໝິງ 34 ກໍລະນີ, ກິ່ງແຂວງສິບສອງພັນນາ 13 ກໍລະນີ, ເມືອງຢີຊີ 12 ກໍລະນີ, ເມືອງຈ່ຽວທ່ອງ 9 ກໍລະນີ, ເມືອງຊູຈິ້ງ 9 ກໍລະນີ, ເມືອງເປົາຊານ 8 ກໍລະນີ, ກິ່ງແຂວງຕາຫຼີ້ 7 ກໍລະນີ, ເມືອງລີ້ຈ່ຽງ 7 ກໍລະນີ, ກິ່ງແຂວງຫົງເຮີ 5 ກໍລະນີ, ກິ່ງແຂວງເຕີຫົງ 5 ກໍລະນີ, ເມືອງພູເອີ 4 ກໍລະນີ, ກິ່ງແຂວງຊູສົງ 4 ກໍລະນີ, ກິ່ງແຂວງວົນຊານ 1 ກໍລະນີ ແລະ ເມືອງລີນຊ່າງ 1 ກໍລະນີ.