ຕອນຄ່ຳວັນທີ 9 ກຸມພານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ຮັບໂທລະສັບທ່ານນາງແອນເຈລາ ເມີເຄວ ນາຍົກລັດຖະມົນຕີເຢຍລະມັນຕາມຄຳເຊື້ອເຊີນ ເພື່ອແລກປ່ຽນຄວາມຄິດຄວາມເຫັນກ່ຽວກັບການປ້ອງກັນ ແລະ ຄວບຄຸມພະຍາດອັກເສບປອດໂຄໂຣນາສາຍພັນໃໝ່.
ທ່ານຫຼີເຄີ້ສຽງກ່າວເນັ້ນວ່າ, ຫວັງໃຫ້ປະຊາຄົມໂລກ ເຊິ່ງລວມທັງເຢຍລະມັນຈົ່ງຮັກສາສະຫງົບໃຈ, ສະໜັບສະໜູນຈີນໃນການປ້ອງກັນ ແລະ ຄວບຄຸມພະຍາດ, ຮັກສາການໄປມາຫາສູ່ກັນທີ່ເປັນປົກກະຕິລະຫວ່າງສອງຝ່າຍ ແລະ ເພີ່ມທະວີການຮ່ວມມືດ້ານສາທາລະນະສຸກສາກົນ.
ທ່ານນາງເມີເຄວກ່າວວ່າ, ເຢຍລະມັນເອົາໃຈໃສ່ຕິດຕາມສະພາບພະຍາດອັກເສບປອດສາຍພັນໃໝ່ໃນສະເພາະໜ້ານີ້. ເຢຍລະມັນມີທ່າທີສຸຂຸມຮອບຄອບໃນເວລາຮັບມືກັບພະຍາດເທື່ອນີ້ ແລະ ໄດ້ເພີ່ມທະວີການປະສານງານພາຍໃນສະຫະພາບເອີລົບ, ບໍ່ໄດ້ໃຊ້ມາດຕະການຈຳກັດເກີນຄວນ. ຂອບໃຈຈີນທີ່ສະໜັບສະໜູນ ແລະ ຊ່ວຍເຫຼືອຊາວເຢຍລະມັນຢູ່ຈີນ. ເຢຍລະມັນຍິນດີເພີ່ມທະວີການຮ່ວມມືກັບຈີນເພື່ອປ້ອງກັນ ແລະ ຄວບຄຸມພະຍາດ, ສືບຕໍ່ສະໜອງວັດຖຸການແພດໃຫ້ຈີນ ແລະ ຈະສະໜອງການຊ່ວຍເຫຼືອໃຫ້ຈີນເພື່ອຕໍ່ຕ້ານພະຍາດຕາມຄວາມສາມາດຂອງຕົນ.