ວັນທີ 9 ກຸມພານີ້, ທ່ານສີຈີ້ນຜິງ ປະທານປະເທດຈີນສົ່ງສານໄປຍັງກອງປະຊຸມສຸດຍອດສະຫະພາບອາຝຣິກາຄັ້ງທີ 33 ທີ່ຈັດຂຶ້ນຢູ່ນະຄອນຫຼວງອາດິສອາເບບາປະເທດເອທີໂອປີ, ເພື່ອສະແດງຄວາມຊົມເຊີຍຢ່າງຟົດຟື້ນຕໍ່ປະເທດແລະປະຊາຊົນອາຝຣິກາ.
ໃນສານຊົມເຊີຍຂອງທ່ານສີຈີ້ນຜິງລະບຸວ່າ, ນັບແຕ່ປີກາຍນີ້ເປັນຕົ້ນມາ, ພາຍໃຕ້ການນຳພາຂອງສະຫະພາບອາຝຣິກາ, ປະເທດສະຫະພາບອາຝຣິກາໄດ້ຕັ້ງໜ້າຊອກຄົ້ນເສັ້ນທາງພັດທະນາທີ່ສອດຄ່ອງກັບສະພາບຄວາມເປັນຈິງຂອງຕົນ, ຍຶດໝັ້ນແກ້ໄຂບັນຫາອາຝຣິກາດ້ວຍວິທີອາຝຣິກາ, ເຂດການຄ້າເສລີທະວີບອາຝຣິກາເລີ່ມການກໍ່ສ້າງຢ່າງເປັນທາງການ, ບາດກ້າວທີ່ປະເທດອາຝຣິກາຮ່ວມກັນສ້າງຄວາມເຂັ້ມແຂງດ້ວຍຕົນເອງໄດ້ຢວ່າງໄປໜ້າຢ່າງໜັກແໜ້ນ, ມີອິດທິພົນຕໍ່ສາກົນນັບມື້ນັບສູງຂຶ້ນ.
ທ່ານສີຈີ້ນຜິງກ່າວຕື່ມວ່າ, ປັດຈຸບັນ, ການພົວພັນລະຫວ່າງຈີນກັບອາຝຣິກາກຳລັງຢູ່ໃນໄລຍະທີ່ດີທີ່ສຸດໃນປະຫວັດສາດ. ກອງປະຊຸມສຸດຍອດປັກກິ່ງຂອງເວທີປຶກສາຫາລືການຮ່ວມມືຈີນ-ອາຝຣິກາໄດ້ຊັກນຳໃຫ້ໄມຕີຈິດມິດຕະພາບລະຫວ່າງຈີນກັບອາຝຣິກາມີກະແສໃໝ່, ການຊຸກຍູ້ການຈັດຕັ້ງປະຕິບັດໝາກຜົນຂອງກອງປະຊຸມສຸດຍອດ ໄດ້ສ້າງພະລັງໃໝ່ໃຫ້ແກ່ການຮ່ວມມືທີ່ຕິດແທດຕົວຈິງໃນຂົງເຂດຕ່າງໆ. ໂດຍຜະເຊີນໜ້າກັບການປ່ຽນແປງທີ່ບໍ່ເຄີຍມີມາກ່ອນໃນຮອບຮ້ອຍປີທີ່ຜ່ານມາ, ການສ້າງປະຊາຄົມຮ່ວມຊາຕາກຳຈີນ-ອາຝຣິກາທີ່ແໜ້ນແຟ້ນກວ່າເກົ່າແມ່ນສອດຄ່ອງກັບຜົນປະໂຫຍດຮ່ວມກັນຂອງປະຊາຊົນຈີນ-ອາຝຣິກາ. ຝ່າຍຈີນຈະສືບຕໍ່ປະຕິບັດຕາມແນວຄວາມຄິດແລະນະໂຍບາຍທີ່ຈິງໃຈ ແລະສະໜິດສະໜົມຢ່າງແທ້ຈິງ ແລະທັດສະນະກ່ຽວກັບຄວາມເປັນທຳແລະຜົນປະໂຫຍດທີ່ຖືກຕ້ອງ, ຊຸກຍູ້ໃຫ້ຈັດຕັ້ງປະຕິບັດໝາກຜົນກອງປະຊຸມສຸດຍອດປັກກິ່ງຢ່າງຮອບດ້ານ, ຂ້ຽວເລັ່ງຈີນກັບອາຝຣິກາຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ເພື່ອປະກອບສ່ວນໃຫຍ່ກວ່າເກົ່າເຂົ້າໃນການພັດທະນາແລະຄວາມຈະເລີນຮຸ່ງເຮືອງຂອງອາຝຣິກາ, ສ້າງຄວາມສຸກໃຫ້ແກ່ປະຊາຊົນຈີນ-ອາຝຣິກາ ໃຫ້ດີກວ່າເກົ່າ.