ໃນກອງປະຊຸມຂ່າວກົນໄກຮ່ວມກັນປ້ອງກັນແລະຄວບຄຸມການແຜ່ລະບາດຂອງພະຍາດທີ່ຈັດຂຶ້ນໃນວັນທີ 18 ກຸມພານີ້, ເຈົ້າໜ້າທີ່ຄະນະກຳມະການຕິດຕາມຄຸ້ມຄອງຊັບສິນແຫ່ງລັດຂອງລັດຖະບານຈີນ ທີ່ຮັບຜິດຊອບການຕິດຕາມຄຸ້ມຄອງລັດວິສາຫະກິດ ກ່າວວ່າ, ປັດຈຸບັນນີ້, ໂຮງງານຜະລິດຕົ້ນຕໍ 2 ໝື່ນກວ່າແຫ່ງທີ່ຂຶ້ນກັບລັດວິສາຫະກິດສູນກາງຈີນໄດ້ຟື້ນຟູການຜະລິດຄືນໃໝ່ຫຼາຍກວ່າ 80%.
ຂ່າວແຈ້ງວ່າ, ຄະນະກຳມະການຕິດຕາມຄຸ້ມຄອງຊັບສິນແຫ່ງລັດຈະບໍ່ປ່ຽນແປງເປົ້າໝາຍການຜະລິດ, ເປົ້າໝາຍທຸລະກິດ ແລະ ໜ້າທີ່ປະຕິຮູບ ທີ່ໄດ້ວາງອອກໃນຕົ້ນປີນີ້, ການຟື້ນຟູການຜະລິດຄືນໃໝ່ເປັນການຄ້ຳປະກັນທີ່ສຳຄັນ ສຳລັບການຮັບມືກັບການແຜ່ລະບາດຂອງພະຍາດອັກເສບປອດສາຍພັນໃໝ່ຢ່າງບັງເກີດຜົນ ແລະ ຮັກສາໃຫ້ເສດຖະກິດພັດທະນາຢ່າງໜັກແໜ້ນ. ສະຖິຕິເບື້ອງຕົ້ນສະແດງໃຫ້ເຫັນວ່າ, ໂຮງງານຜະລິດຕົ້ນຕໍ 2 ໝື່ນກວ່າແຫ່ງທີ່ຂຶ້ນກັບລັດວິສາຫະກິດຂັ້ນສູນກາງຈີນ ທີ່ຕິດຕາມຄຸ້ມຄອງໂດຍຄະນະກຳມະການດັ່ງກ່າວ ໄດ້ຟື້ນຟູການຜະລິດຄືນໃໝ່ຫຼາຍກວ່າ 80%, ວິສາຫະກິດທີ່ຍັງບໍ່ທັນຟື້ນຟູການຜະລິດແມ່ນຍ້ອນວ່າ ຍັງບໍ່ທັນໄດ້ຕາມເງື່ອນໄຂການຟື້ນຟູການຜະລິດ. ອັດຕາຟື້ນຟູການຜະລິດ ຂອງອຸດສາຫະກຳນ້ຳມັນເຊື້ອໄຟແລະເຄມີ, ໂທລະຄົມ, ຕາໜ່າງໄຟຟ້າ ແລະ ຄົມມະນາຄົມຂົນສົ່ງເປັນຕົ້ນ ລ້ວນແຕ່ລື່ນກາຍ 95% ແລະ ບາງຂະແໜງການໄດ້ຟື້ນຟູສຳເລັດ 100%.