ໃນກອງປະຊຸມຖະແຫຼງຂ່າວທາງອິນເຕີເນັດທີ່ຈັດຂຶ້ນໃນວັນທີ 17 ກຸມພານີ້, ທ່ານເກີງຊວງ ໂຄສົກກະຊວງການຕ່າງປະເທດຈີນກ່າວວ່າ, ທ່ານຫວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນຈະເດີນທາງໄປນະຄອນຫຼວງວຽງຈັນ ສປປ ລາວເພື່ອເຂົ້າຮ່ວມກອງປະຊຸມວິສາມັນລັດຖະມົນຕີກະຊວງການຕ່າງປະເທດຈີນ-ອາຊຽນກ່ຽວກັບບັນຫາພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ແຕ່ວັນທີ 19 ຫາວັນທີ 21 ກຸມພານີ້. ກອງປະຊຸມດັ່ງກ່າວຈະຊຸກຍູ້ຈີນແລະປະເທດອາຊຽນຮ່ວມກັນຮັບມືກັບການແຜ່ລະບາດຂອງພະຍາດອັກເສບປອດສາຍພັນໃໝ່, ກໍຄືການຮັກສາສຸຂະພາບແລະປອດໄພຂອງປະຊາຊົນຢູ່ພາກພື້ນນີ້, ທັງເປັນການປະກອບສ່ວນເຂົ້າໃນພາລະກິດສາທາລະນະສຸກຂອງໂລກ.
ຂ່າວແຈ້ງວ່າ, ທ່ານຫວາງຢີ້ແລະທ່ານເຕໂດໂຣ ໂລເປັສ ລອກຊິນ ລັດຖະມົນຕີກະຊວງການຕ່າງປະເທດຟີລິບປີນເຊິ່ງເປັນປະເທດປະສານງານການພົວພັນລະຫວ່າງຈີນກັບອາຊຽນຈະເປັນປະທານຮ່ວມຈັດກອງປະຊຸມຄັ້ງນີ້. ທ່ານຫວາງຢີ້ຈະແນະນຳມາດຕະການອັນເຂັ້ມແຂງທີ່ຈີນໄດ້ປະຕິບັດເພື່ອຕໍ່ຕ້ານການແຜ່ລະບາດຂອງພະຍາດ, ບັນດາລັດຖະມົນຕີກະຊວງການຕ່າງປະເທດອາຊຽນຈະແລກປ່ຽນຄວາມຄິດເຫັນຢ່າງເລິກເຊິ່ງກ່ຽວກັບການຮ່ວມກັນຮັບມືກັບການແຜ່ລະບາດຂອງພະຍາດ, ຊຸກຍູ້ຈີນແລະປະເທດອາຊຽນເພີ່ມທະວີການປ້ອງກັນແລະຄວບຄຸມພະຍາດຮ່ວມກັນ, ຮັກສາການແລກປ່ຽນດ້ານເສດຖະກິດສັງຄົມຢ່າງເປັນປົກກະຕິ, ແລະຄົ້ນຄວ້າປຶກສາຫາລືເພື່ອສ້າງກົນໄກໄລຍະຍາວການຮ່ວມມືດ້ານສາທາລະນະສຸກ.
ນອກນີ້, ໂດຍຕອບສະໜອງຕາມຄຳເຊີນຂອງທ່ານສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວ, ທ່ານຫວາງຢີ້ຈະຮ່ວມກັບທ່ານສະເຫຼີມໄຊ ກົມມະສິດເປັນປະທານຈັດກອງປະຊຸມການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 5 ແລະຢ້ຽມຢາມ ສປປ ລາວຢ່າງເປັນທາງການ.